ලංකාවේ ජනාධිපතිවරු තේරී පත්වුණාම පළමු විදේශ සංචාරය යන්නේ ඉන්දියාවටය. 1994 ජනාධිපතිවරණය ජයගෙන චන්ද්රිකා පළමුව ගියේත් ඉන්දියාවටය. 2005 මහින්ද ජනාධිපති වී පළමුව ගියේ ඉන්දියාවටය. 2015 මෛත්රී ජනාධිපති වී පළමුව ගියේත් ඉන්දියාවටය. 2019 ගෝඨාභය ජනාධිපති වී පළමුව ගියේත් ඉන්දියාවටය. 2022 රනිල් පාර්ලිමේන්තු ඡන්දයෙන් ජනාධිපති වී ඉන්දියාවට ගියේ වසරකට පසුවය. එයට හේතුව ඊට පෙර රනිල්ට එන්න කියා ඉන්දියාවෙන් ආරාධනාවක් නොලැබුණු නිසාය. (Sri Lanka Latest News)
දකුණු ආසියාවේ රාජ්ය නායකයන් බලයට පත්වූ විට තම පළමු සංචාරය ඉන්දියාවට යෑම සම්ප්රදායකි. මේ සම්ප්රදාය කඩා ඇත්තේ ඉන්දියාවත් සමග එතරම් හොඳ හිතක් නැති මාලදිවයින් ජනාධිපති සහ මෑතකදී අගමැති ධුරයට පත් බංග්ලාදේශ අගමැතිය. දකුණු ආසියාවේ සම්බන්ධතා ගැන උනන්දුවක් දක්වන අය බලාගෙන ඉන්නේ ශ්රී ලංකාවේ නව ජනාධිපති අනුර කුමාර දිසානායක මාලදිවයින සහ බංග්ලාදේ ජනාධිපතිවරු අනුගමනය කරයිද කියාය. අනුර කුමාර ජනාධිපති වීමට පෙර පළමු විදේශ නිල සංචාරයකට ආරාධනා ලැබුණේ චීනයෙන්ය. ඔහු 2023 දෙසැම්බරයේ එම චීන සංචාරයට ගියත් එම සංචාරයට ප්රසිද්ධියක් ලබාදුන්නේ නැත. ඔහු ඉන්දියාවේ ආරාධනය මත ඉන්දීය සංචාරයකට ගියේ ඉන් පසුවය.
දැන් අනුර කුමාරට ඇත්තේ දුෂ්කර තේරීමකි. පළමුව ඉන්දියාවට යනවාද නැත්නම් චීනයට යනවාද කියන තේරීමය. ඔහු මේ දුෂ්කර තීරණය මැද සිරවී සිටියදී ඉන්දීය විදේශ ඇමැති මේ සතියේ ලංකාවට ඒමට නියමිතය. 2019 ගෝඨාභය ජනාධිපති වූ විගස ඉන්දීය විදේශ ඇමැති ලංකාවට පැමිණ ගෝඨාභය රාජපක්ෂ හමුවී ඔහුට පළමු විදේශ සංචාරය ලෙස ඉන්දියාවට පැමිණෙන ලෙස ආරාධනා කළේය. ගෝඨාභය ඉන්දියාවට ගියේය. පසුව ඔහුට චීනයෙන් ලැබුණු ආරාධනය ඔහු කොවිඩ් හේතුවක් ලෙස පෙන්වා මඟහැරියේය.
මේ සතියේ ලංකාවට පැමිණෙන ඉන්දීය විදේශ ඇමැතිවරයා අනුර කුමාරට ඉන්දියාවට පැමිණෙන ලෙස ආරාධනා කරනු ඇත. මීට පෙර හිටපු ජනාධිපති රනිල් ඉන්දියාවට ගිය වෙලාවේ ඉන්දීය අගමැතිට ලංකාවට ඒමට ආරාධනා කළේය. ඉන්දීය අගමැතිවරයා ඒ ආරාධනය පිළිගත්තද ආවේ නැත්තේ ලංකාවේ ජනාධිපතිවරණය නිසාය. ලංකාවේ නව ජනාධිපති අනුර ඒ ආරාධනය අලුත් කරයිද කියා තවම නිශ්චිතව කිව නොහැකිය. ඉන්දීය විදේශ ඇමැති ලංකාවට එන්නේ අදානිගේ ව්යාපෘති කැන්සල් කරන බවට අනුර ජනාධිපතිවරණය ආසන්නයේ 2024 සැප්තැම්බර් 16 ප්රකාශ කොට තිබියදීය.
අනුර කුමාරගේ සතියක පමණ පාලන කාලය දෙස බලන විට ඔහු සිස්ටම් එකේ ලොකු වෙනසක් නොකර යන්න වැඩි කැමැත්තක් දක්වන බව පෙනෙන්න තිබේ. විදේශ ඇමැති විජිත හේරත් කියන්නේ මෙය ඉන්ටරිම් කැබිනට් එකක් නිසා රාජ්ය යාන්ත්රණයට බාධා වන දේ නොකරන බවය. ඉන්දීය විදේශ ඇමැති ලංකාවට ආවාට තම විදේශ ප්රතිපත්තිය පැහැදිලි කිරීමට අනුරගේ ආණ්ඩුව මහ මැතිවරණය තෙක් කල් ගන්නා බව පෙනෙන්න තිබේ. ඒ අනුව ඔහුගේ පළමු විදේශ සංචාරයද මහ ඡන්දයට පසුව සිදුවනු ඇත.
