සමගි ජන බලවේග ප්රධාන කාර්යාලයේ පැවැති මාධ්ය හමුවට සහභාගි වූයේ පාර්ලිමේන්තු මන්ත්රී හර්ෂණ රාජකරුනා මහතාය.Sri Lanka Latest News
හර්ෂණ රාජකරුනා මහතා එහිදී වැඩිදුරටත් මෙසේ පැවැසීය,
‘‘පාර්ලිමේන්තුවේ ප්රධානියා ලෙස කටයුතු කරන කතානායක අශෝක රන්වල මහතාට තිබෙන්නේ ව්යාජ ආචාර්ය උපාධියක් එසේ නැතිනම් ඔහු ආචාර්ය උපාධියක් කරලා නැහැ , එසේ නැතිනම් ඔහු ආචාර්ය උපාධිය අවසන් කරලා නැහැ. කෙසේ නමුත් කතානායක අශෝක රන්වල මහතා ආචාර්ය උපාධියක් තිබෙන ආකාරයට තමයි පාර්ලිමේන්තුවේ දිවුරුම් දුන්නේ. ඔහුට ආචාර්ය උපාධියක් තිබෙන බව පාර්ලිමේන්තු වෙබ් අඩවියේ පවා සඳහන් කරලා තිබුණා. ඒ වගේම මැතිවරණ කාල සිමාවේදී කතානායක අශෝක රන්වල මහතා ඔහුගේ මැතිවරණ පෝස්ටර්වල පවා සඳහන් කර තිබුණේ ආචාර්ය අශෝක රන්වල ලෙසයි. කෙසේ නමුත් මෙවැනි දේවල්වලින් පාර්ලිමේන්තුවේ ප්රධානියා ලෙස කතානායක අශෝක රන්වල මහතාට සිදුවෙන්නේ විශාල අගෞරවයක්. ඒ නිසා කතානායකවරයාට එල්ල වන චෝදනාවට වහාම පිළිතුරු ලබාදෙන්නැයි අපි ඉල්ලා සිටිනවා. කතානායකවරයාට මේ හරහා සිදුවන අගෞරවය සමස්ථ පාර්ලිමේන්තුවටම සිදුවන අගෞරවයක්. ඒ නිසා මෙම චෝදනාවලට කතානායක අශෝක රන්වල මහතා පැහැදිලි උත්තරයක් ලබාදිය යුතුයි. කතානායක අශෝක රන්වල මහතාට තිබෙන ආචාර්ය උපාධි සහතිකය කරුණාකරලා පෙන්වන්න. ඒ වගේම පසුගිය කාලයේ රටට විහුළු සැපයු පිරිසකටත් ආචාර්ය උපාධි තිබුණා. එවැනි පිරිසක් පාර්ලිමේන්තුව තුළත් සිටියා. ඒ වගේම මෙම චෝදනාව කතානායකවරයාට පමණක් නොව ජාතික ජනබලවේගයේ තවත් ඇමැතිවරු කිහිපදෙනෙකුට මෙම චෝදනාව එල්ල වෙලා තිබෙනවා. විද්වතුන් පිරිසක් පාර්ලිමේන්තුවට පත්කළා කියලා ජාතික ජන බලවේගය ජනතාව නොමග යවා තිබෙන බව තමයි මෙම කාරණාවලින් පැහැදිලි වෙන්නේ.
ඒ වගේම ගෝඨාභය රාජපක්ෂ හිටපු ජනාධිපතිවරයාගේ කාල සිමාවේදීත් මෙවැනි දේවල් සිදුවුණා. ඒ වියත් මණ්ඩලයෙන් උපදෙස් ලබාගෙන ගෝඨාභය රාජපක්ෂ හිටපු ජනාධිපතිවරයාට අවුරුදු දෙකකින් ගෙදර යන්න සිද්ධ වුණේ. අනුර කුමාර දිසානායක ජනාධිපතිවරයා ලග සිටින්නෙත් බොරු කාරයෝ පිරිසක්ද කියලා අපිට සැකයක් මතුවෙනවා. එම නිසා ජාතික ජන බලවේගයේ ව්යාජ තොරතුරු ඉදිරිපත් කර තිබෙන පිරිස වෙනුවෙන් වහාම ක්රියාමාර්ග ගත යුතුයි. ජනාධිපතිවරයා ඔවුන් වෙනුවෙන් නිසි ක්රියා මාර්ගයක් ගන්නා තුරු ජාතික ජනබලවේගයට අති විශාල ජනවරමක් ලබාදුන්න පිරිස ඇතුළු සමස්ත රටේ ජනතාවම බලාගෙන සිටිනවා. ඒ නිසා ජාතික ජන බලවේගයේ චෝදනා එල්ලවන පිරිසට මාධ්ය හමුවක් පවත්වා ඔවුන්ගේ උපාධිය , පශ්චාත් උපාධිය , ආචාර්ය උපාධිය පිළිබඳව උප්පු කරන්න හැකියාව තිබෙනවා. ඒ වගේම කතානායකවරයා ඔහුට ආචාර්ය උපාධියක් තිබෙන බවට ව්යාජ තොරුතරු ඉදිරිපත් කර තිබෙනවානම් ඔහු කතානායක ධූරයෙන් සහ පාර්ලිමේන්තු මන්ත්රීධුරයෙන් ඉල්ලා අස්විය යුතුයි.
