ත්රිකුණාමලයේ වරෝධ්යන් නගර් හි පදිංචි 39 හැවිරිදි මනෝහරදාස් සුභාෂ් නැමති අයෙකු උප්පුවේලි පොලිසියෙන් බවට හඳුන්වාගත් පිරිසක් රැගෙන ගොස් ඇතැයි වාර්තා වූයේ පසුගිය සැප්තැම්බර් 28 වැනි දිනය.
හමුදා පුනරුත්ථාපනය යටතේ වසර දෙකක් රඳවා තබාගෙන නිදහස් කළ මනෝහරදාස් සුභාෂ් එදින උදෑසන 6ට පමණ උප්පුවේලි පොලිසියේ බවට හඳුන්වාගත් සන්නද්ධ පිරිසක් විසින් ඔහුගේ නිවසේ සිටියදී පැහැරගෙන ගොස් ඇති බවට චෝදනා එල්ල විය.
යුරෝපා සංගමයේ මානව හිමිකම් පිළිබඳ නිරීක්ෂණ කණ්ඩායමක් ශ්රී ලංකාවේ රැඳී සිටින මොහොතක සිදු වූ මෙම පැහැර ගැනීම ගැන තමන් කිසිත් නොදන්නා බව උප්පුවේලි පොලිසිය ප්රකාශ කොට තිබිණ.
මෙම පැහැර ගැනීම ගැන තමන් කිසිත් නොදන්නා බව උප්පුවේලි පොලිසිය මුලින් ප්රකාශ කර තිබූ අතර මේ සම්බන්ධයෙන් මාධ්ය කළ විමසීමකදී නම කීමෙන් වැලකී සිටි එහි නිලධාරියෙකු දැක්වූ ප්රතිචාරය වී තිබුණේ “අපි ඔයාලට විස්තර කියන්න බැදිලා නෑ. සමහරවිට ඔය වගේ සිද්ධියක් වෙන්නත් පුළුවන් නොවෙන්නත් පුළුවන්. දුරකතන වලින් අපි විස්තර කියන්නේ නෑ. වෙලා තියනවනම් පොලිසියට ආවොත් හේතුව කියලා දෙන්න පුළුවන්. පොලීසිය කියලා කාට කරන්න බැරිද?” යනුවෙනි.
මේ සම්බන්ධයෙන් පොලිස් මාධ්ය ප්රකාශක කාර්යාලයෙන් කළ විමසීමේදී එහි නිලධාරියෙකු සදහන් කළේ මෙම පැහැර ගැනීම සම්බන්ධ තොරතුරක් ඒ වන විට මාධ්ය ප්රකාශක කාර්යාලයට ලැබී නොමැති බවයි.
එහෙත් ත්රිකුණාමලයේ විවාහකයකු දැන් කොළඹ අපරාධ කොට්ඨාසයේ ඉන්නා බව හෙළිවී ඇත.
උප්පුවේලි පොලිසියේ යැයි පැවසූ ආයුධ සන්නද්ධ කණ්ඩායමක් විසින් 28 දා උදෑසන පැහැර ගෙන යනු ලැබූ ත්රිකුණාමලයේ වරෝධ්යන් නගර්හි පදිංචි මනෝහරදාස් සුභාෂ් මේවනවිට අත් අඩංගුවේ සිටින බව දැන් පොලිසිය පවසයි.
පැහැරගෙන යාම සිදුවූ වහාම ඔහුගේ බිරිඳ සහ මව ඒ ගැන ත්රිකුණාමලය මානව හිමිකම් කොමිසම් කාර්යාලයට කළ පැමිණිල්ලක් වාර්තා කරමින් ශ්රී ලංකාවේ ප්රජාතන්ත්රවාදය සඳහා මාධ්යවේදියෝ (JDS) විසින් ප්රකාශයට පත් කළ ට්වීටර් සටහනක් උපුටා දක්වමින් කොළඹ මාධ්ය කළ විමසීමකදී පොලිස් ප්රකාශක ජ්යෙෂ්ඨ පොලිස්පති නිහාල් තල්දූව මහතා පවසා ඇත්තේ සිදුවී ඇත්තේ වරෙන්තුවක් යටතේ ඔහු අත් අඩංගුවට ගැනීම බවයි.
කිසිඳු නිල අවසරයක් නොපෙන්වා සන්නද්ධ පිරිසක් මනෝහරදාස් සුභාෂ් බලහත්කාරයෙන් රැගෙන ගොස් ඇත්තේ ප්රශ්න කොට ආපසු එවන බව පවසමිනි.
“එය පැහැර ගැනීමක් නොවේ. ප්රොටෝකෝලය අනුගමනය කරමින් සුභාෂ් අත්අඩංගුවට ගැනීම සඳහා කොළඹ අපරාධ කොට්ඨාසය (CCD) මගින් වරෙන්තු නිකුත් කළා. ඔහු සැකපිට අත්අඩංගුවට ගත්තේ නාරාහේන්පිට රෝහලේ අත්බෝම්බය ගැන කෙරෙන පරීක්ෂණ සම්බන්ධයෙන්” යැයි ජ්යෙෂ්ඨ පොලිස් අධිකාරී තල්දූව මහතා පැවසූ බව වාර්තා වේ.
“අපි එයාව ගෙනියන්න දුන්නේ නැති උනාම අපිට තුවක්කු දික්කරලා බලෙන් එයාව අරගෙන ගියා. අපි හේතුවක් ඇහුවාම කිව්වේ එයා ගැන තියෙන සැකයකට පරීක්ෂණයක් තියෙනවා, ඒක ඉවරවුනාම එවනවා කියලා” යි සුභාෂ්ගේ බිරිඳ මාධ්ය වෙත පවසා තිබිණ.
ත්රස්තවාදය වැළක්වීමේ පනත ක්රියාවේ යෙදවීම ඇතුළු මානව විරෝධී කටයුතු දිගටම සිදුකරන ශ්රී ලංකාවේ ආණ්ඩුවේ මානව හිමිකම් චර්යාව යුරෝපයට භාණ්ඩ අපනයනය සඳහා තව දුරටත් බදු සහන සලසා දීමට ගැලපෙන්නේදැයි විමර්ශනය කිරීම සඳහා ලංකාවට පැමිණ සිටින පංච පුද්ගල දුත මණ්ඩලය සිය විමර්ශනය ආරම්භ කර තිබුණේ පොලිසිය විසින් සුභාෂ් ගෙනයනු ලැබූ දිනයේදීම වීම විශේෂයකි.
