දූෂණය යන්න ප්රජාතන්ත්රවාදී දේශපාලන ප්රවාහයෙන් පිටු දැකීම සඳහා වන යෝජනාව අද ඊයේ ආපු එකක් නොවන බවයි අධිකරණ, බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ අමාත්ය විජයදාස රාජපක්ෂ පවසනවා. ආරම්භයේ පටන්ම එක්සත් ජාතීන්ගේ සංවිධානය මේ ගැන කතා කළ බවයි ඔහු කියන්නේ.Sri Lanka Latest News
“එක්සත් ජාතීන්ගේ සංවිධානය මුල පටන්ම මේ ගැන කතා කරමින් ලෝකෙටම දූෂණ විරෝධී ප්රඥප්තිය හඳුන්වා දුන්නා. 2004 වසරේ දී අපිත් රටක් හැටියට මේ දූෂණ විරෝධී ප්රඥප්තියට අත්සන් කරලා එහි පාර්ශ්වකාරයෙක් වුණා. එදා අපි 2015 දී යහපාලන ආණ්ඩුව ආරම්භ කරනකොට අපි දීපු එක පොරොන්දුවක් තමයි මේ රටෙන් අල්ලස, දූෂණය, හොරකම, නාස්තිය පිටු දකිනවා කියන එක. මේ රටේ ජාතික ධනයෙන් විශාල ප්රමාණයක් දිගින් දිගටම හොර පාරෙන් විවිධ අයගේ සාක්කුවලට ගියාය කියන එක රහසක් නෙවෙයි. ඕනෑම රටක දූෂණය පවතිනවා නම් ඒ රටේ ආර්ථිකය යහපත් වර්ධනයකට ගෙන යන්න බෑ. ජනතාවට සාධාරණය ඉටුවන්නේ නෑ. අපි මේ ගැන දීපු පොරොන්දු මත ජනතාව අපිට 2015 දී ලොකු බලයක් දුන්නා. පොරොන්දු වුණා වගේම ඒ රජය දූෂණ විරෝධී පනත කෙටුම්පත් කිරීමේ කාර්යභාරය පටන් අරන් එහි වගකීම මට පැවරුවා.
අරගලයෙන් පස්සෙ රනිල් වික්රමසිංහ ජනාධිපතිතුමා මේ රටේ සහ ජනතාවගේ වගකීම භාරගෙන රට ගොඩනඟන වෙලාවේ දූෂණ විරෝධී පනත නැවත ගෙන ඒමේ වගකීම මා වෙත භාර කළා.
මේ දූෂණ විරෝධී පනත අපි ගෙනාවේ එක්සත් ජාතීන්ගේ සංවිධානය හෝ ජාත්යන්තර මූල්ය අරමුදල අපිට බල කළ නිසා නෙවෙයි. මොකද 2015දී අපි මේ වැඩේ පටන් ගන්න කොට 2022 දී IMF එකට යන්න වෙයි කියලා අපි දැනන් හිටියෙ නෑනෙ. ඒක නිසා මේක අපි IMF එකට යනවද නැද්ද කියන එක තීරණය කරන්න කලින් හදපු පනතක්.
ඒ වගේම තමයි මෙවර අපි IMF එකට යද්දි ඔවුන් අපි ගැන අධ්යයනය කර තිබුණා. ඒ වෙලාවේ ඔවුන් අපට කිව්වා ඔබගේ රටේ දූෂණයට හොරකමට එරෙහිව තියන නීති රීති ශක්තිමත් මදි ඒ ගැන පියවරක් ගන්න කියලා. කිව්වත් නැතත් ඒ වන විට අපි ඒ පනත හදලා ඉවරයි.
IMF එක පැත්තෙන් බලනවට වඩා අපේ රටේ ජනතාවගේ පැත්තෙන් බලනකොට ඉතාම සාධාරණ යෝජනාවක් තමයි මේ දූෂණ විරෝධී පනත. මොකද අපි දාසය වතාවක් ජාත්යන්තර මූල්ය අරමුදලට ගිහිල්ලා තියෙනවා. ඔවුන් දුන්න මුදල් හරියට භාවිතා කරලා මේ රට ගොඩ ගන්නේ නැතුව අපි 17 වතාවටත් එතෙන්ට යනවා. ඉතින් ඔවුන් එහෙම කොන්දේසියක් දැමිය යුතුයි. අපි ඒක සලකන්නෙ වදයක්, කරදරයක් විදිහට නෙවෙයි, ජනතාවට වාසිදායක වගේම අපි කරන්න හිටපු දෙයක් හැටියට.
දූෂණ සම්බන්ධයෙන් පවතින නීති ප්රමාණවත් නම් අපි කිසිසේත්ම අලුත් නීතියක් ගේන්නේ නෑ. රටක නීතියක් විතරක් තිබිලා මදි නේ. ඒ නීතිය ක්රියාත්මක කිරීම සඳහා දේශපාලන අභිලාෂයකුත් තිබිය යුතුයි. ඔය ජවිපෙ නායකයා කිව්වේ නීති ඕනෙ නෑ, දේශපාලන සංස්කෘතියෙන් මේක හදන්න පුළුවන් කියලනේ. එහෙම නං ඉතින් පාර්ලිමේන්තුව වැඩකුත් නෑ. දේශපාලන සංස්කෘතිය වෙනස් කරල ඒකෙන් ඔක්කොම කරන්න පුළුවන් නම්.
දූෂණයට බලපාන එකක් තමයි දූෂිතයො පාර්ලිමේන්තුවට පැමිණීම. දූෂිතයන්ට වුණත් පුළුවන් ඕන තරම් වියදම් කරලා තෑගිබෝග දීල, වරදාන වරප්රසාද ජනතාවට දීලා ඔවුන්ගේ කැමැත්ත අරන් පාර්ලිමේන්තුවට එන්න. බලන්න මැතිවරණවලින් කවුද දිනන්නෙ කියලා. වැඩියෙන්ම මුදල් වියදම් කරන්න පුළුවන් මිනිහා. වැඩියෙන්ම අරක්කු බොන්න දෙන්න පුළුවන් මිනිහා. වැඩියෙන්ම ඡන්දදායකයන්ට තෑගිබෝග දෙන්න පුළුවන් මිනිහා. වැඩියෙන්ම ප්රචාරක මාධ්ය සල්ලිවලට පාවිච්චි කරන්න පුළුවන් මිනිහා. මේගොල්ලෝ දූෂිතයො බව ජනතාව දැන දැනත් ඔවුන්ව පාර්ලිමේන්තුවට එවනවා. එවලා එදා ඉඳලම ආපස්සට කෑගහනවා පාර්ලිමේන්තුවේ දූෂිතයො ඉන්නව කියලා. ඔන්න ඕක වළක්වන්න තමයි අපි ගෙනාවේ මැතිවරණ වියදම් නියාමන පනත” බව අමාත්ය විජයදාස රාජපක්ෂ කියනවා.
