පොලීසිය ගැන මොනව කියන්නද මොනවාලියන්නද කියලා කියන්න තියෙන සතියක් මේක. එයාලා එක වෙලාවක වැඩ දානවා. ඒ අතරෙ වැඩ නානවා. ඒ දෙක ගැනම එක පිටුවක කතා කරන්න වෙන එක ගැන සතුටු වෙනවද දුක් වෙනද කියන එකත් වෙනමම තීන්දු කරන්න ඕන දෙයක්.Sri Lanka Latest News
පහුගිය දවසක අපි දකිනවා පොලීසියේ නිලධාරී දෙන්නෙක් කැමරාවකුත් අතින් අරගෙන බයිසිකලයකින් යනවා. හඹායන්නා වෑන් එකකින් පලා යමින් ඉන්නවා.
ඒක ඉවරයක් නැති පැන යාමක්. අතරමග විවිධ රථ හප්පමින්, පැති කණ්ණාඩි කඩමින් ඔහු පැනලා යනවා. මේ තරුණ පොලිස් නිලධාරී දෙන්නා මේ පලායන්නා හඹායනවා. ඒක ලොකු පහසුකම් තියෙන යතුරුපැදියක් නෙමේ. ඒ අතර මේ මිනිස්සු ගැන මුළු රටටම ආදරය හිතෙන කතා කීපයක් ඒ මිනිස්සු කියනවා.
“කොකා අස්සට ඇඟිල්ල දාන්න එපා, මිනිස්සු පව්…”
මේ වගේ කතාවක් පොලිස් නිලධාරියා කියන්නේ කැමරාවට පේන්න නෙමේ. කැමරාව ඉස්සරහ ඉන්න එවුන්ට ඇහෙන්න නෙමේ. ඒක කියන්නෙ බොක්කෙන්මයි. ඒක අපි අහගෙන ඉන්න එක වෙනමම කතාවක්. රටක ආරක්ෂාවට ඉන්න අයට හදවතක් තිබුණම ඒ රට හරිම ලස්සන වෙනවා. අපි හැම වෙලාවකම හිතනවා ලංකාවේ පොලීසියේ ඉන්න හුඟාක් නිලධාරීන්ට හොඳ හදවතක් තියෙනවා කියලා. මේ අය අතර එක්කෙනෙක් දෙන්නෙක් කරන තක්කඩිකම්වලට සමස්ත පොලිස් දෙපාර්තමේන්තුවම බැනුම් අහනවා. අපි හිතන්නේ ඒක අසාධාරණයි කියලා. මොකද මේ රටේ තමන්ට අදාළ නැති වුණත් හැම වෙලාවකම වගේ මිනිස්සු වෙනුවෙන් පිහිටට එන්නේ පොලීසිය. වාහනයක් පාරේ කැඩුණම ඒක තල්ලු කරන්නේ පොලීසිය. මනුස්සයෙක් අතරමං වුණොත් අන්තිමටම පිහිටට එන්නේ පොලීසිය. ඕනෑම ප්රශ්නයකදී මොන සෙප්පඩ විජ්ජාවක් දාලා හරි විසඳලා දෙන්නේ පොලීසිය. අපි දැක්කා පහුගිය කාලේ සමහර දරුවන්ව විභාගෙට ගිහිල්ලා දාපු පොලිස් නිලධාරි. සමහර අනතුරු වුණාම තුවාලකාරයෝ ඉස්පිරිතාලෙට උස්සගෙන ගියේ පොලීසිය. සමහර වෙලාවට පොලීසියේ ජීප් එකේ. ලොකු අනතුරකදී කවුරු අතෑරලා ගියත් පොලීසිය ගියේ නෑ. ඒ නිසා පොලීසිය නරක නෑ. පොලීසියේ හුඟාක් හොඳ මිනිස්සු ඉන්නවා.
අපි දන්නවා පොලීසියේ ඉන්න හුඟාක් හොඳ මිනිස්සු ගැන.
