ශල්ය උපකරණ ඉහළ මිල ගණන්වලට රෝගීන්ට විකිණීම තුළින් “දූෂණය” නමැති වරද සිදු කළේ යැයි සැකපිට අත්අඩංගුවට ගෙන රක්ෂිත බන්ධනාගාරගත කර සිටි ශ්රී ජයවර්ධනපුර රෝහලේ විශේෂඥ වෛද්ය මහේෂි විජේරත්න ඇප මත මුදා හරින ලෙස කොළඹ මහේස්ත්රාත් අධිකරණය ඊයේ (15) නියෝග කළා. Sri Lanka Latest News
අල්ලස් කොමිසමේ නිලධාරීන් සහ විත්තියේ නීතිඥවරුන් ඉදිරිපත් කළ කරුණු සලකා බැලීමෙන් අනතුරුව කොළඹ ප්රධාන මහේස්ත්රාත් තනූජා ලක්මාලි ජයතුංග මෙම නියෝගය නිකුත් කළ බවයි දසත අධිකරණ වාර්තාකරු පැවසුවේ.
ඒ අනුව, සැකකාරිය රුපියල් 50,000ක මුදල් ඇප සහ රුපියල් මිලියන පහ බැගින් වූ ශරීර ඇප තුනක් මත මුදා හැරීමට නියෝග කෙරුණා.
සැකකාරියට ශ්රී ජයවර්ධනපුර රෝහලට ඇතුළු වීම ද තහනම් කළ මහේස්ත්රාත්වරිය ඇයගේ විදේශ ගමන් තහනම් කිරීමට ද නියෝග කළා.
ඊට අමතරව සැකකාරියගේ විදේශ ගමන් බලපත්රය අධිකරණයට භාර දිය යුතු බවටත් නියෝග කෙරුණා.
පැමිණිල්ල කැඳවූ අවස්ථාවේ දී අල්ලස් කොමිසම වෙනුවෙන් පෙනී සිටි එහි සහකාර අධ්යක්ෂිකා අනූෂා සම්බන්ධප්පෙරුම අධිකරණය හමුවේ කරුණු දක්වමින් සඳහන් කළේ, මෙම සැකකාර වෛද්යවරිය විසින් රෝගීන්ට ශල්ය වෛද්ය උපකරණ විකිණීම සඳහා පවත්වාගෙන ගිය එම්.එන්.එම්. නමැති ආයතනයක් ගැන මීට පෙර විමර්ශනවල දී කරුණු අනාවරණය වූ අතර ඒ පිළිබඳව දැනටමත් අධිකරණය දැනුවත් කර ඇති බවයි.
ඉන් අනතුරුව මෙවැනි ම ආකාරයේ ඊලීෂ් මෙඩිකල් සෙන්ටර් නමැති ආයතනයක් පිළිබඳව විමර්ශනවල දී කරුණු අනාවරණය වූ බවත්, එම ආයතනය ශාමා කුමාරි රොද්රිගු නමැති අයෙකු විසින් ආරම්භ කරනු ලැබ ඇති බවත් විමර්ශනවල දී තොරතුරු අනාවරණය වී ඇතැයි ඇය පැවසුවා.
පසුව එම තැනැත්තියගෙන් ප්රකාශයක් ලබා ගත් අවස්ථාවේ දී අදාළ ආයතනය මෙම සැකකාර වෛද්යවරිය විසින් ආරම්භ කරන ලෙස තමන්ට දැනුම් දෙනු ලැබූ බවත්, ඒ වෙනුවෙන් තමන්ට “පොකට් මනී” ලබා දෙන බවට සැකකාර වෛද්යවරිය විසින් තමන්ට ප්රකාශ කරන ලද බවත් එම රොද්රිගු නමැත්තිය සඳහන් කළ බව සහකාර අධ්යක්ෂ ජනරාල්වරිය පැවසුවා.
මෙම ආයතනයට අදාළව ශාමා කුමාරි රුද්රිගු නමැත්තිය සහ සැකකාර වෛද්යවරිය අතර බැංකු ගිණුමක් ආරම්භ කර පවත්වාගෙන යන අතර එම ගිණුමට වෛද්ය උපකරණ විකිණීමෙන් ලැබෙන මුදල් බැර වී ඇති බවත් එම ගිණුමට අදාළ මුදල් නිකුත් කිරීමේ බලය මෙම සැකකාර වෛද්යවරිය වෙත පවරා තිබූ බවත් ඇය සඳහන් කළා.
ඒ අනුව, සැකකාර වෛද්යවරියගේ නියෝග මත එම ගිණුමෙන් මුදල් දෙවන සැකකාර රංජිත් මුතුකුඩ නමැත්තාට නිකුත් කර තිබෙන බවට විමර්ශනවලින් කරුණු අනාවරණය වී ඇති බවත් ඇය කියා සිටියා.
