මහා භාණ්ඩාගාරයේ විදෙස් සම්පත් ඒකකයේ සේවය නියුතුව සිටියදී මියගොස් සිටි රංග නිශාන්තගේ මරණය තමන් විසින්ම කැපුම් තුවාල සිදු කරගත් නිසා සිදුවූ මරණයක් බවට සිව් පුද්ගල කමිටුව ඒකමතිකව තීන්දු කළ බැව අධිකරණ වෛද්ය නිලධාරී කමිටු සභාපති විශේෂඥ අධිකරණ වෛද්ය ඉලංගරත්න බණ්ඩා කුලියාපිටිය මහේස්ත්රාත් මිහිල් චිරන්තන සතරසිංහ ඉදිරියේ සාක්ෂි ලබාදෙමින් පැවසුවා.Sri Lanka Latest News
ඉකුත් නඩුවාරයේදී මරණකරුගේ බිරිඳ, දියණිය ඇතුළු පිරිසකගේ සාක්ෂි ලබාගැනීම සිදුවූ අතර, අද (03) දිනයේ අධිකරණ වෛද්ය නිළධාරී ඉලංගරත්න බණ්ඩා, මූලස්ථාන ප්රධාන පොලිස් පරීක්ෂක කමල් රත්නායක, නිල සුනක්ඛයා මෙහෙයවූ සැරයන් ඇතුළු විමර්ශකයින් විමර්ශකයින්ගෙන් සාක්ෂි ලබා ගැනීම සිදු කළා.
මෙහිදී අධිකරණ වෛද්ය නිළධාරී ඉලංගරත්න බණ්ඩා සාක්ෂි ලබා දුන් අතර සාක්ෂි මෙහෙයවූයේ වයඹ පළාත භාරයේ ජ්යෙෂ්ඨ නියෝජ්ය පොලිස්පති නීතිඥ අජිත් රෝහණ නිලධාරියායි.
මරණකරුගේ ශරීරයේ තිබූ කැපුම් තුවාල සහ බල නහර පිළිබඳව වෛද්ය විද්යානුකූල පසුබිම සම්බන්ධයෙන් කරුණු ඉදිරිපත් කරන ලෙසට පැමිණිල්ල වෙනුවෙන් අධිකරණයේ සාක්ෂි මෙහෙයවූ ජ්යෙෂ්ඨ නියෝජ්ය පොලිස්පතිවරයා අධිකරණ වෛද්ය නිලධාරිවරයාගෙන් ඉල්ලා සිටියා.
බල නහර ලෙස බටහිර වෛද්ය විද්යාවේ හැඳින්වෙන ශරීරාංගයක් නොවන බවත් ඒ පිළිබඳව ආයුර්වේද වෛද්ය මහාචාර්යවරුන් හා සමගද සාකච්ඡා කළ බවත් සාක්ෂිකරු මෙහිදී අධිකරණයට කරුණු ඉදිරිපත් කළා.
මෙම මෘත දේහය ඉතා සියුම් ආකාරයෙන් විච්ඡේදනය කරමින් පරීක්ෂණ පැවැත්වූ විශේෂඥ වෛද්යවරුන් සිව් දෙනාම මෙය තමන් විසින්ම කපාගෙන සිදුවූ තුවාල බවත් ඉන් රුධිර වහනය වීමේදී ඇතිවූ කම්පනය හේතුවෙන් සිදුවූ මරණයක් බවත් තීරණය කළ බව සාක්ෂිකරු අධිකරණයේ දී දැනුම් දුන්නා.
සාක්ෂි විභාගය මැදදී මරණකරුගේ ඇඳුම්, සෙරෙප්පු හා පිහිය ද වෛද්යවරයා විසින් හඳුනාගත් අතර තුවාල වූ ස්ථානවල ඡායාරූප අධිකරණය බාරයට පත් කළා.
මෙම සිද්ධියට අදාල රසපරීක්ෂක වාර්තා ද ලැබුණු පසු එහි ස්ථාවරය ද සලකා අපරාධ නඩු විධිවිධාන සංග්රහයේ 30 වගන්තිය ප්රකාරව නියෝගයක් ලබාදෙන ලෙස එහිදී ජ්යේෂ්ඨ නියෝජ්ය පොලිස්පති නීතිඥ අජිත් රෝහණ අධිකරණයෙන් ඉල්ලා සිටියා.
කරුණු සැලකිල්ලටගත් අධිකරණය නඩුව යළි 12 දින කැඳවීමට නියම කළා.
