ආර්ථිකය සම්බන්ධයෙන් මනා දැනුමක් ඇති විශේෂඥයන් ලෙස පෙනී සිටින විපක්ෂයේ ඇතැම් ‘ආර්ථික ඔස්තාර්ලා’ සම්බන්ධයෙන් මේ වනවිට බරපතළ විවේචනයක් සමාජය තුළ මතුවෙමින් තිබේ.Sri Lanka Latest News
ඊට හේතු වී ඇත්තේ ආර්ථික ඔස්තාර්ලා ලෙස පෙනී සිටින මෙම චරිත ආණ්ඩුව විසින් ජනතාව පීඩාවට පත්කරමින් බදු පනවද්දී හෝ රටේ ආර්ථිකය බිඳවට්ටමින් ඇතැම් මහාපරිමාණ සමාගම් විසින් දැවැන්ත බදු වංචාවන් සිදුකරද්දී ඊට එරෙහිව වචනයක් හෝ කතා නොකොට මුනිවත රකිමින් සිටීමය.
උදාහරණයක් ලෙස මහා ආර්ථික ඔස්තාර්ලා වශයෙන් පෙනී සිටින මෙම පිරිස් පසුගිය කාලයේදී රනිල් වික්රමසිංහ රජය විසින් ජනතාව මත බදු පිට බදු ගසමින් සිටියදී පවා ජනතාව වෙනුවෙන් වචනයක් හෝ කතා නොකොට වික්රමසිංහ ආණ්ඩුව ආරක්ෂා කිරීමට විපක්ෂයේ සිට පියවර ගෙන තිබිණි.
එහිදී ඔවුන් එය සාධාරණීකරණය කරමින් කියා සිටියේ ජාත්යන්තර මූල්ය අරමුදල සමග ඇතිකරගත් එකඟතාවන්ට අනුව එය සිදුකළ යුතුව ඇති බවත්, නොඑසේ නම් රට වැටී ඇති ආර්ථික අර්බුදයෙන් ගොඩගත නොහැකි බවත්ය.
මීට අමතරව පසුගිය කාලයේ ලංකාවේ දැවැන්ත සමාගම් විසින් සිදුකරනු ලැබ ඇති බවට චෝදනා එල්ල වූ මහාපරිමාණ බදු වංචාවන් පිළිබඳ යම් යම් පාර්ශ්වයන් සාක්ෂි සාධක සහිතව තොරතුරු රටට අනාවරණ කළද මේ ආර්ථික ඔස්තාර්ලා ඒ සම්බන්ධයෙන් වචනයක් හෝ ප්රකාශ නොකිරීමට වගබලා ගත්හ.
උදාහරණයක් ලෙස රුපියල් බිලියන 6කට අධික මුදලක් ආණ්ඩුවට පාඩු කරමින් ප්රධාන පෙළේ සමාගම් 3ක් පිරිපහදු නොකළ පොල් තෙල් මෙරටට ආනයනය කර ඇති බවට තොරතුරු සජබ මන්ත්රී එස්.එම්. මරික්කාර් මහතා පාර්ලිමේන්තුවේදී අනාවරණ කොට තිබියදීත් මේ ආර්ථික ඔස්තාර්ලා ඒ පිළිබඳ වචනයක් හෝ කතා කළේ නැත.
මීට අමතරව පැවැති මෛත්රීපාල සිරිසේන රජය විසින් කොළඹ සිටි ඔෆ් ඩී්රම්ස් හෝටල් පරිශ්රයේ කැසිනෝ ආරම්භ කළ නොහැකි බවට කැබිනට් පත්රිකාවක් පවා ප්රකාශයට පත්කර තිබියදී මේ වනවිට එම ස්ථානයේ දැවැන්ත කැසිනෝ ශාලාවක් ආරම්භ කිරීම සම්බන්ධයෙන් සහ ඊට අදාළ 45%ක ආදායම් බද්ද ගෙවනවාද යන්න සම්බන්ධයෙන් විශාල ගැටලුවක් පැනනැගුණු අවස්ථාවේදී හෝ මෙම ආර්ථික ඔස්තාර්ලා ඒ පිළිබඳ වචනයක් හෝ කතාකර තිබුණේ නැත.
