ආගමික ආයතනවලට සහන ලබා දීමේදී ලංකා විදුලි බල මණ්ඩලය තම නියෝගවලට අනුකූල නොවන්නේ නම් නීතිමය ක්රියාමාර්ග ගැනීමට සූදානම් බව මහජන උපයෝගිතා කොමිෂන් සභාව විසින් විදුලි බල මණ්ඩලයට දැනුම් දීමක් කොට ඇත.
එහි තෙවැනි සහ අවසන් සිහි කැඳවීම ඊයේ (16) ලංකා විදුලිබල මණ්ඩලයට (ලංවිම) යවා ඇති අතර හෙට (18) බලාත්මක කිරීමේ නියෝගයක් නිකුත් කිරීමට බොහෝ දුරට ඉඩ ඇති බව වාර්තා වේ.
එම කොමිසමේ සභාපති ජනක රත්නායක අදහස් දක්වමින් කියා සිටියේ ඒකක 180කට වැඩි ප්රමාණයක් පරිභෝජනය කරන ආගමික ආයතන “සාමාන්ය අරමුණ” වර්ගීකරණයට ගෙන ඒම සඳහා මේ වන විටත් විදුලිබල මණ්ඩලයට සිහි කැඳවීම් දෙකක් යවා ඇති අතර එහිදී ගාස්තු ඒකකයකට රුපියල් 32 කි.
“විදුලිය බෙදාහැරීමේ බලපත්රලාභීන්ට අපගේ උපදෙස් පිළිපදින ලෙසත් ආගමික ආයතන මෙම කාණ්ඩයට ඇතුළත් කරන ලෙසත් අපි උපදෙස් දුන්නා. ලංකා විදුලි සමාගම (පුද්ගලික) සමාගම පමණක් අපගේ නියෝග පිළිපැද්දා. අද වන විටත් ලංවිම එසේ කර නෑ. අපි දැනටමත් ඔවුන්ට මතක් කිරීම් දෙකක් යවා තියෙනවා. අපි ඔවුන්ට අද අවසන් මතක් කිරීම ලබා දුන්නා. අපි ඔවුන්ට බලාත්මක කිරීමේ නියෝගයක් නිකුත් කරනවා. එය බොහෝ විට හෙට (18) නිකුත් කරාවි. අපි ඔවුන්ට ලබා දුන් තීරණය ක්රියාත්මක කරන ලෙස ඔවුන්ගෙන් ඉල්ලා සිටිනවා. එහෙම නොකළොත් නීතිමය ක්රියාමාර්ග ගැනීමට අපි සලකා බලනවා’ යැයි හෙතෙම කීය.