පැවැති අධික සුළං තත්ත්වය හේතුවෙන් ඓතිහාසික මිහින්තලා රජමහා විහාරස්ථානයේ උඩ මළුවේ සේල චෛත්යය ඉදිරිපිට පිහිටි අම්බස්තල බෝධීන් වහන්සේ අද (27) දහවල් කඩා වැටීම හේතුවෙන් වන්දනාවේ පැමිණි බැතිමතෙකු අවාසනාවන්ත ලෙස ජීවිතක්ෂයට පත්ව කුඩා දැරියක් සීරීම් තුවාල ලබා ඇතැයි බව මිහින්තලේ පොලිසිය පවසනවා. Sri Lanka Latest News
මෙලෙස ජීවිතක්ෂයට පත්ව ඇත්තේ ඊතනවත්ත, දෙමළුව, වාරියපොළ ලිපිනයේ පදිංචි, අසංක බණ්ඩාර හේරත් (45) නමැති හැවිරිදි ව්යාපාරිකයෙක්.
වාරියපොල ප්රදේශයේ පදිංචි එම ව්යාපාරිකයා ඇතුළු පවුලේ ඥාතීන් නමදෙනකු අද (27) දහවල් 1.30ට පමණ ඓතිහාසික මිහින්තලය වැඳ පුදා ගැනීම සඳහා පැමිණ මිහින්තලා මහ සෑය වන්දනා කිරීම සඳහා පිය ගැට පෙළට නැගීමට සූදානම්ව බෝධිය අසලින් ගමන් කිරීමේදී මෙම අනතුර සිදුවූ බව සියැසින් දුටු පිරිසක් පැවසුවා.
මෙම හදිසි අනතුර හේතුවෙන් බෝධීන්වහන්සේ මුල ප්රදේශයෙන් ඉදිරී ගොස් බෝධිය හරි මැදින් කොටස් දෙකකට වෙන්වී දිසාවන් දෙකක විශාල ප්රදේශයක් පුරා පතිත වී තිබෙනවා.
විශාල ශබ්දයක් නගමින් එම බෝධිය දෙකට වෙන්වන අවස්ථාවේදී ඒ අසල සිටි වයස අවුරුදු නවයක පමණ දැරියක් බේරා ගැනීමට මිහින්තලා රජමහා විහාරස්ථානයේ රජකාරියේ නිරතව සිටි පොලිස් සැරයන් ජේ.එච්. නිලන්ත (72921) නිලධාරියා කටයුතු කළ බව එම ස්ථානයේ සිටි පිරිස් පැවසුවා.
මෙම අනතුර පොහොය දිනයක හෝ සති අන්ත නිවාඩු දිනයක සිදුවූයේ නම් විශාල ජීවිත හානියක් සිදු වීමට ඉඩ තිබූ බව විහාරවාසී හිමිනමක් පැවසූවා.
මෙම අනතුරින් කඩා වැටුණු බෝධියේ අත්තකට යටවී සිරවී සිටි එම ව්යාපාරිකයා මහත් පරිශ්රමයක් දරා බේරා ගෙන මිහින්තලයේ රජයේ රෝහලට ඉගෙන ගොස් ඇති අතර එහිදී ජීවිතක්ෂයට පත්ව තිබූ බව පොලිසිය සඳහන් කළා.
දේහය සම්බන්ධයෙන් හදිසි මරණ පරීක්ෂණය පැවැත්වීමෙන් අනතුරුව පශ්චාත් මරණ පරීක්ෂණය පැවැත්වීමට නියමිතව තිබුණා.
මෙම අනතුර සම්බන්ධ බැතිමතුන්ගෙ තත්ත්වය සොයා බැලීම සඳහා මිහින්තලා රාජ්ය මහා විහාරාධිපති පූජ්ය වලවාහැංඟුණවැවේ ධම්මරතන හිමිපාණන්ද මිහින්තලේ රජයේ රෝහලට වැඩම කර සිටියා.
මිහින්තලේ පොලිස් ස්ථානාධිපති ප්රධාන පොලිස් පරීක්ෂක චන්ද්රසිරි රංජිත්ගේ උපදෙස් මත නිලධාරී කණ්ඩායමක් අනතුර සම්බන්ධයෙන් වැඩිදුර විමර්ශන සිදු කළා.
