ජනාධිපතිවරණය අවසන්. ජනාධිපති කෙනෙක් පත්වෙලා, හිටපු ජනාධිපති ඉවත්වෙලා ගිහිල්ලා. ලංකා ඉතිහාසයේ තීරණාත්මක බල වෙනස වෙලා, ඒත් එහෙම එකක් දැනෙනවද? නෑ රට පුරාම කිසිම කලබලයක් නෑ. කිසිම ප්රචණ්ඩ ක්රියාවක් වාර්තා වෙන්නෙත් නෑ. මැතිවරණ ප්රචණ්ඩ ක්රියා නිරීක්ෂකයෝ කියන්නෙ මේක ඉතිහාසයේ දැක්ක සාධාරණම සහ ප්රචණ්ඩ ක්රියා අඩුම මැතිවරණය කියලා. ඒක හරිම පුදුම දෙයක්. අපි වෙනදා දැක්කෙ කණ්ඩායම් දෙකක් අතර බල හුවමාරුවක්. ඒ අතර මනුෂ්ය ඝාතන කීයක් සිද්ධ වෙලා තියෙනවද? ඉස්සර අපිට මතකයි මැතිවරණ සමයේදී මැතිවරණ ප්රචණ්ඩ ක්රියා නිරීක්ෂකයෝ මේ ප්රචණ්ඩ ක්රියා ගණන් හදනවා. (Sri Lanka Latest News)
රූපවාහිනියේ ගුවන් විදුලියේ මේ ගැන ප්රවෘත්තිවලට කියනවා. අද දවසට වාර්තා වෙලා තියෙනවා ප්රචණ්ඩ ක්රියා සංඛ්යාව කියලා. අපි දැක්කා ඉස්සර ඒ ගැන පත්තරවල මුල් පිටුවේ පොල්ගෙඩි අකුරුවලින් පළවෙනවා. අච්චර ප්රචණ්ඩ ක්රියා වාර්තා වෙලා, මෙච්චර ගානක් මියගිහිල්ලා කියලා.
ඡන්දයට කලින් බොහෝ දෙනෙක් ලෑස්ති වෙලා හිටියේ. බොහෝ දෙනාගේ හිතේ තිබුණා මොකක් හරි දෙයක් වෙයි කියලා ඒ දැවැන්ත බල හුවමාරුවක් වෙනකොට. ඒක අපිට දැකල දැකල පුරුදු වෙලා තියෙන්නේ. ඡන්දයට පෙර කාලයේදී රටේ තිබුණු දේශපාලන තත්ත්වය ගැන අපි ඇත්තටම ඉතාම උනන්දුවෙන් බලාගෙන හිටියා. මැතිවරණය මොහොතේදී අපි දැක්කේ ඉතාම තරගකාරී ස්වභාවක්.
මේ වතාවේ අපේක්ෂකයොත් දෙන්නෙක් වෙනුවට කණ්ඩායම් කිහිපයක්ම තරග කළා. ඒ කණ්ඩායම් අතර ප්රබල කණ්ඩායම් කීපයක්ම තිබුණා. සජිත් ප්රේමදාස විපක්ෂ නායකතුමාගේ කණ්ඩායම ඒ වගේම වර්තමාන ජනාධිපතිතුමාගේ කණ්ඩායම නාමල් රාජපක්ෂ හිටපු අමාත්යතුමාගේ කණ්ඩායම ඉතාම ප්රබලව දේශපාලන ක්රියාකාරකම්වල යෙදිලා හිටපු කණ්ඩායම්. එකිනෙකා අතර ඉතාම ප්රබල තරගකාරී ස්වභාවයක් තිබුණා.
ප්රතිඵලය මොකක් වුණත් මේ අය තරග කළේ කරට කර. හැම මැතිවරණ දිස්ත්රික්කයකම හැම ඡන්ද කොට්ඨාසයකම මේ හැමෝම තමන්ගේ දේශපාලන ක්රියාන්විතය දියත් කරමින් තිබුණා. ජාතික ජන බලවේගය සහ සමගි ජන බලවේගය කරට කර රැස්වීම් තිබ්බා. ඔවුන් එකිනෙකට ඉතාම කිට්ටු තැන්වල මැතිවරණ කාර්යාල ගොඩනගලා තිබුණා. මේ අය එකිනෙකාට මුණගැහෙන විදිහට කැන්වසින් කළා. ඒත් මේ කිසිම තැනකදි මේ අය මහා පරිමාණව ගැටුණෙ නෑ.
මැතිවරණ දිනයේදී ඒක මැතිවරණ දිනයක් බවට නොදැනෙන තරමටම සාමකාමීව කටයුතු සිද්ධ වුණා. ඡන්ද මධ්යස්ථාන ඉදිරිපිට වෙනදා සිදුවෙන කිසිදු ගැටුමක් මේ වතාවේ වාර්තා වුණේ නෑ. ඇත්තටම සම්ප්රදායක් විදියට ඡන්ද පෙට්ටිය උස්සන වෙලාවට පත්තු වෙන රතිඤ්ඤා ටිකවත් මේ වතාවේ පත්තු වුණේ නෑ.
