ඉන්දියාවේ ශ්රී ලංකා මහකොමසාරිස් සන්තෝෂ් ජා, පසුගිය ජූලි 11 වැනිදා ශ්රීමහා බෝධිය ආරක්ෂා කොට රැකබලා ගන්නා කල්ලන්චිය විහාරයේ මහ ධුරය දරන ජයවර්ධන හමුවීමට පැමිණීම ඓතිහාසික අවස්ථාවක් විය. සංඝමිත්තා මහතෙරණිය ලංකාවට ආවේ බුද්ධ වර්ෂ 236දීය. ඇයත් සමග ලංකාවට පැමිණි දූත පිරිස අතර භික්ෂුණීන්, කුමාරියන් සහ විවිධ ශිල්පීන්ද වූහ. ශ්රීමහා බෝධිය රැකබලා ගැනීමේ භාරදූර වගකීම පවරා තිබුණේ ඔවුන්ටය. එසේම ශ්රීමහා බෝධියට පුද පූජා පැවැත්වීමේ වගකීමද ඔවුන්ට භාරවී තිබිණි. මෙයට හේතුව ඒ වනවිට ලංකාවේ රජුගේ පාලනයට මේ ගැන අවබෝධයක් නොතිබූ නිසාය. මොවුහු තිසා වැව අසල ගම්වල පදිංචි වූහ. විහාර බුලන්කුලම, විහාර පලුගම, විහාර කල්ලන්චිය, විහාර මැදවච්චිය යන නම් පටබැඳුණේ ඔවුන් පදිංචි වූ ප්රදේශවලට අනුවය. අරහත් මහින්ද හිමිගේ උපදෙස් මත දේවානම්පියතිස්ස රජු සංඝමිත්තා තෙරණිය සමග පැමිණ පදිංචි වූ මේ දූත පිරිස්වල පරම්පරාවලට ශ්රීමහා බෝධිය ආරක්ෂා කරගෙන පුද පූජා පැවැත්වීමේ වගකීම භාරදෙනු ලැබීය. ඔවුන් බෝධිගුප්ත කුමාරයා සහ සුමිත්ත කුමාරයාගේ පරම්පරාවය. Sri Lanka Latest News
මෙරට ඉන්දීය මහකොමසාරිස් පසුගියදා කල්ලන්චිය විහාරයට ගියේ එදා දේවානම්පියතිස්ස ශ්රී මහා බෝධියේ ආරක්ෂාව සහ පුදපූජා පැවැත්වීමේ වගකීම භාරදුන් ගම් නවයක ප්රධානීන්ගේ අලූත් පරම්පරාව හමුවීමටය. එහිදී ජයවර්ධන කරුණු පැහැදිලි කරමින් පවසා සිටියේ තමන් බෝධිගුප්ත කුමාරයාගේ පරම්පරාවේ අයෙක් බවත්, තමන්ගේ පරම්පරාවේ මුතුන්මිත්තන් සංඝමිත්තා තෙරණිය සමග උතුරු ඉන්දියාවේ සිට පැමිණි අය බවත්ය. ඔහු පැවැසුවේ එදා සංඝමිත්තා සමග පැමිණි එම පරම්පරාවේ මුතුන්මිත්තන් පදිංචි වූ ගම් නවයේම අද පරම්පරාව එදා වගේම අදටත් සිය රාජකාරිය අකුරට ඉටුකරන බවය.
මෙහි ඇති විශේෂත්ය එදා සංඝමිත්තා තෙරණිය සමග පැමිණි දූත පිරිස පැවැත එන පරම්පරාවෙන් බිහාර් ප්රාන්තයේ වත්මන් ඉන්දීය මහකොමසාරිස් සන්තෝෂ් ජා පැවැත ඒමය. අනුරාධපුර අටමස්ථානාධිපති පල්ලේගම හේමරතන හිමි ඉන්දීය මහකොමසාරිස් හමුවූ විට මේ බව හෙළිදරව් කළ අතර, මහකොමසාරිස්වරයාගේ සංචාරයේ ඓතිහාසික වැදගත්කම එහිදී අනාවරණ විය. මහකොමසාරිස්වරයා ගම් නවයේ අලුත් පරම්පරාවේ ප්රධානීන් හමුවෙද්දී කීවේ තමා තම ඥාතීන් හමුවීමට ආ බවය. මහකොමසාරිස්වරයාගේ එම ප්රකාශයෙන් ගම් නවයේ පරම්පරා ප්රධානීන් අභිමානයට පත්විය.
අශෝක අධිරාජ්යයා ශ්රී මහා බෝධියේ ශාඛාවක් සමග සිය දියණිය ලංකාවට එවීමෙන් පසු ඇය සමග පැමිණි දූතයන් ගැන සොයාබලන්න ඉන්දියාවේ හිටපු රජවරු හෝ නිදහස් ඉන්දියාවේ අගමැතිවරු උනන්දු නොවූහ. මෙහි වටිනාකම හොඳින්ම දැනුණේ වත්මන් ඉන්දීය අගමැති මෝදිටය. ඔහු ලංංකාවට එන හැම අවස්ථාවකදීම ශ්රීමහා බෝධිය වන්දනා කරන්න යන්නේ ඒ නිසාය. ශ්රී මහා බෝධියට ගරු කරන නායකයෙක් ඉන්දියාවේ සිටීම ලංකාවේ බෞද්ධ ජනතාවගේ වාසනාවකි. ඒ වගේම ශ්රී මහා බෝධිය ආරක්ෂා කරගන්න සංඝමිත්තා තෙරණිය සමග ලංකාවට ආ දූත පිරිසට ඥාතිකම් කියන බිහාර් ප්රාන්තය නියෝජනය කරන මහකොමසාරිස්වරයෙක් ලංකාවේ සිටීම බෞද්ධ ජනතාවට සැනසීමකි.
ප්රදීප් ගමගේ
