ස්වාධීන රූපවාහිනී සේවයේ ප්රවෘත්ති හා කාලීන සිදුවීම් අංශයේ සේවය කළ කාන්තාවක් වාචික ලිංගික හිංසනයට ලක් කිරීමේ සිදුවීමට අදාළව වහාම පරීක්ෂණයක් ආරම්භ කරන ලෙස එහි සාමාන්යාධිකාරීවරයාට උපදෙස් දුන් බව ස්වාධීන රූපවාහිනී සේවයේ සභාපති, නීතීඥ සුදර්ශන ගුණවර්ධන මහතා පවසයි.
ITN නාලිකාවට සම්බන්ධ හිටපු මාධ්යවේදිනියක වන ඉෂාරා දේවේන්ද්ර මහත්මිය පසුගියදා චෝදනා කළේ තමාට ITN හි ජ්යෙෂ්ඨ නිලධාරියෙකුගෙන් නිරන්තරයෙන් වාචික ලිංගික හිරිහැර සිදුවන බවටයි.
මෙම හිරිහැර පැමිණිලි සම්බන්ධයෙන් සාක්ෂි සහ හඬපට සහිතව බලධාරීන් දැනුවත් කළද, කිසිවකු පියවර නොගත් බවට ඇය චෝදනා කළාය.
තම ආත්ම ගෞරවය ආරක්ෂා කර ගැනීම සඳහා සේවයෙන් ඉවත් වීමට තීරණය කළ බව ඇය පැවසුවාය.
ඇය වැඩිදුරටත් පවසා තිබුණේ මෙවැනි හිරිහැරවලට නිරන්තරයෙන් කාන්තාවන් මුහුණ දෙන පරිසරයක් ITN තුළ පවතින බවය.
මෙම චෝදනාවලට ප්රතිචාර දක්වමින් ITN සභාපතිවරයා කියා සිටියේ ITN ආයතනයේ කළමනාකාරීත්වය බාහිර විමර්ශන නිලධාරියෙකු තෝරා ගැනීමට කටයුතු කරමින් සිටින බවයි.
තමන් සෙනසුරාදා සිට නිවාඩු ලබා තායිලන්තයේ චියැං මායි හි UNDP විසින් සංවිධානය කරන ලද සම්මන්ත්රණයකට සහභාගී වෙමින් සිටින බව ස්වාධීන රූපවාහිනී සේවයේ සභාපතිවරයා කියයි.
නිවේදනයක් නිකුත් කරමින් මාධ්ය සේවක වෘත්තීය සමිති සම්මේලනය ද අදාළ මාධ්යවේදිනියගේ නිර්භීතකම සහ “ම්ලේච්ඡ ක්රියාව” නොබියව හෙළි කිරීමට ගත් පියවර පැසසුමට ලක් කළේය.