අල්ලස් කොමිසම ඇතැම් වෘත්තීන්වලට එරෙහිව ද්වේශ සහගතව කටයුතු කරන බවට පසුගිය දිනයේ අදහස් ප්රකාශ වී තිබූ බව පෙන්වා දුන් නියෝජ්ය අධ්යක්ෂ ජනරාල්වරිය, අල්ලස් කොමිසම කිසිදු වෘත්තියක ආචාර ධර්ම පිළිබඳව සොයා බැලීමක් නොකරන බව සඳහන් කළා.
එහෙත්, කිසියම් වෘත්තිකයෙකු තමන්ගේ නිල බලය අයුතු ලෙස පාවිච්චි කරමින් ලාභයක් උපයා ගන්නවා නම් හෝ ඒ තුළින් වෙනත් අයෙකුට ලාභයක් ඉපයීමට අවස්ථාවක් සලසා දෙන්නේ නම් එය දූෂණ විරෝධී පනත යටතේ “දූෂණය” නමැති වරද සිදු කිරීමක් බවත් ඊට එරෙහිව කටයුතු කිරීමට අල්ලස් කොමිසමට හැකියාව තිබෙන බවත් ඇය පැවසුවා.
ඒ අනුව, මෙම සැකකාරිය වෛද්ය උපකරණ රෝගීන්ට විකිණීම සඳහා තවත් ආයතන පවත්වාගෙන යන්නේ ද? පිළිබඳව තවදුරටත් විමර්ශන සිදු කිරීමට අවශ්ය බවත් බැංකු ගිණුම් පිළිබඳව ද විමර්ශන සිදු කිරීමට අවශ්යව තිබෙන හෙයින් එම විමර්ශන කටයුතු අවසන් වන තෙක් සැකකාරිය රක්ෂිත බන්ධනාගාරගත කරන ලෙසත් අල්ලස් කොමිසමේ සහකාර අධ්යක්ෂිකා අනූෂා සම්බන්ධප්පෙරුම අධිකරණයෙන් ඉල්ලා සිටියා.
ඉන් අනතුරුව සැකකාර වෛද්යවරිය වෙනුවෙන් පෙනී සිටි ජනාධිපති නීතිඥ සාලිය පීරිස් අධිකරණය හමුවේ කරුණු දක්වමින් පැවසුවේ, මෙම සැකකාරිය දින 29ක් රිමාන්ඩ් භාරයේ පසුවන බවයි.
අල්ලස් කොමිසමේ නිලධාරිනිය සඳහන් කළා, අපි වෘත්තීන්වල ආචාර ධර්ම ගැන හොයන්නේ නෑ කියලා. එහෙනම් මගේ සේවාදායිකාව මොළේ මැරිච්ච අයට ශල්යකර්ම කළා කියලා කිව්වේ කොහොම ද? මේ සැකකාරියගෙන් ප්රතිකාර ගත්ත රෝගීන්ගෙන් සීයට හැත්තෑවකට වඩා මැරිලා කියලා කිව්වේ කොහොම ද? අල්ලස් කොමිසම මේ වගේ ප්රකාශ කළේ මාධ්යවල අවධානය දිනා ගන්න. එහෙමත් නැත්නම් ගැලරියට තමයි කිව්වේ. ජනප්රියවාදී මතයක් ගොඩනගලා සැකකාරිය දිගින් දිගට ම රිමාන්ඞ් භාරයට පත් කරන්න තමයි අල්ලස් කොමිසම මේ වගේ දේවල් කරන්නේ. මේ සිද්ධිය සම්බන්ධයෙන් කිසිදු මහජන කැලඹීමක් නෑ. දැන් තිබෙන්නේ කෘත්රිමව නිර්මාණය කළ සමාජ මාධ්ය රැල්ලක් විතරයි. මේවා මත පිහිටලා අධිකරණවලට කටයුතු කිරීමට හැකියාවක් නැහැ. අල්ලස් කොමිසම පෝලිමට මිනිස්සු අල්ලන් ඇවිල්ලා රිමාන්ඩ් කරන්න හදනවා. මේ ක්රියාව නිසා වැඩි දවසක් යන්නට මත්තෙන් නීතියේ ආධිපත්යය සම්බන්ධයෙන් පවතින මහජන විශ්වාසය කඩා වැටෙන්න පුළුවන්. ඒක වැඩි ඈතක නැහැ. ඊට පස්සේ ඒ අයටත් පෙනී ඉන්න වෙන්නෙ අපට ම යි.
ඒ අනුව සැකකාරිය තවදුරටත් රක්ෂිත බන්ධනාගාරගත කිරීමට තරම් කරුණු ඉදිරිපත් වී නොමැති හෙයින් ඇය ඇප මත මුදා හරින ලෙස ජනාධිපති නීතිඥ සාලිය පීරිස් අධිකරණයෙන් ඉල්ලා සිටියා.
