ශ්රී ලංකා පාර්ලිමේන්තුවටත් ශ්රී ලංකාවේ නීතියටත් පොදුවේ වැදගත් තීන්දුවක් අධිකරණය විසින් ගත්තේය. ඒ කාලයක් තිස්සේ පාර්ලිමේන්තුවේ පුටුවක් හිමිව තිබූ ශ්රී ලංකාවේ ප්රකට දේශපාලකයකු වූ මහින්දානන්ද අලුත්ගමගේට එරෙහිව අධිකරණය විසින් ලබාදුන් තීන්දුවයි. ඔහුට වසර විස්සක සිර දඬුවම් නියම කරන්නට අධිකරණය පියවර ගත්තේය. Sri Lanka Latest News
මෙයට පෙරද කීපවතාවක්ම මහින්දානන්ද අලුත්ගමගේට එරෙහිව පැමිණිලි ඉදිරිපත්ව තිබුණේය. නමුත් ඒවායින් ඔහු නිදොස් කොට නිදහස් වූ බව අපට මතකය.
අමාත්යවරයකු ලෙස කටයුතු කරමින් සිටියදී අයථා ලෙස උපයාගත් රුපියල් මිලියන 27කට අධික මුදලක් වැයකොට කොළඹ කින්සි පාරේ සුඛෝපභෝගී නිවසක් මිලදී ගැනීම පිළිබඳ මෙහිදී ඔහු චෝදනාවට ලක්විය. මෙහිදී මහින්දානන්ද නිදොස්කොට නිදහස් විය. ප්රශ්නගත නිවස මිලදී ගැනීමේදී වාහන බලපත්රයක් විකුණා උපයාගත් රුපියල් මිලියන 27ක මුදල සහ බැංකු ණයක් වශයෙන් ලබාගත් රුපියල් මිලියන 10ක මුදලක් ඔහු උපයාගත් ආකාරය අධිකරණයට පැහැදිලි කළේය.
ඊළඟට 2021 වසරේ චීනයේ සමාගමකින් ගෙන්වන ලද ප්රමිතියට අනුකූල නොවන කාබනික පොහොර තොගයට ගෙවීම් කිරීම සම්බන්ධව මහින්දානන්ද චෝදනාවට ලක්විය. ඔහු ඒ සම්බන්ධයෙන් අපේක්ෂිත ඇප ඉදිරිපත් කරමින් සිට 2025 මැයි මස 19 වැනිදා කොළඹ ප්රධාන මහෙස්ත්රාත් අධිකරණ භූමියට පැමිණ නීතියට භාර වුණේය.
කෙසේ නමුත් අවසාන වශයෙන් 2015 වසරේ පැවැති ජනාධිපතිවරණ සමයේ සතොස ආයතනය හරහා කැරම් බෝඩ් දාහතර දාහක් සහ දාම් ලෑලි එකොළොස් දාහක් මිලදී ගෙන ක්රිඩා සමාජවලට බෙදාදීම තුළින් රජයට සිදුකරන ලද පාඩුවක් සම්බන්ධව ඔහුටත් එවක වෙළෙඳ ඇමැතිව සිටි නලින් ප්රනාන්දුටත් චෝදනා එල්ල විය. මේ හරහා රජයට රුපියල් මිලියන 53ක පාඩුවක් සිදුකිරීම ඔවුන් සිදුකරන ලද වරදයි. අල්ලස් කොමිසම වෙනුවෙන් පෙනීසිටි නිලධාරීන් අධිකරණයට කියා තිබුණේ ඔවුන් සිය ධුරයේ බලතල අයුතු ලෙස භාවිත කර ඇති බවයි.
අල්ලස් පනතේ 70 වැනි වගන්තිය යටතේ විත්තිකරුවන් දෙදෙනාට එරෙහිව මෙම චෝදනා ගොනුකර තිබුණු අතර, මෙම නියෝගය මහාධිකරණ විනිසුරුවරුන් තිදෙනෙක් විසින් ලබාදුන්නේය.
නලින්ලා මහින්දානන්දලා අහිංසක නැත. වරදේ දිග පළල මැන බලා ‘චූටි වරදකට’ පව් අප්පා කියන්නට කිසිවෙක් කලබල නොවිය යුතුය.
වරද ලොකු හෝ පොඩි වුවද වරද වරදමය. අනුරලා බලයට ආවේ හොරු අල්ලන බව කියාගෙනය. මේ කරන්නේ ඒකය. අල්ලනකොට කෙඳිරිගාන්න නම් එන්න එපා කියා ජනාධිපතිවරයා කෙළින්ම කීවේය. ඒ නිසා දැන් ආණ්ඩුවට අරක මේක කියන්නට කිසිවෙක්ට අයිතියක් නැත. කවුරු කළත් හොඳ හොඳය.
