මේ වන විට රටේ පැත්තක් ගංවතුරින් ආපදාවට ලක්ව ඇති බවත් නායකයෝ ප්රවෘත්ති හරහා උපදෙස් ලබා දෙමින් සිටියත් ආපදාවලදී කටයුතු කිරිමට නිකුත් කර ඇති චක්රලේඛය අනුව පිසූ ආහාර සඳහා දිනකට තනි පුද්ගලයකුට ලබා දෙන්නේ රු. 450ක් බවත් වියළි සලාක ලබා ගැනීමට තනි පුද්ගලයකුට සතියකට රු.1350ක් පමණක් ලබා දෙන බවත් දින 7ක් රු.1350කින් මේ පුද්ගලයා වේල් 21ක් පිරිමසා ගත යුතු බවත් සාමාජිකයන් 2ක් සිටින පවුලකට සතියකට රු.1800ක් ලබා දෙන බවත් විපක්ෂ නායකවරයා පැවසීය.Sri Lanka Latest News
සාමාජිකයන් 4ක් සිටින පවුලකට සතියකට රු.2400ක්, සාමාජිකයන් 5ක් සිටින පවුලකට සතියකට රු. 2700ක් ලබා දෙන බවත් සාමාජිකයන් 2ක් සිටින පවුලක එක් අයකුට ලැබෙන්නේ රුපියල් 800ක් වන විට සාමාජිකයන් 5 දෙනෙක් ඉන්න පවුලක එක් අයකුට සතියකට ලැබෙන්නේ රු. 540ක් බවත් මොවුන් මාධ්ය ඉදිරියේ රංගනයේ නියැලුනත් මෙම චක්රලේඛය පවා නිකුත් කර ඇත්තේ 2022.5.16 වැනිදා බවත් මේ වන තුරු එය යාවත්කාලීන කරන්න ජනාධිපතිට හෝ රජයට නොහැකි වී ඇති බවත් විපක්ෂ නායකවරයා පැවසීය.
විපක්ෂ නායක සජිත් ප්රේමදාස මහතා මේ බව කියා සිටියේ (ජුනි 4) මහරගම කොට්ටාව ආනන්ද මහා විද්යාලයට සක්වල සුහුරු පන්ති කාමර වැඩසටහනේ 221 වැනි අදියර යටතේ රුපියල් 1,177,000 වටිනා සුහුරු පන්ති කාමරයක් පරිත්යාග කිරීමේ අවස්ථාවට එක්වෙමිනි. මෙහි දී පාසල් සංවර්ධන අරමුදලට රුපියල් ලක්ෂයක මුදලක් ද පරිත්යාග කළේය. උසස්පෙළ විභාගය ඉහළින් සමත් වූ වේනුක තිවර්ෂණට සහ සතිල රෙහාන් පෙරේරා නම් නව නිර්මාණ සිදුකරන සිසුන් දෙදෙනාගේ ඉදිරි අධ්යාපන කටයුතු සඳහා රු. 25000 බැගින් පරිත්යාග කළේය.
මෙය රටට කරන බොරුවක් බවත් මෙය වෙනස් විය යුතු බවත් සමගි ජන බලවේගය මේ වන විට බලයේ සිටියා නම් මින් ඔබ්බට ගොස් ස්වාභාවික ව්යසනයන් වලදී නව තාක්ෂණය උපයෝගී කර ගෙන එය තරමක් දුරට හෝ වළක්වා ගැනීමට කටයුතු කරනා බවත් ලෝකයේ මේ වන විට එවැනි තාක්ෂණ පවතින බවත් විපක්ෂ නායක සජිත් ප්රේමදාස මහතා පැවසීය.
කෘතීම බුද්ධිය හරහා ආපදා කළමනාකරණය සත්ය වශයෙන්ම කළමානාකරණය කළ හැකි බවත් මේ ජනතාව රවට්ටන චක්රලේඛ, ඇස්බැන්දුම් චක්රලේඛ, ප්රවෘත්ති හරහා නිර්මාණය කරන බොරු රඟපෑම් ආදිය නතර කර ජනතාවගේ දුකට පිහිටවන වැඩසටහනක් නිර්මාණය කළ යුතු බවත් ඒ වෙනුවෙන් සමගි ජන බලවේගය කැපවෙන බවත් විපක්ෂ නායකවරයා පැවසීය.
කුහකයන්ගේ හඬට මේ වැඩසටහන් යටපත් වෙන්න දෙන්නේ නැහැ
බස් එකක් දෙනකොට බස් මෑන් කියා බනින බවත් පාසල්වලට යමක් නොමැති වෙන කොට ඒ අඩුව පුරවන්න දෙයක් දෙන එක වරැද්දක් වෙන්නේ කොහොමද කියා සිතා ගත නොහැකි බවත් අපේ රට අකාර්යක්ෂම රාජ්ය පාලනයෙන් මෙන්ම සමහර පුද්ගලයන්ගේ සිතුවිලි හා න්යායන් පවා බංකොලොත් වී ඇති බවත් එම නිසා බෙදන එක වැරදියි කියන කුහකයන්ගේ හඬට මේ වැඩසටහන් යටපත් කිරීමට ඉඩ නොදෙන බවත් විපක්ෂ නායකවරයා පැවසීය.
රටේ නායකයෝ දන්නෙත් නෑ රට ගොඩ ගන්න ආකාරය
අප රට මේ වන විට ඇ. ඩොලර් බිලියන 100ක දේශීය හා විදේශීය ණය බරකින් පෙළෙන බවත් මේ ණය බරතාවෙන් ගොඩ එන්න නම් අපනයන කේන්ද්රීය ආර්ථිකයක්, තොරතුරු තාක්ෂණ කේන්ද්රීය සංවර්ධන රටාවක් නිර්මාණය කළ යුතු බවත් නායකයෝ ඩිජිටල් ශ්රී ලංකාවක් ගොඩ ගන්නවා කිව්වට එය සිදු කරන ආකාරය මේ නායකයෝ නොදන්නා බවත් එහි දී තොරතුරු තාක්ෂණය ඉගැන්විය යුත්තේ 1-13 විෂයක් ලෙස ඉංග්රීසි භාෂාවෙන් බවත් මෙම විෂය අනිවාර්ය විෂයක් විය යුතු බවත් විපක්ෂ නායකවරයා පැවසීය.
සමගි ජන බලවේගය විසින් ක්රියාත්මක කරන හුස්ම වැඩසටහන යටතේ මේ වන විට රෝහල් 60කට රුපියල් ලක්ෂ 1832ක් වටිනා ඖෂධ සහ රෝහල් උපකරණත්, සක්වල බස් රථ වැඩසටහන යටතේ පාසල් 87 ක් සඳහා රුපියල් ලක්ෂ 50ක් වටිනා බස් රථ 87ක් ලබා දී ඇති අතර ඒ සඳහා රුපියල් ලක්ෂ 4242ක් ද සක්වල තොරතුරු තාක්ෂණ වැඩසටහන යටතේ පාසල් 221ක් සඳහා සුහුරු පන්ති කාමර උපකරණ ලබා දී ඇති අතර ඒ සඳහා රුපියල් ලක්ෂ 2467ක් වැය කර තිබේ.
