ප්රවීණ රංගන ශිල්පිනී මාලනී ෆොන්සේකා මහත්මිය සහ ශ්රී ලාංකේය සිනමාවේ සිහින කුමරා ලෙස හැඳින්වූ විජය කුමාරතුංගයන් අතර ආදර සම්බන්ධයක් පැවැතුණු බව මීට දශක ගණනාවකට පෙර අපේ රටේ බොහෝ දෙනෙක් විශ්වාස කළා. එකල සිනමා පුවත්පත්වල මේ පෙම් පලහිලව්ව ගැන නොයොක් ඕපාදූප පවා පළවුණා. ඒත් ඒ ගැන නිශ්චිත පිළිතුරක් දෙන්නට එදා මාලනී වගේම විජයත් ඉදිරිපත් වුණේ නැහැ. නමුත් මීට වසර කීපයකට පෙර මාලනී ෆොන්සේකා මහත්මියගෙන් මාධ්යවේදියකු විජය සමග පැවැති ආදර සම්බන්ධය ගැන විමසූ විට ඇය ලබාදී තිබුණේ මෙවැනි පිළිතුරක්. Sri Lanka Latest News
‘ගොඩක් ලස්සනයි ඒ කාලේ. ඒ ලස්සන සදාකාලිකයි. අපි හරි සතුටෙන්, හරි ආදරෙන් හිටියා. ඒත් ඒක වෙනස් වුණාම ගොඩාක් දුක් වුණා. පසුතැවිලි වුණා. නමුත් පස්සේ මම තේරුම් ගත්තා ඒකේ තේරුමක් නැහැ කියලා. ඒකෙම ගැලිලා අනේ අපෝ අපරාදේ කිය කියා අඬ අඬා වැටිලා ඉඳලා වැඩකුත් නැහැ. ඊට පස්සේ අපිට වෙනස් ජීවිතයක් තියෙනවා. ඊට පස්සේ එතැනින් වෙනස් වෙලා ආවා. නමුත් ඒ ආදරේ, ඒ අදරේ ලස්සනයි, ඒකේ සුන්දරකම, ඒකෙන් නිර්මාණවලට ලැබුණු සහාය, ඒක නිසා අපි දෙන්නට ආදරය කරපු ප්රේක්ෂකයෝ හරි සතුටක් ලැබුවා. හරි ආදරය කළා අපි දෙන්නට. ඒවා එහෙමම තියෙනවා. සදාකාලිකයි.
අද එතැනින් එහාට වෙනස් ජීවිත තියෙනවා. ඒ ගැන එහෙම තමයි මම හිතන්නේ. අතීතයත් එක්ක හිතලා බලනකොට මට එහෙම කෙනෙක් මුණගැහිලා නෑ අදටත්. වෙනස්ම කෙනෙක් එයා. ඇත්තටම එයා අපේ සිනමාවට, අපේ මහජනතාවට, අපේ දේශපාලන ක්ෂේත්රයට හැම එකකටම විජය කුමාරතුංග කියන නම හරි සුවිශේෂයි. අපේ රටේ පහළ වුණා. ඒක මට පෞද්ගලිකව විතරක් නෙවෙයි ලක්ෂ ගානක් ආදරේ කරන කෙනෙක්. මට තනි අයිතියට ඒ ගැන කතාකරන්න බැහැ. නමුත් මගේ ජීවිතයත් එක්ක බලනකොටත් මම ඒක හරිම සතුටෙන් මතක් කරනවා. ඒක නැතිවීම ගැනත් හරි කනගාටුවක් තියෙනවා. ඒ තිබුණු ආදරයත් වෙනම සුවිශේෂ දෙයක් හැටියට ජීවිතයේ පැත්තක තියලා තියෙනවා. ඔහු හරිම ආදරණීයයි. ඔහු හරි විශේෂ කෙනෙක්.’
(අන්තර්ජාලයෙන් උපුටා ගත්තකි)
