සමගි ජන බලවේග ප්රධාන කාර්යාලයේ පැවැති මාධ්ය හමුවට සහභාගි වූ පාර්ලිමේන්තු මන්ත්රී එස්.එම් මරික්කාර් මහතා මෙසේ ද පැවැසීය,Sri Lanka Latest News
‘‘ජාතික ජනබලවේග රජය තවමත් විගණකාධිපතිවරයෙකු පත් කරන්න අපොහොසත් වී තිබෙනවා. කෙසේ නමුත් විගණකාධිපතිධුරය සඳහා ජනාධිපතිවරයා පුද්ගලයෙකුගේ නමක් යෝජනා කළ යුතුයි. ඒ අනුව ජනාධිපතිවරයා විගණකාධිපතිධුරය සඳහා ඔහුට හිතවත් පුද්ගලයන් දෙදෙනෙකුගේ නම් යෝජනා කර තිබුණා. ඒ පුද්ගලයින් දෙදෙනාගේම නම් ව්යවස්ථාදායක සභාව ප්රතික්ෂේප කරන්න කටයුතු කරනු ලැබුවා. කෙසේ නමුත් විගණකාධිපතිවරයෙක් පත් නොකර මේ වනවිට මාස 8 ක පමණ කාලයක් ගතවී තිබෙනවා. ඒ වගේම වැඩබලන විගණකාධිපතිවරයා මෙම තනතුරට සුදුසු නැතිනම් ඔහු සුදුසු නැති හේතුව රජය ප්රකාශ කරන්නෙත් නැහැ.
කෙසේ නමුත් ජනවාරි මාසයෙන් පසු ව්යවස්ථාදායක සභාවේ සිටින සිවිල් සංවිධාන නියෝජනය කරන පුද්ගලයින් තිදෙනා 2026 දී අලුතින් පත් කළ යුතුයි. මෙම පුද්ගලයින් තිදෙනා පත් කළ යුත්තේ අගමැතිවරයාගේ සහ විපක්ෂ නායකවරයාගේ එකඟතාවයකින්. ඒ අනුව අගමැතිවරියගේ බලතල ප්රකාරව විපක්ෂනායකවරයාව මෙල්ල කරලා ආණ්ඩුවට හිතවත් තිදෙනෙකු පත් කර ගන්න ආණ්ඩුව දැඩි උත්සාහයක නිරත වෙනවා. ඒ අනුව ආණ්ඩුවට හිතවත් පුද්ගලයෙකු විගණකාධිපති ලෙස පත් කරන්න ආණ්ඩුව සුදානම් වෙනවා.
එසේ සිදුකරන්න ආණ්ඩුව කටයුතු කරන්නේ ආණ්ඩුවේ ඇමැතිවරු යටතේ තිබෙන සංස්ථා , දෙපාර්තමේන්තු ඇතුළු ආයතන සියල්ලම විගණනය වන්නේ 2026 ජනවාරි 1 වැනිදායින් පසුවයි. ඒ වගේම රතු නිවේදන නිකුත් කර තිබියදී රට තුළට ගෙන ආ බහලුම් සිද්ධිය , ක්ලින් ශ්රී ලංකා ව්යාපෘතිය යොදවපු මුදල් වියදම් වූ ආකාරය පිළිබඳව , විදේශ රටවලින් ලැබෙන ආධාර පිළිබඳව විගණනය වන්නේ 2026 ජනවාරි 1 වැනිදායින් පසුවයි. ඒ අනුව ආණ්ඩුව ඔවුන්ට හිතවත් පුද්ගලයෙකු විගණකාධිපතිලෙස පත්කරන්නයි මේ උත්සහ දරන්නේ. ජාතික ජනබලවේගයේ පිරිස තුළින් සිදුවන වංචා දූෂණය නාස්තිය නොහැකියාව හෙළවීම නවත්වන්නයි ආණ්ඩුව උත්සහ දරන්නේ. ඒ වගේම මීට පෙර සිටි කිසිදු රාජ්ය නායකයෙක් විගණකාධිපතිවරයා පත් කිරීමේදී මෙලෙස හැසිරිලා නැහැ. ඒ අනුව විගණකාධිපතිධුරයට ආණ්ඩුවට හිතවත් පුද්ගලයෙකු පත් නොකර , සුදුසුකම් සහිත , උගත් බුද්ධිමත් පුද්ගලයන් තිදෙනෙක් පත් කිරීමට අගමැතිවරියට සහ විපක්ෂ නායකවරයාට විශේෂ යුතුකමක් තිබෙනවා. ඒ වගේම විගණකාධිපතිධුරය තිබෙන්නේ ජනාධිපතිවරයාගේ බල තුලනය සඳහායි. ඒ අනුව ව්යවස්ථාදයක සභාවට ආණ්ඩුවේ හිතවත් පිරිස් පත් කළ පසු ආණ්ඩුවේ සියලුම දුෂණ වංචා යටපත් කිරීමට හැකියාවක් තිබෙනවා.
