ලංකාවේ නීල වර්ණ සාගර පතුල යනු හුදෙක් මත්ස්ය සම්පතින් පිරුණු ජල තලයක් පමණක් නොව, එය ලෝක ඉතිහාසයේ නොලියැවුණු පරිච්ඡේද රැසක් රහසිගතව සඟවාගෙන සිටින ”දිය යට කෞතුකාගාරයකි”. යුරෝපය සහ ආසියාව යා කළ මහා වෙළෙඳ සේද මාවතේ කේන්ද්රස්ථානය ලෙස ශතවර්ෂ ගණනාවක් පැවති අපේ මුහුදු සීමාව, අද වන විට ලෝකයේ අවධානය දිනාගත් දිය යට සංචාරක ගමනාන්තයක් (Underwater Tourism Destination) වීමේ මහා විභවයක් පෙන්නුම් කරමින් තිබේ. මෑතකදී සංචාරක නියෝජ්ය අමාත්ය රුවන් රණසිංහ මහතා විසින් අනාවරණය කළ තොරතුරුත් සමඟින්, මෙතෙක් කල් මුහුදු වැලි තලාවට යටවී තිබූ මේ ”නිහඬ නිධානය” පිළිබඳව යළිත් කතාබහක් ඇති වී තිබේ.Sri Lanka Latest News
මෙම මුහුදු පතුලේ සැඟවුණු ඉතිහාසයේ වටිනාම සහ ආකර්ෂණීයම ස්මාරකය වන්නේ බි්රතාන්ය රාජකීය නාවික හමුදාවට අයත් වූ ්HMS Hermes නෞකාවයි. මෙය සාමාන්ය නෞකාවක් නොව, ලෝකයේ ප්රථමයෙන්ම ගුවන් යානා ප්රවාහනය සඳහාම විශේෂයෙන් නිර්මාණය කරන ලද (World’s first purpose-buolt aircraft carrier) ඓතිහාසික නෞකාවයි. දෙවැනි ලෝක යුද සමයේදී, එනම් 1942 අප්රේල් මාසයේදී ජපන් ගුවන් ප්රහාර හමුවේ මඩකළපුවට ඔබ්බෙන් වූ මුහුදු සීමාවේදී මෙම නෞකාව මුහුදුබත් විය. අදටත් මීටර් 50ක් පමණ ගැඹුරු මුහුදු පතුලේ නිහඬව සැතපී සිටින මේ මහා නැව, ලෝකයේ සිටින වෘත්තීය කිමිදුම්කරුවන්ගේ (Wreck Divers) සිහිනයක් බඳු අද්විතීය ස්ථානයකි. මෙය හුදෙක් සුන්බුන් ගොඩක් නොව, මිනිස් ඉතිහාසයේ තාක්ෂණික පෙරළියක් සනිටුහන් කළ යුගයක ජීවමාන සාක්ෂියකි.
නමුත් මේ මහා උරුමය අද මුහුණ දී සිටින බරපතළම අභියෝගය වන්නේ මිනිස් ක්රියාකාරකම්ය. නියෝජ්ය අමාත්යවරයා පෙන්වා දෙන පරිදි, පවතින ලිහිල් නීතිරීති සහ අවම නිරීක්ෂණ පද්ධති ප්රයෝජනයට ගනිමින් ඇතැම් පිරිස් නීති විරෝධී ලෙස මෙම නෞකාවල වටිනා කොටස් ගලවාගෙන යාමට සහ විනාශ කිරීමට පෙලඹී සිටිති. මෙය අපේ රටේ පුරාවිද්යාත්මක උරුමයට සිදුකරන මහා අපරාධයකි. දිය යට සංචාරක කර්මාන්තය හරහා රටට ඩොලර් ගලා එන මාවතක් සකස් කිරීමට පෙර, මෙම වටිනා සම්පත් ආරක්ෂා කර ගැනීම සඳහා දැඩි නීතිරීති පැනවීම සහ නවීන කිමිදුම් තාක්ෂණය (Diving Technology) භාවිතා කරමින් මෙම ස්ථානවල වත්මන් තත්ත්වය නිරීක්ෂණය කිරීම අත්යවශ්ය වේ.
ලෝකයේ ”Wreck Diving” හෙවත් මුහුදුබත් වූ නැව් නැරඹීමේ කලාවට ඇලුම් කරන සංචාරකයින් යනු අතිශය ඉහළ වැය කිරීමේ ශක්තියක් ඇති පිරිසකි. ඔවුන් සෙසු සංචාරකයින්ට වඩා වෙනස් වන්නේ, ඉතිහාසය සහ පරිසරය අත්විඳීම වෙනුවෙන් ඕනෑම දුරක් ගමන් කිරීමට සහ ඉහළ මුදලක් වැය කිරීමට ඇති සූදානම නිසාය. ශ්රී ලංකාව ජාත්යන්තර ප්රමිතීන්ට අනුව කිමිදුම් මධ්යස්ථානයන් පවත්වාගෙන යමින්, මෙම නෞකා සුන්බුන් ආරක්ෂිතව නැරඹීමට අවස්ථාව සලසා දෙන්නේ නම්, එය මෙරට ආර්ථිකයට ලැබෙන දැවැන්ත ශක්තියක් වනු ඇත. දිය යට සංචාරක ව්යාපාරය යනු හුදෙක් විනෝදාංශයක් නොව, රටේ ඉතිහාසය විදේශිකයන්ට විකුණා ඉහළ විදේශ විනිමයක් උපයාගත හැකි උපායමාර්ගික කර්මාන්තයකි.
අප හමුවේ ඇති මේ ස්වභාවික සහ ඓතිහාසික දායාදය අතිශය සංවේදී එකකි. ගොඩබිම ඇති ස්මාරකයක් මෙන් නොව, මුහුදු පතුලේ ඇති මේවා වරක් විනාශ වුවහොත් හෝ විකෘති වුවහොත් නැවත කිසිදා ප්රතිනිර්මාණය කළ නොහැක. එබැවින් රජය සහ වගකිවයුතු ආයතන එක්ව මෙම ”නිහඬ ඉතිහාසය” ආරක්ෂා කරමින්, එය මතු පරපුරටත් රටේ ආර්ථිකයටත් දායක කරගත හැකි පරිදි විධිමත් වැඩපිළිවෙළක් සකස් කිරීම යුගයේ අවශ්යතාවකි. මුහුදු පතුලේ සැඟවුණු මේ අභිමානවත් උරුමය, හෙට දවසේ ශ්රී ලංකාව ලෝක සංචාරක සිතියමේ ඉහළින්ම ඔසවා තබන ”නිල්වන් නිධානය” වනු නොඅනුමානය.
