එක්සත් රාජධානියේ සිටින ශ්රී ලාංකික ඩයස්පෝරාව සමග අවබෝධයෙන් කටයුතු කිරීමට ඇති කැමැත්ත ප්රකාශ කර ඇති ජනාධිපතිවරයා ඒ සඳහා ඩයස්පෝරාව සමග සාකච්ඡා කිරීමට අවස්ථාව සලසන ලෙස තාරික් අහමඩ් සාමිවරයාගෙන් ඉල්ලීමක් කර ඇත.
අමාත්ය තාරික් අහමඩ් සාමිවරයා අද (20) පෙරවරුවේ ජනාධිපති කාර්යාලයේදී ජනාධිපති ගෝඨාභය රාජපක්ෂ මහතා හමුවූ අවස්ථාවේදී ඒ බව පවසා තිබේ.
දකුණු ආසියාව, එක්සත් ජාතීන්ගේ සංවිධානය සහ එක්සත් රාජධානියේ පොදු රාජ්ය මණ්ඩලය පිළිබඳ රාජ්ය අමාත්යවරයා ලෙස ඉන්දියානු සාගර කලාපය, මධ්යම ආසියාව, පොදු රාජ්ය මණ්ඩලය සමග සහයෝගීතාව ඇති කිරීම සඳහා ක්ෂේත්ර රැසක වගකීම් පැවරී ඇත්තේ තාරික් අහමඩ් සාමිවරයාට ය.
ශ්රී ලංකාවේ ආයෝජනයට පහසුකම් සැපයීමෙන් ආයෝජකයන් ආකර්ෂණය කරගත හැකි බව පෙන්වා දුන් සාමිවරයා එක්සත් රාජධානියේ පදිංචිව සිටින විවිධ ජාතීන්ට අයත් ජන කොටස් ශ්රී ලංකාවේ නව ආයෝජන සඳහා අපේක්ෂාවෙන් සිටින බවද පවසා තිබේ.
මේ අතර ශ්රී ලංකාවේ සෞඛ්ය සේවිකාවන් සඳහා එක්සත් රාජධානියේ රැකියා අවස්ථා ලබාදීමේ ගිවිසුමකට අත්සන් තබා තිබේ. ආර්ථික ක්ෂේත්රයේ සහයෝගීතාව වර්ධනයට ඇති හැකියාව සොයා බැලීමට ද සාමිවරයා පොරොන්දු වී ඇත.
ශ්රී ලංකාව මුහුණ දී ඇති සියලු ගැටලු විසඳමින් එක ජන කොටසක් ලෙස ජීවත්වීමට හැකි පරිසරය උදා කිරීම රජයේ අරමුණ බවද මෙම සාකච්ඡාවේදී පෙන්වා දී තිබේ..
ශ්රී ලංකාවේ බ්රිතාන්ය මහ කොමසාරිස් සාරා හල්ටන් පළමු ලේකම් මැතිව් ඩීත්, තාරික් අහමඩ් සාමිවරයාගේ සහකාර ඉසබෙල් ස්කොට්, විදේශ අමාත්ය මහාචාර්ය ජී.එල්. පීරිස්, ජනාධිපති ලේකම් ගාමිණී සෙනරත්, ජනාධිපති ප්රධාන උපදේශක ලලිත් වීරතුංග සහ විදේශ ලේකම් අද්මිරාල් මහාචාර්ය ජයනාත් කොළඹගේ යන මහත්ම මහත්මීන් මෙම අවස්ථාවට එක්වී තිබුණි.
එක්සත් රාජධානියා සහ ශ්රී ලංකාව අතර තානාපති සබඳතාවලට 2023 දී වසර 75ක් සපිරේ. ඒ වෙනුවෙන් සැමරුම් උළෙලක් පැවැත්වීමට සැලසුම් කර ඇත.