ඡන්දය ගණින ස්ථානවල මෙදා සැරේ වෙනදාට වඩා විශාල පිරිසක් හිටියා. නමුත් ඒ තැන්වල කිසිදු ආකාරයක ගැටුමක් ගැන වාර්තා වුණේ නෑ. දෙවැනි මනාප ගනින්න වුණා. ඒ ප්රතිඵලය දකින කොට සාමාන්ය ජනතාව වුණු අපට පවා දැනුණෙ යම් ගැටලුකාරී බවක්. ඒත් එහෙමයි කියලා කවුරුවත් ගැටුණේ නෑ.
ඉන් පස්සෙ ප්රතිඵල ආවා. ජාතික ජන බලවේගය දිනන බව පෙනෙන්න පටන් ගත්තා. ඉරිදා උදේ වෙනකොට ඒක දැනුණා. නමුත් මේ ප්රතිශත ගැටලුවත් එක්ක දෙවැනි මනාප ගණින අතර මේ ජා.ජ.බ. පාක්ෂිකයො පුදුම සංයමයකින් මේ තත්ත්වය ඉවසුවා. මේ වෙලාවෙ විජිත හේරත් අමාත්ය තුමන් මහජනතාව අමතලා මේ ගැන පැහැදිලි කළා. ඒ වෙන කොටත් ප්රතිඵල නිකුත්වීමේ පුදුමසහගත පමාවක් තිබුණා. ඒක ඇත්තටම කලබල වෙනසුලු දෙයක්. නමුත් මිනිස්සු පුදුම විදියට ඉවසුවා.
රාත්රිය උදාවෙන කොට ප්රතිඵලය ආවා. රනිල් වික්රමසිංහ හිටපු ජනාධිපති ඉතාම සාමකාමීව සමුගෙන ගියා. ඔහු ක්රමවත්ව ඇඳිරිනීතිය යොදන්නත් අවශ්ය විදියට ඉවත්කරන්නත් කටයුතු හදලා තිබ්බා.
ඔහුගේ මේ ක්රියාකලාපය සියලු දෙනාගෙ පැසසුමට ලක්වුණා. ඔහු මහත්තයෙක් වගේ ඉවත්ව ගියා.
ඉන් පස්සෙ උදාවුණේ ජයහ්රාහකයාගේ වාරය. ඔවුන් ජයගත්තා. ඉතිහාසය වෙනස් කරමින් ජයගත්තා. බලාපොරොත්තුවල මල් පිපුණා. නමුත් කිසිම තැනක පැරදුණු අයට වචනයකින් හෝ කරදරයක් වුණේ නෑ. පාරක් පාරක් ගානේ ජෝගි නැටුවෙ නෑ. කිරිබත් දන්සල් දුන්නෙ නෑ. කොඩි අරගෙන පෙළපාළි ගියෙ නෑ. ජයග්රහණය රටේම ජයග්රහණයක් කියලා හිතෙන විදියට ඔවුන් හැසිරුණා.
මේ අතර සජබයටත් ගරු බුහුමන් ලැබිය යුතු තැනක් තියෙනවා. විනිවිද බවකින් තොර අක්රමවත් දෙවැනි මනාප සෙල්ලම ඔවුන් ඉවසා සිටියා. සමහර තැන්වල ඇත්තටම මේ දෙවැනි මනාප ගැනීම ගැටලුකාරී වුණත් ඔවුන් ඒක එතැනින් ඉවර කළා. සජිත් අනුරට අතට අත දීලා ගෙදර ගියා. ඡන්දෙ ඉවර වුණා.
අනුර දිනුවා. ඒත් එහෙමයි කියලා කවුරුවත් පැරදිලා නෑ. අනුර ජාතික ජන බලවේගයේ ජනාධිපති නෙමේ. ඒ ශ්රී ලංකාවේ ජනාධිපති. රටේ නායකයා ඔහු.
ඒක සාමාන්ය ජනතාව දැන ඉන්න ඕනෙ. කවුරු ආවත් ඒක වෙනස් කරන්න බෑ. ඒක හැමෝම දැං පිළිඅරගෙන ඉවරයි. මේ වගේ දේශපාලන වටපිටාවක් හැදුව හැමෝටම ස්තුතියි. මැතිවරණ කොමසාරිස් සහ කොමිසමේ අය, කොමිසමේ රාජකාරි කළ අය,මැතිවරණ නිරීක්ෂකයො, හිටපු ජනාධිපති රනිල් වික්රමසිංහ, ආණ්ඩුව සහ රනිල්ගේ පිලේ සිටි අය, සජබය, ජාජබය ඇතුළු සියලු දෙනාට අපි ස්තුතිවන්ත වෙන්න ඕනෙ පැය විසිහතරක් ගතවෙන්නට පෙරම ප්රකෘති තත්ත්වයට පත්වුණු සාමාන්ය රටක් අපිට දුන්නට. ජය සහ පරාජය දරාගනිමින් මැතිවරණය ශ්රී ලංකාවෙ එකකට වඩා යුරෝපයේ එකක ස්වරූපයක් නිර්මාණය කළාට. මේ මැතිවරණය වයඹ ඡන්දය වගේම ඊට හාත්පස වෙනස් එකක් විදියට ඉතිහාසයට එක් වේවි.
ජීවන පහන් තිළිණ
