හදිසි ආපදා තත්ත්වයෙන් රටට සිදුවූ අති විශාල හානිය අවම කර ගැනීමට නොහැකි වූයේ ඇයි දැයි කියා සොයා බැලීමට පාර්ලිමේන්තු තේරීම් කාරක සභාවක් කඩිනමින් පත් කරන ලෙස විරුද්ධ පක්ෂය කතානායකවරයාගෙන් අද(03) පාර්ලිමේන්තුවේදී ඉල්ලීමක් කළා.Sri Lanka Latest News
අද දින විවාදයට සහභාගි වූ සමගි ජන බලවේගයේ කොළඹ දිස්ත්රික් පාර්ලිමේන්තු මන්ත්රී මුජිබර් රහුමාන් විසින් මෙම යෝජනාව අද පාර්ලිමේන්තුවට ඉදිරිපත් කළා.
එම යෝජනාව ඉදිරිපත් කරමින් මුජිබර් රහුමාන් මන්ත්රීවරයා ප්රකාශ කළේ නොවැම්බර් 11 වැනිදා මෙම හදිසි ආපදාව පිළිබඳව කල් ඇතුව දැනුම් දී තිබියදීත් එය අවම කර ගැනීම සඳහා නිසි වැඩපිළිවෙළක් ක්රියාත්මක නොකළේ කවුද කියා සොයා බැලීමට පාර්ලිමේන්තුවට වගකීමක් තිබෙන බවයි.
ඒ අනුව මෙහි වගකීම හරියට සිදුවුණාද නැද්ද එයට වගකිවයුත්තේ කවුද කියා සොයා බැලීම සඳහා අනිවාර්යෙන්ම පාර්ලිමේන්තු තේරීම් කාරක සභාවක් පත් කළ යුතු බවයි ඔහු ප්රකාශ කළේ.
ඊට අමතරව මුජිබර් රහුමාන් අදහස් දක්වමින් ප්රකාශ කළේ ජාත්යන්තර මාධ්ය විසිනුත් මේ පිළිබඳව දැනුම් දී තිබියදීත් ඒ ගැන අවධානය යොමු නොකළේ ඇයිද කියායි.
විශේෂයෙන්ම මිලි මීටර් 500කට අධික වර්ෂාපතනයක් ඉදිරියේදී ලැබෙන බවට ජාත්යන්තර මාධ්යවලින් පවා දන්වා තිබියදීත් ඒ පිළිබඳව අවධානය යොමු නොකළේ ඇයිද කියා ඔහු විමසා සිටියා.
මේ සම්බන්ධයෙන් ආණ්ඩුව තවම නිල නිවේදනයක් ප්රකාශයට පත් කර නොමැති බවත් ඒ අනුව මෙහි වරද කාගේද කියා සොයා බැලීම ජනතාව සතු අයිතියක් බවද හෙතෙම ප්රකාශ කළා.
විශේෂයෙන්ම මෙම අනතුරු ඇඟවීම , මෙම අනාවැකිය දැනගෙන නිලධාරීන් විසින් ආණ්ඩුවට කිව්වාද නැත්නම් අදාල නිලධාරීන් ආණ්ඩුවට නොකියා සිටියාද අදාල නිලධාරීන් ආණ්ඩුවට කියූ පසුව ආණ්ඩුව නිසි ක්රියාමාර්ග නොගත්තාද යන කාරණා පිළිබඳව සොයා බැලිය යුතු බවද ඔහු කියා සිටියා.
නොවැම්බර් 11 වැනිදා සිට නොවැම්බර් 27 වෙනිදා දක්වා මෙම ආපදාව ඇතිවන තුරු මෙම අනතුරු ඇඟවීම සම්බන්ධයෙන් කිසිදු මට්ටමේ සාකච්ඡාවක් ජනාධිපතිවරයාගේ ප්රධානත්වයෙන් හෝ ආණ්ඩු පක්ෂය තුළ සිදුවී නොමැති බවද වැඩිදුරටත් අදහස් දැක්වූ පාර්ලිමේන්තු මන්ත්රී මුජිබර් රහුමාන් ප්රකාශ කළා.