අදාළ කැබිනට් පත්රිකාව අහෝසි කොට කැසිනෝ ආරම්භ කිරීමට හැකිවන පරිදි අලුත් කැබිනට් පත්රිකාවක් ඉදිරිපත් කර ඇද්ද, සියලු කැසිනෝ ශාලාවලට බලපාන පරිදි ලාභයෙන් 45%ක බද්දක් ගෙවිය යුතු බවට වන නීතිය මෙම කැසිනෝ ශාලාවට ද බලපාන්නේද යන්න සම්බන්ධයෙන් හෝ තවමත් පැහැදිලි ප්රකාශයක් නොමැති පසුබිමක ඊට අදාළ සමාගම් කැඳවා කිසිදු ප්රශ්න කිරීමක් හෝ සිදුකිරීමට මෙම ආර්ථික ඔස්තාර්ලා පියවර ගෙන තිබුණේ නැත.
එමෙන්ම පසුගිය සතියේදී ජෝන් කීල්ස් ආයතනය මගින් බී.වයි.ඩී. මෝටර් රථ ලංකාවට ගෙන්වීමේදී මෝටර් ධාරිතාව වෙනස් කොට බදු වංගුවක් ගසා ඇති බවට සජබ මන්ත්රී මුජිබර් රහුමාන් මහතා පාර්ලිමේන්තුවේදී සාක්ෂි සාධක සහිතව දැවැන්ත චෝදනාවක් එල්ල කරද්දී පවා මෙම ආර්ථික ඔස්තාර්ලා ඊට එරෙහිව වචනයක් හෝ කතාකොට තිබුණේ නැත.
බොහෝ පාර්ශ්වයන් පෙන්වා දෙන්නේ ඒ වෙනුවට මෙම ආර්ථික ඔස්තාර්ලා චෝදනාවන්ට ලක්වූ දැවැන්ත සමාගම් ආරක්ෂා කිරීමේ අරමුණෙන් කටයුතු කරන බවය. එහිදී එම පාර්ශ්වයන් චෝදනා කර තිබුණේ මැතිවරණ කාල සමයන්හිදී මැතිවරණ ප්රචාරක කටයුතු වෙනුවෙන් බිලියන ගණනින් මුදල් ඒ සඳහා සන්තෝසම් ලෙස ලැබෙන නිසා එවැනි සමාගම්වලට එරෙහිව අදහස් දැක්වීමෙන් වැළකී සිටින බවය.
ඒ අනුව ඔවුන් ජනතාව ආරක්ෂා කිරීම වෙනුවෙන් පෙනී සිටිනවා වෙනුවට මහාපරිමාණ සමාගම් ආරක්ෂා කිරීම වෙනුවෙන් පෙනී සිටින බවද එම පාර්ශ්ව පෙන්වා දෙති.
එමෙන්ම මෙම පාර්ශ්වයන් තවදුරටත් පෙන්වා දෙන්නේ පසුගිය කාලය පුරා මෙම ආර්ථික ඔස්තාර්ලා රනිල් වික්රමසිංහ රජයටත්, මහාපරිමාණ සමාගම්වලටත් කඩේ යමින් කටයුතු කිරීම නිසා විපක්ෂයේ ආර්ථික ප්රතිපත්තිය ප්රතික්ෂේප කිරීමට ජනතාව පියවර ගෙන ඇති බවකි.
ඒ අනුව එම ආර්ථික ඔස්තාර්ලාගේ ජනතාව පිළි නොගන්නා ආර්ථික න්යායන් වෙනුවට ජනතාව පිළිගන්නා ආර්ථික න්යායක් සහ ජනතාව පිළිගන්නා ආර්ථික විශේෂඥයන් ඉදිරිපත් කිරීමට විපක්ෂයේ ප්රබලයන් කටයුතු කළ යුතු බවද ඔවුහු පෙන්වා දෙති.
