ට්රම්ප් සිය තීරුබදු යුද්ධයෙන් ඉන්දියාව දකුණු ආසියාව තුළ තනිකොට තිබේ. පසුගියදා ඔහු ප්රකාශයක් කරමින් කීවේ රුසියාවේ ආර්ථිකය සමගම ඉන්දියාවේ ආර්ථිකය මරණයට පත්වෙන බවය. ඉන්දියාව, රුසියාව සමග වෙළෙඳ ගනුදෙනු කළොත් ඉන්දියාවට පනවා ඇති තීරුබදු තව වැඩි කරන බවද ඔහු තර්ජනය කළේය. ඉන්දියාවට තර්ජනය කරමින් ඔහු ඉන්දියාව අවට රටවල තීරුබදු අඩු කළේය. ඉන්දියාවේ සතුරෙකු වන පාකිස්තානයට තීරුබදු 29% සිට 19% දක්වා අඩු කළේය. ඉන්දියාව සමග සමීප සබඳතාවක් නැති බංග්ලාදේශයට පනවපු තීරුබදු 35% සිට 20%ට අඩු කළේය. ලංකාවට පනවපු තීරුබද්ද 30% සිට 20%ට අඩු කළේය.
චීනය ලංකාවේ සිය බලය ව්යාප්ත කරන්න පටන් ගැනීමෙන් පසු ඇමෙරිකාව ලංකාව සම්බන්ධ තීරණ ගැනීමේදී ඉන්දියාවට දැනුවත් කිරීම සම්ප්රදායක් කරගෙන තිබිණි. එහෙත් ට්රම්ප් ලංකාවට පනවපු තීරුබද්ද අඩුකරමින් ඉන්දියාවට තර්ජනය කළේ ඒ සම්ප්රදාය කඩා බිඳදමමිනි. දකුණු ආසියාවේ පවර් හවුස් ලෙස ප්රකට ඉන්දියාව තනිකොට වටේ රටවල් දිනාගන්න ට්රම්ප් උත්සාහ කර ඇති බවක් පෙනෙන්නට තිබේ. ට්රම්ප් මේ උත්සාහය ගත්තේ ඉන්දියාව, රුසියාවට එරෙහිව පාවිච්චි කරන්නටය.
රුසියාව මුල් කරගත් ඉන්දියාව සහ ඇමෙරිකාවේ වෙළෙඳ යුද්ධය මැද ලංකාව කරන්නේ කුමක්ද යන්න ප්රශ්නයකි. චීන ගැති වුණත් මේ වෙලාවේ රාජපක්ෂ ආණ්ඩුවක් බලයේ සිටියා නම් ඇමෙරිකාවට එරෙහිව රාජපක්ෂ ආණ්ඩුව තෝරාගන්නේ රුසියාවය. රුසියාව සමග සමීප සබඳතා තිබූ ජවිපෙ ආණ්ඩුව මේ වෙලාවේ රුසියාවේ පැත්ත ගනිමින් ඉන්දියාවට ස්ටෑන්ඩ් කළ යුතුව තිබුණත් ජවිපෙ ආණ්ඩුව ඇමෙරිකානු ගැති ආණ්ඩුවක් බවට පත්ව ඇති බව පැහැදිලිය. අනුර කුමාර ජනාධිපති වී රුසියානු ජනාධිපති බි්රක්ස් සමුළුවට එන ලෙස කළ ආරාධනාව ප්රතික්ෂේප කිරීමෙන්ම අනුර කුමාර ඇමෙරිකාවට සිග්නල් එකක් දුන්නේය. ගෝඨාභයගේ ආණ්ඩුව ආර්ථිකය බංකොලොත් වූ වෙලාවේ අයි.එම්.එෆ්. යන්න ඉන්දියාවේ උදව් ඉල්ලුවේය. රනිල්ගේ ආණ්ඩුවද අයි.එම්.එෆ්. සහනය ගන්න ඉන්දියාවේ උදව් ඉල්ලුවේය. එයට හේතු වුණේ ඇමෙරිකාව හරහා අයි.එම්.එෆ්. එකට බලපෑම් කිරීමට ඉන්දියාවට තිබූ බලයය.
ඉන්දියාවට ට්රම්ප් එල්ල කරන තර්ජනය සහ ලංකාවට ට්රම්ප් දී ඇති සහනය ඉදිරියේ අනුරගේ ආණ්ඩුව තමන්ට දැන් ඇමෙරිකාව සමග ගනුදෙනු කරන්න ඉන්දියාවේ සහාය අවශ්ය නැතැයි හිතනවා විය හැකිය. ඉන්දියාව ළඟදීම ඇමෙරිකාව සමග තීරුබදු යුද්ධය සමථයකට පත්කර ගනු ඇත. මේ යුද්ධයේදී ලංකාව සිටිය යුත්තේ කොතැනදැයි තීරණය කිරීම අනුරගේ ආණ්ඩුවට සුබදායක වනු ඇත.
