සංචරණ සීමා ඉවත් කිරීමෙන් පසු බණ්ඩාරනායක ප්රතිපත්තිය ඉදිරියට ගෙන යන ශ්රී ලංකා නිදහස් පක්ෂය හා සමාන නව පක්ෂයක් ගොඩ නගන බව පාර්ලිමේන්තු මන්ත්රී කුමාර වෙල්ගම මහතා පැවසුවේය.
මේ වන විටත් ඒ පිළිබද සාකච්ජා පැවැත්වෙමින් තිබෙන අතර එම සාකච්ජා සාර්ථක බවද මන්ත්රීවරයා පැවසීය.
හිටපු ජනාධිපතිනි චන්ද්රිකා කුමාරතුංග මහත්මියගේ උපන්දිනය වෙනුවෙන් ළමා නිවාසයකට දානය ලබා දීමේ වැඩසටහනින් අනතුරුව අද (29) කොළඹදී මාධ්ය වෙත අදහස් දක්වමින් ඔහු මේ බව සදහන් කළේය.
මේ සම්බන්ධයෙන් අප මව්රට පුවත්පත පසුගිය සතියේ රාජ්ය රහස් තීරය ඔස්සේ විශේෂ අනාවරණයක් කරමින් කියා සිටියේ හිටපු ජනාධිපතිනි චන්ද්රිකා බණ්ඩාරනායක මහත්මියගේ පුත් විමුක්ති කුමාරතුංග මෙරට දේශපාලනයට පිවිසීමට එකගතාව පළ කොට ඇති බවත්, ඉදිරි කාලය ඇතුළතදී ලංකාවට පැමිණීමට සැලසුම් කොට ඇති බවත්ය.
අප පළ කළ අනාවරණය මෙසේය.
විමුක්ති එන්න සූදානම්: එන පක්ෂය මොකද්ද?
එමෙන්ම පසුගිය අවස්ථා ගණනාවකදීම චන්ද්රිකාගේ පුත් විමුක්ති කුමාරතුංග ප්රසිද්ධ දේශපාලනයට එන බවට නිල නොවන ආරංචිද පැතිර ගොස් තිබිණි. ඒ සෑම අවස්ථාවකදීම චන්ද්රිකා එය ප්රතික්ෂේප කරමින් කියා සිටියේ විමුක්ති ලංකාවේ පවතින දේශපාලනයට නම් සම්බන්ධ නොවනු ඇතැයි කියාය. නමුත් මේ වන විට අපට දැනගන්නට ඇත්තේ විමුක්ති ලංකාවේ දේශපාලනය කිරීමට සිය කැමැත්ත ප්රකාශ කොට ඇති බවය. චන්ද්රිකාට ඒ බව දැනුම්දී ඇති විමුක්ති කොන්දේසි කිහිපයක්ද ඉදිරිපත් කර තිබේ. එහි පළමු කොන්දේසිය වී ඇත්තේ අලුත් පක්ෂ හදා දේශපාලනය පැමිණීමට ඔහුට නොහැකි බවකි. එම නිසා චන්ද්රිකාද සිටියේ සිය පිය උරුමය පවතින ශ්රීලනිපය හරහා විමුක්තිව දේශපාලනයට රැගෙන ඒමටය. නමුත් ශ්රිලනිපය තවමත් චන්ද්රිකාට ප්රතිචාර දක්වා නොතිබීම විමුක්තිගේ දේශපාලන ආගමනයට බාධාවක් වී ඇති බවක් දැනගන්නට තිබේ.
කෙසේ වෙතත් විපක්ෂ නායක සජිත් ප්රේමදාස මහතා සිය තනතුර භාරගැනීමෙන් පසු චන්ද්රිකා මුණගැසී කළ සාකච්ඡාවේදී විමුක්තිව දේශපාලනය රැගෙන එන ලෙස ඉල්ලීමක් කළේය. එහිදී සජිත් කියා තිබුණේ විමුක්ති කැමැති නම් සමගි ජන බලවේගය යටතේ දේශපාලනයට පිවිසිය හැකි යැයි කියාය. නමුත් ඊට චන්ද්රිකා ඒ අවස්ථාවේදී උත්තරයක් දී තිබුණේ නැත.
මෙවැනි සිදුවීම් මුල් කරගෙන පසුගිය කාලය පුරා චන්ද්රිකා කෙතරම් කලකිරීමෙන් සිටියාද කියනවා නම් රනිල්ගෙන් පැමිණි පණිවුඩ කිහිපයකට පවා ප්රතිචාර දැක්වීමට චන්ද්රිකා පියවර ගෙන නොතිබිණි. ඒ තරමටම රනිල්වත්, රනිල්ගේ දේශපාලනයත් චන්ද්රිකාට එපාවී තිබිණි. අවස්ථා කිහිපයකදීම රනිල් චන්ද්රිකාගේ දුරකතනය හා සම්බන්ධ වුවත් චන්ද්රිකා ඊට පිළිතුරු දීමට ගියේ නැත. එහි අවසන් ප්රතිපලය වූයේ කාටත් නොකියා චන්ද්රිකා ලන්ඩනය බලා පිටත්ව යෑමය. ටික කාලයකට චන්ද්රිකා නැවත ලංකාවට නොඑන බවද දැනගන්නට ඇත.
