ශ්රී ජයවර්ධන පුර රෝහලේ ස්නායු ශල්ය වෛද්ය ඒකකයේ ශල්ය වෛද්ය උපකරණ බාහිරින් ගෙන්වා විකිණීමේ ජාවාරමක් සම්බන්ධයෙන් විශේෂඥ වෛද්යවරියක අත්අඩංගුවට ගැනීම පුදුමයට පත්වීමට කරුණක් නොවන බවත්, රජයේ රෝහල් රැසකම හිඟව පවතින අස්ථි ශල්යකර්ම සඳහා අවශ්ය කරන දණහිස් ඇට Artificial knee Transplant උපකරණ ආදිය පුද්ගලික අංශයෙන් මිලට ගෙන ශල්යාගාරවලට රැගෙන එන ලෙසට රෝගීන්ට පැවැසීම දැන් සාමාන්ය කරුණක් බවට පත්ව ඇති බව වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති, විශේෂඥ වෛද්ය චමල් සංජීව මහතා පෙන්වා දෙයි. Sri Lanka Latest News
රෝගියා විසින් අදාළ ඖෂධ සමාගමට රුපියල් ලක්ෂ තුනහමාරකට අධික මුදලක් ගෙවීම සිදුකළ යුතු වන අතර, ඉන් පසුව සමාගමේ නියෝජිතයන් විසින් අවශ්ය කරන උපකරණය ශල්යාගාරයට ගෙන භාරදීම සිදුකරන බව ඔහු වැඩිදුරටත් පෙන්වා දෙයි.
ශ්රී ජයවර්ධනපුර රෝහලේ විශේෂඥ වෛද්යවරිය මගින් ස්නායු ශල්ය වෛද්ය උපකරණ අලෙවි කිරීම හා මෙම ක්රියාව අතර වැඩි වෙනසක් නොමැති බව ඔහු වැඩිදුරටත් පෙන්වා දෙයි.
දුප්පත් අසරණ රෝගීන්ට මේ අන්දමට ඉතා විශාල මුදලක් ගෙවා අස්ථි ශල්යකර්ම සඳහා අවශ්ය කරන උපකරණ මිලදී ගැනීමේ හැකියාවක් නොමැති බවත් දැනට මාස කිහිපයක සිටම වෛද්ය සැපයුම් ඒකකය මගින් අස්ථි ශල්යකර්ම සඳහා අවශ්ය උපකරණ සැපයීමට කටයුතු නොකිරීම මෙම ජාවාරමට උල්පන්දම් දෙන බවද ඔහු වැඩිදුරටත් පෙන්වා දෙයි.
මේ අන්දමට ඖෂධ සමාගම් නිදහස් සෞඛ්ය පද්ධතිය පවත්වාගෙන යාමට අනිසි බලපෑමක් සිදුකිරීමට හැකිවන පරිදි හිඩස් නිර්මාණය කිරීමක් වර්තමාන රජයෙන් බලාපොරොත්තු නොවන බවද ඔහු පෙන්වා දෙයි.
හෘද ශල්යකර්ම, වකුගඩු ශල්යකර්ම, අවයව බද්ධය, දැඩිසත්කාර ඒකක වෛද්ය ප්රතිකාර, රුධිර කාන්දු පෙරණය, අක්ෂි රෝග, ස්නායු ශල්ය රෝග ආදී තත්ත්ව රැසක් සඳහා අවශ්ය කරන ශල්ය උපකරණ හිඟය හේතුවෙන් මේ වනවිට ජනතාව දැඩි ලෙස පීඩාවට පත්ව ඇති බවත්, අයවැය මගින් වෙන්කරන ලද ප්රතිපාදන කාර්යක්ෂම ලෙස පරිපාලනය කොට රෝගී ජනතාවට අවශ්ය කරන සේවා සැපයීමට සෞඛ්ය අමාත්යාංශය අසමත් වීම ගැන ජනාධිපතිවරයා වෙනම විමර්ශනයක් පැවැත් විය යුතු බව ඔහු වැඩිදුරටත් පෙන්වා දෙයි.
පසුගිය කාලය මුළුල්ලේම සෞඛ්ය අමාත්යාංශයේ දුර්වල පරිපාලනය සහ කළමනාකරණය නිසා ආර්ථික තත්ත්වයන් වර්ධනයක් පෙන්නුම් කළද සෞඛ්ය පද්ධතියේ දුර්ලතා නිවැරදි වී නොමැති බව වෛද්ය චමල් සංජීව මහතා ජනාධිපතිවරයාගේ අවධානයට ලක්කරයි.
ඖෂධ සමාගම් සමග එකතු වී ඖෂධ හිඟය සහ ශල්ය උපකරණ හිඟය දඩමීමා කොට සිදුවන මෙම ක්රියාවන් සම්බන්ධව වහාම විධිමත් විනය පරීක්ෂණයක් පැවැත්වීම කෙරෙහි ජනාධිපතිවරයාගේ අවධානය වැදගත් බවද විශේෂඥ වෛද්ය චමල් සංජීව මහතා වැඩිදුරටත් අවධාරණය කර සිටියේය.