යාපනේට හෙට පත්කරලා යවනවා නම් අපි පොලිස් දෙපාර්තමේන්තුවට නමක් යෝජනා කරන්නම්. ප්රධාන පොලිස් පරීක්ෂක ආනන්ද රාජපක්ෂ. කුරුණෑගල ප්රජා පොලීසියේ නිකම් කාලේ නාස්ති කරන දක්ෂ නිලධාරියෙක්. අපි ඒක ඇස් දෙකෙන් දැක්කේ පලෙයි පොලිස් වසමේදී. පලෙයි කියන්නේ සීයට සීයක්ම එල්.ටී.ටී.ඊ. ප්රදේශයක්. ඒ මිනිස්සු ආනන්ද රාජපක්ෂට කියන්නේ ගාන්ධි කියලා. අලුත් ආණ්ඩුවටත් යාපනේ ගාන්ධිව මග ඇරිලා. ප්රධාන පොලිස් පරීක්ෂක හිරියාදෙණිය කියන්නෙත් එහෙම කෙනෙක්. ආගමික සංහිඳියාව ගැන අ යන්නේ ඉඳලා කියලා දෙන්න පුළුවන් මිනිහෙක්. බඩල්ගම පොලීසියේ ඉඳලා සාමාන්ය රාජකාරියට පන්නපු ස්ථානාධිපතිතුමා ගැන මිනිස්සු කියන්නෙත් එහෙම. කාලයක් ධර්මපුරම ස්ථානාධිපතිවරයාව හිටපු චතුරංග කියන මහත්තයා ගැන ඒ වෙලාවේ ඒ මිනිස්සු හිටියේ විශාල පැහැදීමකින්.
ආයේ ඉතිං ලින්ටන් සිල්වා කියන නම කිව්වම ඇතිනේ. සල්ලි කුට්ටිය මේසෙ උඩ තිබ්බම අහක බලාගෙන කනට ගහන්න පුළුවන් කොන්ද පණ තියෙන ලයිෂන් චණ්ඩියෙක්. උස්සලා තියනවා තියන්න ඕනෙ උඩම පුටුවකින්. ඔය අපි දන්න හරිය. නොදන්න දක්ෂ ඕන තරම් අය ඉන්නවා. ඒ නිසා පොලීසියට මෙහෙම එළවලා අල්ලන්න බැරි නෑ. ඒ වෙලාවේ දහස් ගානක් මිනිස්සු ඉන්න වීථිවල ඒ කිසිම කෙනෙක්ට කරදරයක් නොවෙන විදියට කරපු ලුහුබැඳීම විශිෂ්ටයි. ඒ ගැන කිසිම තර්කයක් නෑ. හැබැයි පොලීසියේ මහත්තුරු තව දුරටත් බොඩි කැම්වලට විරුද්ධ වෙන එක නම් හොඳ දෙයක් නෙමේ. මොකද ඒ වෙලාවෙ බොඩි කැම් තිබ්බා නම් ඔහොම එක අතකින් කැමරා අල්ලගෙන දඟලන්න ඕන නෑ. එහෙම යන එකේ අවදානමක් නෑ කියලා කියන්න බෑ. මේ වගේ දෙයක් හෙටත් වෙන්න බැරිකමක් නෑ. ඒ නිසා දැන්වත් අපිට වෘත්තීයමය වෙන්න වෙනවා. කොහොම වුණත් මේ වෙලාවේ පොලීසිය නියමයි. අපි සැලියුට් කරනවා. ඒක අතිශය මානුෂීය මෙහෙයුමක්.
ඒ වැඩෙන් ලකුණු දාගෙන දවස් කීපයක් යද්දි පොලීසිය ආයෙත් වැඩ පෙන්වනවා. ඒ වැලිගම සභාපති ඝාතනයට අදාළ සැකකරුවන්ව අල්ලගෙන. අපරාධයක් වෙලා දවස් ගානක් ඇතුළත ඒකට අදාළ සැකකාරයව අල්ලන්න පුළුවන් දක්ෂ පොලීසියක් ලංකාවේ ඉන්නවා. ඒක අපි දන්නවා. ඔය සමහර අපරාධ ගැන මෙලෝ දෙයක් දන්නේ නෑ වගේ ඉන්න එකත් ඒ පොලීසියේම දක්ෂතාවක් කියලා පැහැදිලියි. ඕවට එක එක හේතු තියෙනවා කියලා ඔයාලා අපි දෙගොල්ලොම දන්නවා.
