සම්බන්ධන් කල් තියාම ජිනීවාවලදී ලංකාවට උගුලක් අටවයි! සියලු සාමාජික රටවල්වලට ලියුමක් යවයි!

ශ්‍රී ලංකාව පසුගිය වසර 12 තුළ පශ්චාත් යුද සමයේ ගැටලුවලට විසඳුම් සෙවීමට කිසිදු අර්ථවත් පියවරක් ගෙන නොමැති බව දෙමළ ජාතික සන්ධානයේ නායක ආර්.සම්බන්ධන් මහතා විසින් එක්සත් ජාතීන්ගේ මානව හිමිකම් කවුන්සිලයේ සාමාජික රටවල දූත මණ්ඩල ප්‍රධානීන්ට ලිඛිතව දැනුුුම් දී ඇත.

එක්සත් ජාතීන්ගේ මානව හිමිකම් කවුන්සිලයේ සැසිවාරයට මුහුණ දීම සඳහා ශ්‍රී ලංකාව සූදානම් වන අතරතුර සම්බන්ධන් මහතා විසින් මෙම ලිපිය යවා තිබීම විශේෂත්වයකි.

“2009 මැයි මාසයේදී ශ්‍රී ලංකාවේ සන්නද්ධ ජනවාර්ගික ගැටුම අවසන් වී සතියක් ඇතුළත, එනම් 2009 මැයි 23 දින එක්සත් ජාතීන්ගේ මහලේකම්වරයාගේ ශ්‍රී ලංකා සංචාරය අවසානයේ ශ්‍රී ලංකා රජය සහ එක්සත් ජාතීන්ගේ ඒකාබද්ධ නිවේදනයක් නිකුත් කරන ලදී. එහිදී ජාත්‍යන්තර මානව හිමිකම් ප්‍රමිතීන්ට සහ ශ්‍රී ලංකාවේ ජාත්‍යන්තර බැඳීම්වලට අනුකූලව මානව හිමිකම් ප්‍රවර්ධනය සහ ආරක්ෂා කිරීම සඳහා ශ්‍රී ලංකාව සිය ප්‍රබලතම කැපවීම යළි අවධාරණය කළේය. ජාත්‍යන්තර මානුෂීය සහ මානව හිමිකම් නීතිය උල්ලංඝනය කිරීම් සම්බන්ධයෙන් වගවීමේ ක්‍රියාවලියක වැදගත්කම මහලේකම්වරයා අවධාරණය කළේය. එම දුක්ගැනවිලිවලට විසඳුම් ලබාදීමට රජය පියවර ගන්නා බවට පොරොන්දු වුණා” යනුවෙන් සම්බන්ධන් එම ලිපියේ සඳහන් කර ඇත.

ශ්‍රී ලංකා රජය වගවීමේ ප්‍රශ්නයට ආමන්ත්‍රණය නොකිරීමට අමතරව, හමුදාකරණය, දේශපාලන සිරකරුවන් දින නියමයක් නොමැතිව රඳවා තබා ගැනීම ඇතුළු සිවිල් සමාජ සහ මාධ්‍යවේදීන් සහ පවුලේ අය අලුතින් අත්අඩංගුවට ගැනීම් ඇතුළු ශ්‍රී ලාංකික දෙමළ ජනතාව පීඩාවට පත් කිරීමේ ක්‍රියාකාරකම් අඛණ්ඩව ක්‍රියාත්මක කරමින් සිටින බවද ඔහු පැහැදිලි කර ඇත. එල්ටීටිඊ සාමාජිකයින් සහ අනෙකුත් අය ඔවුන්ගේ මියගිය ඥාතීන් අනුස්මරණය කිරීම, විවිධ රජයේ දෙපාර්තමේන්තු වල ක්‍රියාකලාපය, සම්ප්‍රදායික සාමූහික ඉඩම් අයිතිය සහ ගව තණබිම් අයිතීන් ප්‍රතික්ෂේප කිරීම සහ දේශපාලන සහ සිවිල් සමාජ ක්‍රියාකාරීන්ගේ නිරීක්ෂණ තීව්‍ර කිරීම හරහා අවතැන් වූ දෙමළ ජනයාට ඔවුන්ගේ ඉඩම්වල නැවත පදිංචි වීමට බාධා පමුණුවා ඇති බවද මෙම ලිපියෙන් සම්බන්ධන් මහතා තොරතුරු අනාවරණය කොට තිබේ.

සම්බන්ධන්ට අනුව දෙමළ ජනතාව මුහුණ දෙන බරපතළම අනතුර වන්නේ දෙමළ ජනතාව ඔවුන්ගේ පාරම්පරික ඉඩම්වලින් පලවා හැරීමට අමතරව පුරාවිද්‍යා ගවේෂණ, වනජීවී ආරක්‍ෂාව, රක්ෂිත වනාන්තර ආරක්‍ෂා කිරීමේ මුවාවෙන් සිදුවන ඉඩම් මංකොල්ලකෑමේ ප්‍රශ්නයයි.

“එක්සත් ජාතීන්ගේ මානව හිමිකම් කවුන්සිලය 2022 පෙබරවාරි සහ මාර්තු මාසවලදී රැස්වන බැවින් අංක 46/1 යෝජනාවට අදාළව ශ්‍රී ලංකා රජයේ කැපවීම් පිළිබඳ ක්‍රියාකාරීත්වය ඇගයීමට ලක් කරන බැවින්, චෝදනා විමර්ශනය කිරීමේ වගකීමෙන් ශ්‍රී ලංකාව අසමත් වී ඇති බව පැහැදිලිව ප්‍රකාශ කරන ලෙස අපි සාමාජික රටවලින් ඉල්ලා සිටිමු.’ යනුවෙන්ද සම්බන්ධන් සිය ලිපියෙන් අවධාරණය කොට ඇත.