ලෝක සෞඛ්ය සංවිධානය මගින් ජූනි 29 වන දායින් අවසන් වූ සතිය පිළිබඳව නිකුත් කරන ලද COVID-19 නවතම තත්ත්ව වාර්තාවට අනුව ඩෙල්ටා ප්රභේදය රටවල් අනූ හයකින් වාර්තා වී ඇති බව අනාවරණය කොට ඇත.
ඔවුන් තවදුරටත් පවසා සිටින්නේ ජාන විශ්ලේෂණය (Genetic sequencing) මගින් ප්රභේද හඳුනා ගැනීමට යම් රටවලට ඇති පහසුකම් වල අඩුකම නිසා එහි සැබෑ පැතිරීම පිළිබඳව තොරතුරු නොලැබිමට ඉඩ ඇති බවකි.
ඒ හේතුව නිසා ම එය වාර්තා වන ප්රමාණයටත් වඩා වැඩි ප්රදේශ ගණනක පැතිර ගොස් තිබිය හැකි බව සැක කෙරේ.
ලොව පුරා ඩෙල්ටා ප්රභේදය වාර්තා වුණු රටවල්වල සති අටක් වැනි සුළු කාලයක් තුළ දී පෙර පැවති සියලු වෛරස් ප්රභේද අභිබවා ඩෙල්ටා ප්රභේදය එම රට තුළ ප්රධානතම ප්රභේදය බවට පත්වී ඇති බැවින් ගෝලීය තත්ත්වය ද ඒ හා සමාන ස්වරූපයක් ගනු ඇතයි සිතිය හැකියි.
ඉදිරි මාස කිහිපය ඇතුළත දී මුළු ලොව පුරාම පැතිරී යන ප්රධානතම කොවිඩ්-19 වෛරස ප්රභේදය ලෙස ඩෙල්ටා පත්වනු ඇති බවට මෙම වාර්තාවේ දී තවදුරටත් පුරෝකථනය කෙරේ.
මෙවැනි තත්ත්වයක් යටතේ දී දැනට අප ශ්රී ලංකාව තුළ ද නිරීක්ෂණය කරනුයේ තරමක අඩු ශීඝ්රතාවයකින් වුවත් මෙම නව ප්රභේදය පැතිර යාම ආරම්භ වී ඇති බවයි.
පෙර කී ගෝලීය තත්ත්ව වාර්තාවට අනුව මෙහි ඇති ගැටලුකාරී ස්වභාවය වනුයේ එය කලින් පැවති ප්රභේදවලට වඩා 55% ක වැඩි වේගයකින් පැතිරීම සහ පූර්ණ ලෙස එන්නත්කරණයට ලක් නොවූ පුද්ගලයින් සඳහා මෙම තත්ත්වය වඩාත් ගැටලූකාරී ලෙස බලපෑ හැකි වීම යි. එම නිසා මේ මොහොතේ දී ශ්රී ලාංකිකයින් ලෙස අපට කළ හැකි ප්රධානම කාර්යය වන්නේ වන්නේ මෙම ප්රභේදය රට පුරා පැතිරී යෑම හැකිතාක් අවම කිරීම සඳහා රෝග නිවාරණ උපදෙස් අකුරටම පිළිපැදීම යි. එමෙන් ම කොවිඩ් එන්නතක් සඳහා තමන් සුදුසුකම් ලබා ඇති නම්, ලැබෙන මුල් අවස්ථාවේම එය ලබා ගැනීමෙන් ද මෙම ජාතික කර්තව්යයට සහයෝගය ලබා දිය හැක.
අප විශේෂයෙන් මතක තබා ගත යුතු කාරණය වන්නේ සෞඛ්ය උපදෙස් වලට අනුගත නොවී නිවසෙන් බැහැර ගොස් යළි නිවස වෙත පැමිණෙන සෑම අවස්ථාවකදීම නව වෛරස් ප්රභේද අපත් සමඟම නිවසට ඇතුළුවිය හැකි බවයි.
මෙමඟින් අවදානමට පත් වන්නේ ඔබේම සමීපතව ආශ්රය කරන ඔබගේ දෙමව්පියන්, දූ දරුවන් වැනි ආදරණීයයන් බැවින් සෑම විටම රෝග නිවාරණ උපදෙස් අකුරටම පිළිපැදිම ඔබේත් ඔවුන්ගේත් ආරක්ෂාව පිණිස ම හේතු වනු නොඅනුමානය.
