අහුංගල්ල පොලිස් වසමේ වෙඩිතැබීමේ සිද්ධියට සම්බන්ධ සැකකරුවන් සහ වෙඩිතැබීමට හේතුව මෙතෙක් අනාවරණය වී නොමැති අතර, අහුංගල්ල පොලීසිය ඒ සම්බන්ධයෙන් වැඩිදුර විමර්ශන සිදු කරයි.Sri Lanka Latest News
අහුංගල්ල පොලිස් වසමේ ඊයේ රාත්රීයේ සිදු වූ වෙඩි තැබීමකින් එකම පවුලේ මව, පියා සහ සිව්මස් හැවිරිදි දරුවෙකු තුවාල ලැබීය.
අහුංගල්ල පොලිස් වසමේ ඌරගහ මාර්ගයේ ගල්වෙහෙර පාසල අසල දී එම වෙඩි තැබීම සිදු ව තිබුණේ, ඊයේ රාත්රී 07.30ට පමණය.
යතුරු පැදියකින් ගමන් කරමින් සිටි එකම පවුලේ තිදෙනෙකු ඉලක්ක කර ටී 56 ගිනිඅවියකින් වෙඩි තැබීම සිදු කර තිබේ.
ත්රීරෝද රථයකින් පැමිණි පිරිසක් වෙඩිතැබීම සිදු වූ ස්ථානයේ කුරුඳු වත්තක සැඟ ව සිට මෙම වෙඩි තැබීම සිදු කර ඇති බවට පොලීසිය සැක පළ කරයි.
වෙඩි තැබීමෙන් යතුරු පැදියේ ගමන් කරමින් සිටි පිරිමි පුද්ගලයා, කාන්තාව මෙන්ම ඔවුන්ගේ සිව්මස් හැවිරිදි දරුවාද තුවාල ලැබුව ද ඔවුන් නොනවත්වා යතුරු පැදිය නිවස වෙත ධාවනය කර තිබිණි.
අනතුරු ව තුවාලකරුවන් තිදෙනාම ඇතුළත් කර ඇත්තේ, බලපිටිය මූලික රෝහලටයි.
ප්රහාරයෙන් තුවාල ලැබු 32 හැවිරිදි දිනේෂ් ද සිල්වා, ඔහු ගේ බිරිඳ වන 28 හැවිරිදි ශානි මහේෂා සහ සිව්මස හැවිරිදි නෙහාන් නම් පිරිමි දරුවා අහුංගල්ල ගල්වෙහෙර ප්රදේශයේ පදිංචිකරුවන් බව වාර්තා වේ.
වෙඩි වැදීමෙන් දිනේෂ් ද සිල්වා නැමැත්තා ගේ මුඛයට හානි සිදු වී ඇති අතර, සිව්මස් දරුවා ගේ පාදයකට හානි සිදු වී තිබිණි.
ඒ අනුව ඔවුන් දෙදෙනා අද පෙරවරුවේ ශල්යකර්ම සිදු කිරීම සඳහා කරාපිටිය ශික්ෂණ රෝහල වෙත ඇතුළත් කර ඇත.
තුවාල ලැබූ කාන්තාව බලපිටිය රෝහලේ ප්රතිකාර ලබයි.
වෙඩි තැබීමට හේතුව මෙතෙක් අනාවරණය කරගෙන නොමැති අතර, සැකකරුවන් ද වෙඩි තැබීමෙන් පසු පළා ගොස් තිබේ.