හැබැයි මේ වෙලාවේ අල්ලගත්තේ සැකාරයෙක්ව බවත්, ඒ සැකකාරයා අපරාධකාරයා කරන්නේ අධිකරණය බවත් අපේ අදහස. එහෙම නම් මේ සැකකාරයව අත්අඩංගුවට ගැනීමේ ක්රමවේදයක් තියෙනවා. ප්රශ්න කිරීමට ක්රමවේදයක් තියෙනවා. සැකකාරයෙක් අල්ලපු ගමන් ඔහුව ලෝකෙට පෙන්නන එක කොයි තරම් නරකද කියන එක ගැන අපි අමුතුවෙන් කියන්න ඕන නෑ. ඒක දෙආකරව බලපාන්න පුළුවන්. එකක් ඔහු සැබෑ අපරාධාකරයා නොවේ නම් ඔහුට සිදුවෙන අගතිය. ඔහු සැබෑ අපරාධකාරයා නම් තව දුරටත් හඳුනාගැනීමේ පෙරට්ටු වගේ පරීක්ෂණ ක්රමවේද යොදාගන්න බෑ. ඒ වගේම ඔහුව හෙළිදරව් කිරීම ඔහුගේ ආරක්ෂාවටත්, පොලීසියේ රාජකාරීවලටත් බාධාවක්. ඒත් ඒ හැම එකටම වඩා ප්රසිද්ධිය ගැන හිතනවා නම් මේක මහ භයානක තත්ත්වයක්. ශ්රී ලංකාවේ ප්රකට ජ්යෙෂ්ඨ නීතිඥවරයෙක් වන සාලිය පීරිස් මහත්තයා මේ ගැන කියලා තිබුණු කතාව මෙන්න මේක.
අත්අඩංගුවට ගැනීම් අපරාධ පරීක්ෂණ නීතියෙන් ස්ථාපිත ක්රියා පටිපාටියට අනුව සිදුකළ යුතුය. සැකකරුවන් මාධ්ය ඉදිරියේ ප්රශ්න කිරීම, ඔවුන්ගේ වොයිස් කට් ලබාදීම සහ එම ක්ලිප් මාධ්ය සහ සමාජ මාධ්ය හරහා බෙදාහැරීම මහජනතාවගේ සමහර කොටස් පිනවන නමුත් නඩු විභාගය ආරම්භ වූ පසු ඒවායින් පැමිණිල්ලට වාසියක් නැත. එවැනි බොළඳ ක්රියා මගින් පොලිසියේ කීර්තියට හානි වේ. එමගින් විමර්ශකයන්ගේ වෘත්තීයභාවය පිළිබඳව ප්රශ්න පැන නගින අතර සමස්ත පද්ධතියටම අපකීර්තියක් ගෙන එයි. – සාලිය පීරිස්ගේ ෆේස්බුක් පිටුවෙන්
රටේ අපරාධකාරයෙක් අල්ලන්න කලින් ඒක ෆේස්බුක් දානවා. ඒ වෙලාවේ වුණු පොඩි පොඩි දේවල් පවා වීඩියෝ කරලා බෙදලා දෙනවා. සමහර කට උත්තර මුල ඉඳලා අගට ටී.වී. එකේ යනවා. එයාලා අල්ලන්න කලින් එයාලා නිර්දෝෂී බව ගැන කතා පවත්වනවා. අල්ලන්න ඉන්න කෙනා අල්ලන්න නියමිත බව රටටම කියනවා. ඒ අය කලින්ම හැංගෙනවා. පොලීසිය තව දුරටත් නාට්ය පෙන්වන්න ගියොත් ඕලුගල මහත්තයලා ඇතළු නිලධාරීන්ගේ මහන්සිය අපරාදේ වෙන්න ඉඩ තියෙනවා. එක දිගටම පෙන්වන කුඩු ඇල්ලීමේ ජවනිකා දැනටමත් මිනිස්සුන්ට එපා වෙලා.
ඇත්තටම හුඟක් ආණ්ඩු බලය ගත්ත ගමන්ම කරන්නේ වැඩ පෙන්වන එක. ඒකට උදාහරණ සපයන්න එපා කියලා මේ ආණ්ඩුවෙන් අපි ඉල්ලන්නේ. පොලිස්පතිතුමා දක්ෂයෙක් බව අපි දන්නවා. එතුමගේ දක්ෂතා ආයේ අලුතෙන් පෙන්වන්න දෙයක් නෑ. ඒත් පොලීසියට අපි කෙළින්ම කියන්නේ, අපි වැඩ්ඩෝ ඉන්නවා කියලා දන්නවා. ඕලුගල මහත්තයලා, ලින්ටන් සිල්වලා කොන්ද පණ තියෙන මිනිස්සු. එහෙම අයව කැමරා ඉස්සරහ නටවලා අභිමානයට හානි කරන්න එපා. මොකද අර දේශබන්දු කියන මහත්තයවත් අපි නිතරම දැක්කේ කැමරා ඇස්වලින්.
ජීවන පහන් තිළිණ
