ආණ්ඩුව විසින් පාර්ලිමේන්තුවට ඉදිරිපත් කිරීමට නියමිත මහබැංකුව ස්වාධීන කිරීමේ පනත් කෙටුම්පත සම්බන්ධයෙන් මේ වනවිට පොහොට්ටුවේ මන්ත්රී කණ්ඩායමකගේ දැඩි විරෝධය පළව ඇති බව වාර්තා වේ.
ඔවුන් පෙන්වා දී ඇත්තේ මෙම පනත සම්මත වුවහොත් මූල්ය අරමුදලේ ඉතා අහිතකර කොන්දේසියක් වන දේශීය ණය ප්රතිව්යුහගත කිරීමේ කටයුතු නියත වශයෙන්ම සිදු කිරීමට ආණ්ඩුවට සිදු වනු ඇති බවකි.
එසේ වුවහොත් දේශීය බැංකු පද්ධතිය කඩා වැටීමේ බරපතළ අවදානමක් මතුවිය හැකි බවද ඔව්හු පෙන්වා දෙති.
ජාත්යන්තර මූල්ය අරමුදලේ කොන්දේසිවලට අනුව මහබැංකුව ස්වාධීන කිරීමේ යෝජනාව ඉදිරිපත්ව ඇති බවත්, එම යෝජනාව ක්රියාත්මක කළහොත් මහබැංකුව රටේ උන්නතියට වඩා ජාත්යන්තර මූල්ය අරමුදලේ වුවමනාවන් අනුව හැසිරෙන ආයතනයක් බවට පත්වීම වැළැක්විය නොහැකි වනු ඇති බවත් පෙන්වා දී ඇති මෙම මන්ත්රී කණ්ඩායම ඊට සිය විරෝධය පළ කොට ඇති බව දැනගන්නට ඇත.
දැනටමත් විපක්ෂයේ දේශපාලන පක්ෂ මෙම පනත් කෙටුම්පතට විරෝධය පළ කොට ඇති අතර ඒකාබද්ධ කණ්ඩායමක් ලෙස ඔවුන් ඊට එරෙහිව පාර්ලිමේන්තුව තුළ කටයුතු කිරීමටත් තීන්දු කොට තිබේ.
සමගි ජන බලවේගය පසුගිය සතියේදී මේ සම්බන්ධයෙන් විපක්ෂ නායක කාර්යාලයේදී සිය මන්ත්රීවරුන්ට විශේෂ වැඩමුළුවක් පවත්වා තිබූ අතර ඊට එක්ව සිටි ආර්ථික විශේෂඥයන්ද මෙම පනතේ ඇති රටට අහිතකර බරපතළ වගන්ති පිළිබද දීර්ඝ පැහැදිලි කිරීමක් සිදු කොට තිබිණ.
මීට අමතරව ස්වාධීන ආර්ථික විශේෂඥයන් පිරිසක් පසුගිය සතියේදී හිටපු ජනාධිපති මහින්ද රාජපක්ෂ මහතා වෙත මෙන්ම විපක්ෂයේ පක්ෂ නායකයන් වෙත ලිපියක් යොමු කරමින් ලිඛිතව මෙහි ඇති බරපතළ තත්ත්වය පිළිබද පැහැදිලි කිරීමක් සිදු කොට ඇති බව වාර්තා වේ.
මෙම පනත පාර්ලිමේන්තුවේ සම්මත වුවහොත් ජාත්යන්තර මූල්ය අරමුදල විසින් තමන්ට අවශ්ය ආකාරයට මහබැංකුව පාලනය කිරීම සිදුකරනු ඇති බවද එහිදී ඔවුන් සිය කරුණු දැක්වීම මගින් මහින්ද රාජපක්ෂ මහතාටත්, විපක්ෂ නියෝජිතයන්ටත් පෙන්වා දී ඇති බව පැවසේ.
එමෙන්ම වත්මන් මහබැංකු අධිපති ආචාර්ය නන්දලාල් වීරසිංහ මහතා පමණක් නොව අයි.එම්.එෆ් වැඩපිළිවෙළට ලංකාව ඇතුළත් කිරීම පසුපස සිටි හිටපු මහබැංකු අධිපති ඉන්ද්රජිත් කුමාරස්වාමි මහතා පවා මූල්ය අරමුදලෙන් වැටුප් ලබන පිරිස් බවත්, ඔවුන් එම ආයතනයේ උපදෙස්වලට අනුව කටයුතු කරන පිරිසක් බවත් එම ලිපියේ සදහන්ව ඇති බව දැනගන්නට තිබේ.
කෙසේවෙතත් විපක්ෂයේ කණ්ඩායම් විසින් මෙම පනත් කෙටුම්පත ශ්රේෂ්ඨාධිකරණය හමුවේ අභියෝගයට ලක් කළ අවස්ථාවේදී ශ්රේෂ්ඨාධිකරණය පවා මෙහි ඇතුළත් බොහොමයක් වගන්ති ආණ්ඩුක්රම ව්යවස්ථාවට පටහැනි බව පෙන්වා දී තිබිණ.
නමුත් එම කරුණ පාර්ලිමේන්තුවට දැනුම් දීමේදී කතානායක මහින්ද යාපා අබේවර්ධන මහතා හැසිරුණු ආකාරය පිළිබදව විපක්ෂය විසින් බරපතළ කරුණු ගණනාවක් මතු කරනු ලැබ තිබේ.
විශේෂයෙන්ම පාර්ලිමේන්තු මන්ත්රී උදය ගම්මන්පිල මහතා ප්රකාශ කොට තිබුණේ කතානායකවරයා මේ බව නිවැරදි අයුරින් පාර්ලිමේන්තුවට දැනුම් නොදුන් බවත්, ඒ හරහා සිය පාර්ලිමේන්තු වරප්රසාද උල්ලංඝනය වී ඇති බවත්ය.
මීට අමතරව හෙට දිනයේදී ආර්ථිකය සම්බන්ධ විශේෂඥයන් කණ්ඩායමක් මෙම පනත් කෙටුම්පත පිළිබදව දේශපාලන පක්ෂ දැනුවත් කිරීමට සැලසුම් කොට ඇති බවද දැනගන්නට ඇත.