ඒ වගේම අනුර දිසානායක ජනාධිපතිවරයා ප්රමුඛ ආණ්ඩුව ගෝඨා පාට් ටූ ද මේ ගෙන යන්නේ කියන ප්රශ්නය ගැටලුව අපට මතුවෙනවා. ගෝඨාභය රාජපක්ෂ හිටපු ජනාධිපතිවරයාගේ කාල සිමාවේදීත් රටේ හාල් ප්රශ්නයක් ඇතිවුණා. ඒ අවස්ථාවේදී ගෝඨාභය රාජපක්ෂ මහතා හාල් මෝල් හිමියන් හමුවෙලා සාකච්ඡා කළා. හාල් මෝල් හිමියන් සහල් සඟවාගෙන සිටින බව ප්රකාශ කළා. මහා පරිමාන හාල් මෝල් හිමියන්ගේ ගබඩා පරික්ෂා කළා. අදත් සිදුවෙන්නේ මේ සිද්ධි මාලාවම තමයි. අනුර දිසානායක ජනාධිපතිවරයාත් හාල් මෝල් හිමියන් හමුවෙලා සාකච්ඡා කළා. මහා පරිමාන හාල් මෝල් හිමියන්ගේ ගබඩා පරික්ෂා කළා. නමුත් සහල්වල මිල අඩුවෙලා නැහැ. වෙළඳ පොලතුළ රටේ පරිභෝජනයට අවශ්ය සහල් ප්රමාණය නැහැ. ගෝඨාභය රාජපක්ෂ හිටපු ජනාධිපතිවරයා රඟ දැක්වූ රංගනයම අනුර දිසානායක ජනාධිපතිවරයාත් රඟ දක්වන බව අපට පෙනෙන්න තිබෙනවා. ඒ වගේම ගෝඨාභය රාජපක්ෂ හිටපු ජනාධිපතිවරයා ප්රකාශ කළා හාල් ඇටයක් පිටරයින් ගේන්නේ නැ කියලා. ඒ කතාවම වර්තමාන ජනාධිපති අනුර දිසානායක මහතාත් ප්රකාශ කළා. නමුත් හාල් මෙට්ට්රික්ටොන් 70,000 ක් ආනයනය කරන්න වර්තමාන රජය කටයුතු කරලා තිබෙනවා. ගෝඨාභය රාජපක්ෂ හිටපු ජනාධිපතිවරයාගේ යුගයේ සිද්ධ වුණ දේම අද ජනාධිපති අනුර දිසානායක මහතාගේ කාලසිමාවේදී සිදුවෙමින් පවතිනවා. රටේ ජනතාව නැවත රැවටුනා. ජනතාව බලාපොරොත්තු වුණ දේ අද වර්තමාන පාලකයින් ඉටු කරනවාද කියලා අපි ජනතාවගෙන් අහන්න කැමැතියි. ඒ නිසා රටේ ජනතාවට අවශ්ය වන සහල් අඩු මුදලට , ජනතාට දරාගත හැකි මිලකට ලබාදෙන්න රජය වහාම පියවර ගත යුතුයි.
ඒ වගේම මහා පරිමාන වී මෝල් හිමියන් සතුව තිබෙන සහල් ප්රමාණය වෙළඳ පොලට නිකුත් කරගන්න බැරිව ජාතික ජනබලවේගය කොහොමද ලංකාවෙන් හොරකම් කළ සල්ලි නැවත රටට ගේන්නේ. ඒ නිසා පිටරට තියෙන සල්ලි ලංකාවට ගේන්න කලින් මහා පරිමාන වී මෝල් හිමියන් හංගගෙන ඉන්නවා කියන සහල් ටික වෙළඳපොලට නිකුත් කරලා අඩුමිලට ජනතාවට සහල් ලබාදෙන්න කටයුතු කරන්න කියලා අපි රජයෙන් ඉල්ලා සිටිනවා. ඒ වගේම මේ වනවිට රටේ ජනතාව දැඩි ආර්ථික පීඩනයකට ලක්වී ජිවත් වීමට නොහැකි තත්ත්වයට පත් වෙලා තිබෙනවා. ඒ නිසා රජය අඩු කරන බව පැවැසු බදු අඩු කර ජනතාවට සහනයක් ලබාදිය යුතුයි. එසේ නැතිනම් භාණ්ඩ මිල අඩු කර ජනතාවට සහනයක් ලබාදෙන්න කටයුතු කළ යුතුයි.
ඒ වගේම සමගි ජනබලවේග ආණ්ඩුවක් වර්තමානයේ රටේ තිබුණානම් 2025 වර්ශයේදී ඉදිරිපත්කරන අයවැය හරහා රටේ ජනතාවට ලබාදිය හැකි සියලුම සහන ලබාදිමට කටයුතු සිදුකරනවා. නමුත් රටේ ජනතාව සමගි ජන බලවේගයට ආණ්ඩු බලයක් ලබාදිමට කටයුතු කළේ නෑ. ඒ වගේම වර්තමාන රජය ප්රකාශ කළා ඉන්ධන මිල සූත්රය අහෝසි කරනවා කියලා. නමුත් අපි එවැනි දේවල් ප්රකාශ කළේ නැ. නමුත් ඉන්ධන සඳහා සහනයක් රටේ ජනතාවට ලබාදෙන්න කටයුතු කරනවා කියලා සමගි ජනබලවේගය පැහැදිලිව ප්රකාශ කළා. ඒ වගේම ඉන්ධන මිල සූත්රයට විරුද්ධ වුණ කණ්ඩායම අද රටේ පාලන බලය ලබාගෙන තිබෙනවා. ඒ නිසා ඔවුන් ප්රකාශ කළ යුතුයි ඉන්ධන සඳහා සහනයක් ලබාදිය හැකිද නොහැකිද කියලා. ඒ නිසා ජාතික ජන බලවේග ආණ්ඩුව මැතිවරණ වේදිකාවල ලබාදුන්න පොරොන්දු ඉටු කරන තුරු රටේ ජනතාට බලාගෙන සිටිනවා. ‘‘
