පොදු ජන එක්සත් පෙරමුණේ මහනුවර දිස්ත්රික් කණ්ඩායම් නායකයාගේ හැසිරීම හා ක්රියා කලාපය පිළිබඳ මම අතිශයින් කනගාටු වෙනවා. උගත් බුද්ධිමත් පුද්ගලයෙක්ගෙන් කිසි දිනයක මේ ආකාරයේ හැසිරීමක් බලාපොරොත්තු වෙන්න බෑ යනුවෙන් මහනුවර දිස්ත්රික් පාර්ලිමේන්තු මන්ත්රී ගුණතිලක රාජපක්ෂ පවසයි. Sri Lanka Latest News
ජනාධිපති ලේකම් කාර්යාලයේ 03 දින රාත්රියේ පැවති ආණ්ඩු පක්ෂ මන්ත්රී කණ්ඩායම් රැස්වීමෙන් අනතුරුව නැවත පිටතට පැමිණෙන අවස්ථාවේදී ගුණතිලක රාජපක්ෂ හා මහින්දානන්ද අලුත්ගමගේ මන්ත්රීවරු අතර ඇතිවූ උණුසුම් වචන හුවමාරුවකින් අනතුරුව මහින්දානන්ද අලුත්ගමගේ මන්ත්රීවරයාගේ පහර කෑමකට ලක්ව ඇද වැටුනු බව කියන ගුණතිලක රාජපක්ෂ මන්ත්රීවරයාගේ පාදයක අස්ථි බිඳීමක් හේතුවෙන් ඒ මහතා නාරාහේන්පිට හමුදා රෝහලට ඇතුලත් කළ අතර ශල්යකර්මයකින් පසු දැඩි සත්කාර ඒකකයේ ප්රතිකාර ලද ඒ මහතා අද 05 දින පස්වරුව වන විට නැවතත් රෝහලේ සාමාන්ය වාට්ටුවකට මාරුකොට යවා ඇත.
පාදයේ දරුණු අස්ථි බිඳීමක් සඳහා ශල්යකර්මය සිදු කළ තමාට අවම වශයෙන් තව සතියක් පමණ කාලයක් රෝහල් ගතව ප්රතිකාර ලැබීමට සිදුවන බව ඒ මහතා සඳහන් කළේය.
තවදුරටත් අදහස් පළ කළ ගුණතිලක රාජපක්ෂ මන්ත්රීවරයා මෙසේද කීය.
මම මහනුවර දිස්ත්රික්කයේ වගේම යටිනුවර ප්රාදේශිය ලේකම් කාර්යාල බල ප්රදේශයේ සංවර්ධන කමිටු සභාපති ධූරයන් දැරුවා. යටිනුවර ප්රාදේශිය ලේකම් කොට්ඨාසයේ සංවර්ධන කමිටු සභාපති ධූරය තමාට ලබා දෙන ලෙස මහින්දානන්ද මන්ත්රීවරයා මාගෙන් කීප විටක්ම ඉල්ලීම් කළ නිසා ඒ තනතුර මා ඔහුට ලබාදීමට පියවර ගත්තේ මා විසින් ක්රියාත්මක කිරීමට සූදානම් කොට පැවැති සංවර්ධන කටයුතු ඒ ආකාරයෙන්ම සිදුකරගෙන යන බවට ලබා දුන් පොරොන්දුව මතයි. පසුගිය 30 වෙනිදා මා එම සංවර්ධන කමිටු සභාපති ධූරයෙන් ඉවත් වූ පසු මහින්දානන්ද මන්ත්රීවරයා එම ධූරයේ වැඩ භාරගෙන මා විසින් ආරම්භ කිරීමට සූදානම් කොට පැවැති රුපියල් මිලියන 55 ක සංවර්ධන ව්යාපෘති නවතා දමා වෙනත් ව්යාපෘති ආරම්භ කිරීමට පියවර ගෙන තිබුණා. මා මේ පිළිබඳව ප්රශ්න කිරීම හේතුවෙන් තමයි අපි අතර උණුසුම් කතාබහක් ඇති වුණේ.
නමුත් රාජ්ය සේවයේ උත්තරීතර ආයතනය වන ජනාධිපති ලේකම් කාර්යාලයේදී ඒ තරම් පහත් විදියට ඔහු හැසිරෙයි කියලා මම හිතුවේ නෑ. ඒ හැසිරීම මන්ත්රීවරයෙකුට තියා රස්තියාදුකාරයෙකුටවත් ගැලපෙන්නෙ නෑ. මම මේ සම්බන්ධයෙන් කොටුව පොලිසියට පැමිණිල්ලක් කරලා තියෙන්නේ. දැඩි නීතිමය පියවර ගන්න කියලා මම පොලිසියෙන් ඉල්ලලා තියෙන්නේ. පොලිසියෙ නිලධාරීන් පැමිණ මගෙන් ප්රකාශ ගත්තා. මම සියලු තොරතුරු පැවසුවා. මහින්දානන්ද මන්ත්රීවරයා කියන විදියට ජනාධිපති ලේකම් කාර්යාලයේ CCTV දර්ශන පරීක්ෂා කරන්න කියලා මමත් පොලිසියෙන් ඉල්ලීමක් කලා. එතකොට කවුද ඇත්ත කියන්නේ කියලා හැමදෙනාටම වැටහේවි. අධිකරණ වෛද්ය නිලධාරියා පැමිණ අදාල විමර්ශන කටයුතු කළා. මේ සිද්ධිය කිසිම ආකාරයකින් යටපත් කරන්න මම ඉඩ දෙන්නේ නෑ. නීතියෙ යුක්තිය ඉටුකර ගැනීම සඳහා ගතයුතු සෑම පියවරක්ම මම ගන්නවා. මේ බාධා හිරිහැර එල්ල කළා කියලා මම සැලෙන්නේ නෑ. පක්ෂයේ වගේම මහනුවර ජනතාව වෙනුවෙන් මගේ වගකීම් මම නොඅඩුවම ඉටුකරනවා.
චෝදනාවට ලක්ව සිටින මහින්දානන්ද අලුත්ගමගේ මන්ත්රීවරයා සඳහන් කරන්නේ උණුසුම් කතා බහක් ඇති වූවද තමා ගුණතිලක රාජපක්ෂ මන්ත්රීවරයාට කිසිදු හෝ පහර දීමක් සිදු නොකළ බවත් ජනාධිපති ලේකම් කාර්යාලයෙන් පිටතට පැමිණීමේදී ඇද වැටුණු මන්ත්රීවරයා තුවාල ලද බවත්ය.