ඒ වගේම ආණ්ඩුව තුළ වංචා දුෂණ සිදුවන්නේ නැතිනම් , අකාර්යක්ෂමතාවයක් නැතිනම් විගණනය හරියාකාරව සිදුකිරීමට සුදුසුකම් සහිත පුද්ගලයෙකුගේ නමක් විගණකාධිපතිවරය සඳහා යෝජනා කරන්නැයි සමගි ජනබලවේගය ආණ්ඩුවෙන් ඉල්ලා සිටිනවා. ඒ වගේම වර්තමාන ව්යවස්ථාදායක සභාව නිසියාකාරව කටයුතු කරද්දි ආණ්ඩුවට අවශ්ය පුද්ගලයන් තනතුරුවලට පත් කරගැනීමට ආණ්ඩුවට නොහැකිවී තිබෙනවා. ඒ නිසා ව්යවස්ථාදායක සභාවේ පිරිස වෙනස් වනතුරු මෙම කටයුත්ත ඇදගෙන යාමට ආණ්ඩුව කටයුතු කරනු ලබනවා. ඒ වගේම මෙවැනි කටයුතු වලින් ආණ්ඩුවේ වංචා දුෂණ හෙළි වෙනවා. ඒවා නවත්වන්න ආණ්ඩුව හැකියාවක් නැහැ. ආණ්ඩුවේ නිරුවත දිනෙන් දින හෙළිවන බව ආණ්ඩුව තේරුම්ගත යුතුයි.
ඒ වගේම මාධ්ය මර්දනය කරන්නත් ආණ්ඩුව දැන් උත්සහ කරනවා. කෙසේ නමුත් ලංකාවේ මාධ්ය ආයතන සම්බන්ධයෙන් , මාධ්යවේදීන් සම්බන්ධයෙන් විපක්ෂයටත් විවේඡන තිබෙනවා. නමුත් මාධ්යයට පෑන , කැමරාව හැසිරවීමට තිබෙන අයිතිය නැති නොකළ යුතුයි. මාධ්ය ආයතන විසින් පෞද්ගලික මඩ ප්රහාර අවලාද ගෙන යනවානම් ඒ සඳහා නීතිමය ක්රියාමාර්ග ගැනීමට ඕනෑතරම් ක්රම තිබෙනවා. ඒ වගේම මාධ්ය ආයතනයක් වැරද්දක් සිදුකරනවානම් විදුලි සංදේශන නියාමන කොමිසන් සභාවට පැමිණිලි කරලා වැඩක් වෙන්නේ නැහැ. මාධ්ය ආයතනයක් වැරද්දක් සිදුකරනවානම් ඒ සම්බන්ධයෙන් පැමිණිලි කළ යුත්තේ ජනමාධ්ය අමාත්යාංශයට. කෙසේ නමුත් ආණ්ඩුව ඒ පිළිබඳවත් නිසි අවබෝධයක් නැහැ. ඒ වගේම මාධ්ය ආයතවලට අනිසි බලපෑම් කරන්න ආණ්ඩුවට හැකියාවක් නැහැ. ආණ්ඩුවට හිතවත් මාධ්ය ආයතනවලට බලපෑම් නොකර ඔවුන්ව රැක ගන්න ආණ්ඩුව උත්සහ දරනවා. ඒ වගේම ආණ්ඩුවට හිතවත් මාධ්ය පමණක් තබාගෙන ආණ්ඩුව විවේඡනය කරන ආණ්ඩුවේ වැරදි අඩුපාඩු පෙන්වා දෙන මාධ්ය ආයතන වහන්ද ආණ්ඩුව මේ උත්සහ දරන්නේ. ඒ නිසා මාධ්ය තහනම් කරන්න හිතන්නවත් එපා කියලා ආණ්ඩුවට මතක් කර දිය යුතුයි. එහෙම වුණොත් ආණ්ඩුවේ ගමන් ගම කෙටි වෙයි. ඒ වගේම ආණ්ඩුව මාධ්ය ආයතනවලට අසිනි බලපෑම් එල්ල කළහොත් ඊට විරුද්ධව ජනතාව පෙළගස්වන්න සමගි ජනබලවේගය කටයුතු කරනු ලබනවා. කිසිදු මාධ්ය ආයතනයක් තහනම් කරන්න ආණ්ඩුව කිසිදු අයිතියක් නැහැ. යම් කිසි මාධ්ය ආයතනයක් වරදක් සිදුකරනවාම් ඊට විරුද්ධව නඩු පවරන්න ආණ්ඩුවට හැකියාව තිබෙනවා.
ඒ වගේම රටට බලපෑ ව්යසන තත්ත්වය පහව ගොස් මාසයක පමණ කාලයක් ගතවෙනවා. ඒ අනුව ආපදාවෙන් විපත පත් ජනතාවට පළමු වටයේදී රුපියල් 25,000 ක් ලබාදෙන බව රජය ප්රකාශ කළා. නමුත් තවමත් ඒ මුදල් විශාල පිරිසකට ලැබිලා නැහැ. ඒ වගේම නිවාස සුද්ද පවිත්රකොට ජනතාවට පදිංචියට ගියාට පසු රුපියල් 50,000 ක් ලබාදෙන බව රජය ප්රකාශ කළා. ඒ මුදලත් තවම ජනතාවට ලැබිලා නැහැ. මේ කටයුත්තවත් හරියාකාරව ආණ්ඩුවට කර ගැනීමට නොහැකි වී තිබෙනවා. ඒ වගේම නීතිගරුක යුත්තිගරුව රටක් බිහි කරන බව ජාතික ජනබලවේගය බලය ලබාගැනීමට පෙර ප්රකාශ කළා. නමුත් වර්තමාන ජාතික ජනබලවේග ආණ්ඩුවෙත් මර්වින් සිල්වා , ලොහාන් රත්වත්තේ වැනි පුද්ගලයන් සිටින බව උප්පු කරලා තිබෙනවා. ඉදිරියේදී තිස්ස කුට්ටිආරච්චි වැනි පුද්ගලයන්ද ආණ්ඩුව තුළින් බලාගන්න පුලුවන්.‘‘
