මෙරට තෙදින සංචාරයක නිරත ජාත්යන්තර මූල්ය අරමුදල කළමනාකාර අධ්යක්ෂ ක්රිස්ටලිනා ජෝර්ජියේවා මහත්මිය ඇතුළු නියෝජත පිරිස සමඟ අද (17) පෙරවරුවේ ජනාධිපති කාර්යාලයේදී සාකච්ඡාවක් පැවැත්විණි.Sri Lanka Latest News
එහිදී ශ්රී ලංකාවට ආර්ථික ස්ථාවරත්වය උදා කර ගැනීමේදී IMF ලබා දුන් සහයෝගයට ජනාධිපතිවරයා ස්තූතිය පළ කළ අතර, ‘දිට්වා’ ලෙස හඳුන්වන විශාල ආපදා තත්ත්වයකට සාර්ථකව මුහුණ දීමට හැකි වූයේ ද ආර්ථික ස්ථාවරත්වය නිසා බව පෙන්වා දුන්නේය.
‘දිට්වා’ අභියෝගය හමුවේ දේශපාලනය හා ආර්ථිකය එකිනෙකට පටලවා නොගෙන කටයුතු කළ බව අවධාරණය කළ ජනාධිපතිවරයා, උදාකරගත් ආර්ථික ප්රගතියේ ප්රතිලාභ සාමාන්ය ජනතාව වෙත ගලා යාම රජයේ ඊළඟ අරමුණ බව ද සඳහන් කළේය.
එමෙන්ම, ආපදා තත්ත්වය හමුවේ වැඩිම පීඩාවට පත් වූයේ ග්රාමීය අඩු ආදායම්ලාභී ජනතාව බව පෙන්වා දී, ඔවුන් ආර්ථික වශයෙන් නඟා සිටුවීම සහ මානව සම්පත් සංවර්ධනය සඳහා පුළුල් වැඩපිළිවෙළක් සැලසුම් කර ඇති බවත්, එම ක්රියාවලිය ඉදිරියට ගෙන යාමේදී IMF හි තවදුරටත් සහාය අපේක්ෂා කරන බවත් ප්රකාශ කළේය.
මෙහිදී අදහස් දැක්වූ කළමනාකාර අධ්යක්ෂවරිය, ආපදා සහන කටයුතු සඳහා IMF විසින් ශ්රී ලංකාවට හදිසි මූල්ය ආධාර ලබා දීමට පියවර ගෙන ඇති බව සඳහන් කළාය.
ආපදාවට පත් ජනතාවට සහන සැලසීම සඳහා රජය ගත් කඩිනම් පියවර සහ අභියෝග හමුවේ සැලසුම් සහගතව යළි නැඟී සිටීමට දක්වන කැපවීම ඇය ඇගයීමට ලක් කළාය.
සාර්ව ආර්ථික ස්ථාවරත්වය මත ආර්ථික වර්ධනයක් සම්පූර්ණ කිරීම සඳහා දෙපාර්ශ්වය අතර සමීප සහයෝගීතාව තවදුරටත් ශක්තිමත් කිරීමටද මෙහිදී එකඟතාව පළ විය.
මේ අතර ජනාධිපති අනුර කුමාර දිසානායක මහතා සහ මෙරට සංචාරයක නිරත එක්සත් රාජධානියේ නියෝජ්ය අග්රාමාත්ය David Lammy මහතා අතර හමුව අද (17) පෙරවරුවේ ජනාධිපති කාර්යාලයේදී පැවැත්විණි.
පසුගිය ආර්ථික අර්බුදයෙන් සහ මෑතකාලීනව සිදු වූ දිට්වා සුළි කුණාටුවෙන් පසු යළි ගොඩනැඟෙමින් සිටින අවස්ථාවක ශ්රී ලංකාවට පැමිණීම පිළිබඳ මෙහිදී එක්සත් රාජධානියේ නියෝජ්ය අග්රාමාත්යවරයා වෙත ස්තූතිය පළ කළ ජනාධිපතිවරයා නියෝජ්ය අග්රාමාත්යවරයාගේ මෙම සංචාරය ශ්රී ලංකාවේ යළි ගොඩනැගීමේ වැඩපිළිවෙළ පිළිබඳ ජාත්යන්තර විශ්වාසය තහවුරු කරන්නක් බවද සඳහන් කළේය.
එමෙන්ම, දිට්වා සුළි කුණාටුව හමුවේ මුහුණ දීමට සිදු වූ අමිහිරි අත්දැකීම සහ යළි ගොඩනැගීමේ වැඩපිළිවෙළ පිළිබඳ මෙහිදී නියෝජ්ය අග්රාමාත්යවරයා දැනුවත් කළ ජනාධිපති අනුර කුමාර දිසානායක මහතා, ඒ වෙනුවෙන් අවශ්ය විදේශ විනිමය උපයා ගැනීමේදී සංචාරක කර්මාන්තය, අපනයන සහ විදේශ ආයෝජන ඉහළ නංවා ගැනීමට අපේක්ෂා කරන බවත්, එහිදී සියලු මිත්ර රටවල සහාය අපේක්ෂා කරන බවත්, එක්සත් රාජධානියට එහිදී සුවිශේෂී කාර්යභාරයක් ඉටු කළ හැකි වනු ඇති බවත් සඳහන් කළේය.
