අද රටේ බොරුව රජකරන යුගයක් ඇති බවත් බොරුවෙන් මැතිවරණ දිනා බොරුවෙන් ජනතාව රවටා බොරුවෙන් රජවූ යුගයක් ඇති බවත් ජනාධිපතිවරණයේ සහ මහමැතිවරණයේ දී බොරු පොරොන්දුවලට ප්රකාශවලට රැවටුණු රටේ ජනතාව 3 වැනි වතාවටත් රැවටෙනවාද කියා තේරුම් ගත යුතු බවත් විපක්ෂ නායක සජිත් ප්රේමදාස මහතා පැවසීය.Sri Lanka Latest News
විපක්ෂ නායක සජිත් ප්රේමදාස මහතා මේ බව කියා සිටියේ ඉදිරි පළාත් පාලන මැතිවරණය වෙනුවෙන් කුරුණැගල දිස්ත්රික්කයේ පොල්ගහවෙළ ප්රදේශයේ පැවැති ජන හමුවක් අමතමිනි.
රාජ්ය සේවක වැටුප රු. 20000ක් වැඩි කරනවා සේම මාස 6න් 6ට වැටුප් වැඩි කරනවා යැයි පැවසූ බවත් 33%කින් විදුලි බිල අඩු කිරීම, තෙල් මිල අඩු කිරිම, රැකියා විරහිත උපාධිධාරීන්ට රැකියා ලබා දීම ආදිය සිදු කරන බව පැවසුවත් ඒ කිසිවක් නොවු බවත් මේ වන විට ගොවියාට පොහොර සහනාධාරය මෙන්ම කලට වේලාවට පොහොර නොලැබීමත් ලැබෙන පොහොර පවා ගුණාත්මකභාවයෙන් අඩු වීම යන ගැටලු මෙන්ම වගා හානි ගංවතුර හානි මුදල් පවා නොලැබෙන බවත් විපක්ෂ නායකවරයා පෙන්වා දුන්නේය.
අද ඇති ජීවන බර සමග ජනතාවට ජිවත් විය නොහැකි බවත් හාල් පොල් කිරිපිටි මිල අධික බවත් රටේ ජනතාවගේ ලුණු අවශ්යතාවවත් සපුරා ගත නොහැකි රජයක් රටේ ඇති බවත් රජයේ මැති ඇමතිවරු දිගින් දිගටම කියන්නේ බොරුව බවත් ජනාධිපතිවරයා ප්රමුඛ ආණ්ඩුව හිතාගෙන ඇත්තේ බොරුවෙන් රට පාලනය කර ජනතාව හැමදාම අන්දවා මංමුලා කළ හැකි යන්න බවත් එම නිසා මෙවර පළාත් පාලන මැතිවරණයේ දී ජනතාව මේ බොරුව අවසන් කර පරාජය කළ යුතු බවත් විපක්ෂ නායක සජිත් ප්රේමදාස මහතා පැවසීය.
පසුගිය දින කිහිපයේ බොරු කියා හෙම්බත් වූ රජය සහ ආණ්ඩුව අවසන් තුරුම්පුව ලෙස මාලිමාවේ බලය නොමැති පළාත් පාලන ආයතනවලට මුදල් ප්රතිපාදන ලබා නොදෙන බවට ප්රසිද්ධියේ ජනාධිපතිවරයා ප්රකාශ කල බවත් එය මැතිවරණ නීති උල්ලංඝනය කිරිමක් බවත් ජනාධිපතිවරයා ජනතා විමුක්ති පෙරමුණින් පත් වුවත් ඔහු ලක්ෂ 220ම නායකයා බවත් එම නිසා ඔහුට එසේ කතා කිරීමේ අයිතියක් නොමැති බවත් විපක්ෂ නායකවරයා පෙන්වා දුන්නේය.