මීට කලින් උතුරුමැද හිටපු මහ ඇමැති එස්.එම්. රංජිත්ට වසර 16ක බරපතළ වැඩ සහිත සිරදඬුවම් නියම විය. 2012 වසරේ සැප්තැම්බර් මස 27 වැනිදා සහ 2014 වසරේ දෙසැම්බර් මස 31 වැනිදා අතර කාලසීමාව තුළ විත්තිකාර එස්.එම්. රංජිත් එම පළාත් සභාවේ ප්රධාන අමාත්යවරයා වශයෙන් කටයුතු කරමින් සිටියදී ප්රධාන අමාත්යවරයාගේ පෞද්ගලික ලේකම්වරියගේ වැටුප සමග ඉන්ධන දීමනාවක් එක්කර තිබියදීත් නීති විරෝධී ලෙස ඉන්ධන දීමනා වශයෙන් රුපියල් ලක්ෂ 26කට අධික ඉන්ධන ප්රමාණයක් ලබාගැනීම සහ ඊට ආධාර අනුබල දීම සම්බන්ධයෙන් එස්.එම්. රංජිත් සහ ශාන්ති චන්ද්රසේන යන අයට එරෙහිව ‘දූෂණය’ නමැති වරද සිදුකළේ යැයි චෝදනා කරමින් අල්ලස් කොමිසම මෙම නඩුව ගොනුකර තිබිණි.
මේ වන විට බරපතළ චෝදනා සහිතව රිමාන්ඩ් බන්ධනාගාරගතව ඉන්නා දේශපාලකයෝ කීප දෙනෙක්ම සිටිති. ඉන් එක්කෙනෙක් දුමින්ද දිසානායකය. දුමින්දගේ චෝදනාව රන් ආලේපිත තුවක්කුවයි. මේ තුවක්කුව සම්බන්ධ නඩුව තවමත් අසා අවසන් නැත. වැල්ලවත්ත මහල් නිවාස සංකීර්ණයකින් මේ රන් ආලේපිත තුවක්කුව හොයාගත්තේ පහුගිය 23 වැනිදාය.
මර්වින් සිල්වා කම්කරු හා මහජන සම්බන්ධතා අමාත්යවරයා වශයෙන් කටයුතු කළ සමයේදී සිදුකරන ලද ආදායම් ඉපයීම් සම්බන්ධව චෝදනාවට ලක්ව තිබේ. 2010 මාර්තු 31 වැනිදාත් 2012 මාර්තු 31 වැනිදාත් අතර කාලසීමාව මේ චෝදනා සමය බව අල්ලස් කොමිසම අධිකරණයට දැනුම් දී ඇත. ඔහු මේ කාලය තුළ රුපියල් කෝටි 15කට අධික මුදල් හා දේපළ උපයාගත් බව අල්ලස් කොමිසම කියයි.
ඉඩකඩම්, යානවාහන මිලදී ගැනීමත් බැංකු ගිණුම් පවත්වාගෙන යාමත් අල්ලස් කොමිසම අධිචෝදනා පත්රයේ වැඩිදුරටත් සඳහන් කරයි.
කොළඹ 02, අර්නස්ට් ද සිල්වා මාවතෙන් රුපියල් 7,13,99,000ක මුදලක් වැයකර ඉඩමක් මිලදී ගැනීම, කඩවත ප්රදේශයෙන් රුපියල් 1,39,99,000ක මුදලක් වැයකර ඉඩමක් මිලදී ගැනීම, සිය පුත්රයා වන මාලක සිල්වා නමට රුපියල් 3,23,75,000ක මුදලක් වැයකර මර්සිඩීස් බෙන්ස් කාර් රථයක් මිලදී ගැනීම, රුපියල් ලක්ෂ 55කට අධික මුදලක් වැයකර හයිහුන්ඩායි මෝටර් රථයක් මිලදී ගැනීම, රුපියල් ලක්ෂ 89කට ආසන්න මුදලක් වැයකර ඩිෆෙන්ඩර් මෝටර් රථයක් මිලදී ගැනීම සම්බන්ධයෙන් විත්තිකාර මර්වින් සිල්වා මහතාට එරෙහිව මෙලෙස නඩු පවරා ඇත.
හිටපු ඇමැති සරණ ද අසරණ වෙන්නට ඉඩකඩ තිබේ. ක්රිෂ් නඩුවත් තාම අවසන් නැත. චාමර සම්පත්ට ද නැවත නැවත චෝදනා එල්ල වෙයි. මේ නම් ගම්වලට අමතරව තව නම්ගම් තිබිය යුතු බව අපේ හැඟීමයි. යාළුකම් හිතවත්කම් අදාළ නැත. අල්ලනවා නම් ඇල්ලිය යුතුය. රිදෙන්නම ඇල්ලිය යුතුය. හොරු නම් හොරුය. මෙච්චර කල් ආණ්ඩු ආවේ කයිවාරු ගහගෙනය. ඒත් අන්තිමට උන්දැලා හොරු සමග හෙලුවෙන් හිටියා මිස අල්ලපු හොරෙක් නැත. දේශපාලන කෝන්තර මත හිරේ දැමීමත් හොරු ඇල්ලීමත් දෙකකි. මේ කරන එකට දේශපාලන කෝන්තරයක් බව කියන්නට අපිට හිතෙන්නේ නැත. ඉඳහිට එහෙම ඒවාත් නොවෙනවාම නොකියනා මුත්
බලලා මැටියෙන් වුව මීයෝ අල්ලනවා නම් මරු බව කියා නිමා කරමි. මේ ආණ්ඩුවට කලින් මේ නඩුව පැවරුවා නම් ඒ ආණ්ඩුවටත් ඊට සහාය දුන් සියලු රාජ්ය සේවකයන්ටත් අනේක වරක් ස්තුතියි.
ජීවන පහන් තිළිණ