එමෙන්ම එක්සත් රජධානිය සහ ශ්රී ලංකාව අතර පවතින දීර්ඝකාලීන මිතු දම සිහිපත් කරමින් සංචාරක ක්ෂේත්රය සහ අපනයන වෙළෙඳපොළ තුළ එක්සත් රාජධානිය මේ වන විට ශ්රී ලංකාවට ලබා දෙන පුළුල් දායකත්වයත්, විශේෂයෙන් ජාත්යන්තර මූල්ය අරමුදල සමඟ වන වැඩසටහනේදී සහ ණය ප්රතිව්යුහගතකරණ ක්රියාවලියේදී මෙන්ම ශ්රී ලංකාවේ ඇඟළුම සඳහා පනවා තිබු තීරු බදු ඉවත් කරමින් ලබා දුන් සුවිශේෂී සහායත් කෘතවේදීව අගය කළේය.
එක්සත් රාජධානීය සහ ශ්රී ලංකාව අතර බැඳීම ඉතා සුවිශේෂී බව මෙහිදී සඳහන් කළ නියෝජ්ය අග්රාමාත්ය David Lammy මහතා සෑම විටම ශ්රී ලංකාවට ඉතා සමීප රටක් ලෙස කටයුතු කිරීමට ලැබීම ඉතා අගය කරන බවත්, මේ වන විට ශ්රී ලංකාව අනුගමනය කරන ආර්ථික සහ සමාජ පරිවර්තනය වෙනුවෙන් අඛණ්ඩ සහාය ලබා දෙන බවත් ප්රකාශ කළේය.
එමෙන්ම, ශ්රී ලංකාවේ යළි ගොඩනැඟීමේ වැඩපිළිවෙළ සහ මානව හිමිකම් ආරක්ෂා කිරීම සහ සංහිඳියාව වෙනුවෙන් රජය ක්රියාත්මක කරන සෑම ධනාත්මක වැඩසටහනකදීම එක්සත් රාජධානියේ පූර්ණ සහාය ලබා දෙන බවටද නියෝජ්ය අග්රාමාත්යවරයා සහතික වූහ.
යුද්ධයෙන් පසු යළි ශ්රී ලංකාව ගොඩනැගීමේදී වත්මන් රජය අනුගමනය කරන වැඩසටහන් සහ ජනතාව වෙනුවෙන් ආරම්භ කර ඇති පුළුල් සංවර්ධන වැඩපිළිවෙළද ඇගයීමට ලක් කරමින් ඒ සඳහා සහාය ලබා දෙන බවටද වැඩිදුරටත් ප්රකාශ කළහ.
මෙම හමුවට ශ්රී ලංකාවේ බ්රිතාන්ය මහ කොමසාරිස් Andrew Patrick, උප අග්රාමාත්යවරයාගේ ජාත්යන්තර ඒකකයේ ප්රධානී David Meyer යන මහත්වරු ඇතුළු එක්සත් රාජධානියේ නියෝජත කණ්ඩායම සහ ශ්රී ලංකා රජය නියෝජනය කරමින් විදේශ කටයුතු, විදේශ රැකියා හා සංචාරක අමාත්ය විජිත හේරත්, ජනාධිපති ලේකම් ආචාර්ය නන්දික සනත් කුමානායක, ජනාධිපති ජ්යෙෂ්ඨ අතිරේක ලේකම් රෝෂන් ගමගේ යන මහත්වරු එක්ව සිටියහ.
ඉන්දීය අග්රාමාත්ය නරේන්ද්ර මෝදි මහතාගේ විශේෂ ආරාධනය අනුව ජනාධිපති අනුර කුමාර දිසානායක මහතා AI Impact Summit 2026 සඳහා සහභාගි වීමට අද (17) පස්වරුවේ ඉන්දියාව බලා පිටත්ව ගියේය.
කෘත්රිම බුද්ධිය මානව වර්ගයාගේ යහපත උදෙසා වගකීම් සහගතව භාවිත කිරීමේ අරමුණින් AI Impact Summit 2026 නවදිල්ලි නුවරදී පැවැත්වෙන අතර ජනාධිපති අනුර කුමාර දිසානායක මහතා ලබන 19 වන දා සමුළුව ඇමතීමට නියමිතය.
දින 05ක් පුරා පැවැත්වෙන සමුළුව සඳහා රටවල් 20ක රාජ්ය නායකයන් සහ රටවල් 45කට වැඩි සංඛ්යාවක නියෝජිතයන් සහභාගි වීමට නියමිතය.
එමෙන්ම, මෙම සමුළුවේදී කෘත්රිම බුද්ධි තාක්ෂණයේ අනාගත ගමන්මඟ සහ ගෝලීය අභියෝග ජය ගැනීමට එය භාවිත කළ හැකි ආකාරය පිළිබඳ දීර්ඝ ලෙස සාකච්ඡා කිරීමට නියමිතව තිබේ.
මෙම සංචාරය අතරතුර ජනාධිපතිවරයා ඉන්දීය අග්රාමාත්ය නරේන්ද්ර මෝදි මහතා ඇතුළු රාජ්ය නායකයන් කිහිප දෙනෙකු සමඟ ද්විපාර්ශ්වික සාකච්ඡා පැවැත්වීමටද නියමිතය.
ජනාධිපති මාධ්ය අංශය
2026-02-17
