ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්යාංශයට අදාළව 2026 වසරේ වෙන් කෙරුණු අයවැය ප්රතිපාදන මත ක්රියාත්මක ව්යාපෘතිවල ප්රගතිය සමාලෝචනය සහ 2027 වසරේ අයවැය යෝජනා පිළිබඳ පූර්ව අයවැය සාකච්ඡාවක් ජනාධිපති අනුර කුමාර දිසානායක මහතාගේ ප්රධානත්වයෙන් ජනාධිපති ලේකම් කාර්යාලයේදී ඊයේ (07) පස්වරුවේ පැවැත්විණි.Sri Lanka Latest News
සමාජ සුබසාධන ක්රමවේදයන් යටතේ ප්රතිලාභ ලබන සෑම පවුල් ඒකකයක්ම සැබෑ ලෙසම සවිබල ගැන්වෙන්නේද යන්න මැනිය හැකි විධිමත් මිණුම් ක්රමවේදයක් සකස් කර ගනිමින්, ඒ මත පදනම්ව ශක්තිමත් සමාජ ආරක්ෂණ ජාලයක් ගොඩනැගීම රජයේ අපේක්ෂාව බව ජනාධිපති අනුර කුමාර දිසානායක මහතා මෙහිදී ප්රකාශ කළේය.
ඒ අනුව විවිධ ආයතන මගින් විසිරි පවතින ප්රතිපාදන ඒකාබද්ධ කර, නිෂ්චිතව හඳුනාගත් පවුල් ඒකක ඉලක්ක කරගනිමින් දුගී බව තුරන් කිරීමේ විද්යාත්මක වැඩපිළිවෙළක් ක්රියාත්මක කළ යුතු බව මෙහිදී ජනාධිපතිවරයා අවධාරණය කළේය.
මෙහිදී ප්රජා සංවර්ධනය අරමුණු කර ගත් ප්රජා ශක්ති වැඩසටහන සහ අනෙකුත් ග්රාමීය සංවර්ධන කටයුතු සඳහා වෙන් කර ඇති ප්රතිපාදන ප්රාදේශීය සභා මට්ටමින් ව්යාපෘති සඳහා බෙදී ගොස් ඇති ආකාරය සහ එහි වත්මන් ප්රගතිය පිළිබඳව ජනාධිපතිවරයාගේ විශේෂ අවධානය යොමු විය.
එසේම ප්රජා සංවර්ධනය වෙනුවෙන් අපනයන විභවතාව සහිත ව්යවසායකයන් දිරිමත් කිරීම සඳහා හඳුනාගත් ව්යාපෘති වෙනුවෙන් අමාත්යාංශය මඟින් යෝජිත ණය සහ ආධාර ලබා දීමේ වැඩපිළිවෙළ පිළිබඳ අමාත්යාංශ නිලධාරීන් විසින් ජනාධිපතිවරයා දැනුවත් කරන ලදී.
තවද මෙම වසර තුළ අස්වැසුම ප්රතිලාභී පවුල් ලක්ෂ දෙකක් ඵලදායී ආර්ථික ක්රියාවලියකට යොමු කර ඔවුන් සහනාධාර මත යැපීමෙන් මුදවා ගැනීමට සැලසුම් කර ඇති බවත් මේ වන විට පවුල් 16,000ක් සඳහා මනෝ-සමාජීය සහ ආර්ථික සහාය ලබා දීමේ වැඩසටහන් ආරම්භ කර ඇති බවත් මෙම සාකච්ඡාවේදී වැඩිදුරටත් අනාවරණය කෙරිණි.
මේ පිළිබඳ අදහස් දැක්වූ ජනාධිපතිවරයා අඩු ආදායම්ලාභීන් හුදෙක් සහනාධාර මතම රඳවා නොගෙන, අර්ධ කාලීන ශ්රම දායකත්වයන් සඳහා ඔවුන් යොමු කිරීම වැදගත් බවත්, ඒ වෙනුවෙන් වැවිලි ක්ෂේත්රය වැනි අංශයන්හි පවතින විභවතාව පිළිබඳවත් පෙන්වා දෙන ලදී.
එසේම කිසිදු ශ්රම දායකත්වයක් ලබා දිය නොහැකි ආබාධිත, වැඩිහිටි හෝ නිදන්ගත රෝගීන් සහිත පවුල් රජය විසින් පූර්ණ ලෙස රැක බලා ගන්නා අතර, ශ්රම ශක්තිය සහිත ඉතිරි පිරිස සහනාධාර ලබා ගන්නා අතරතුර රටේ නිෂ්පාදන ක්රියාවලියට ඔවුන්ගෙන් ලබා ගත හැකි දායකත්වය පිළිබඳවද මෙහිදී දීර්ඝ ලෙස සාකච්ඡා කෙරිණ.
තවද එක් එක් අමාත්යාංශය වෙන් වෙන්ව මුදල් වැය කරනු වෙනුවට, පවුල් ඒකකයක අවශ්යතා නිවැරදිව හඳුනාගත් “පවුල් සංවර්ධන සැලැස්මක්” සකස් කිරීමේ වැදගත්කම ජනාධිපතිවරයා මෙහිදී පෙන්වා දුන්නේය.
එසේම ආසියානු සංවර්ධන බැංකුව, ලෝක බැංකුව වැනි විදේශ ආධාර සහ රජයේ ප්රතිපාදන යටතේ ක්රියාත්මක සවිබල ගැන්වීමේ කටයුතු පිළිබඳව මෙහිදී විශේෂ අවධානය යොමු විය.
රැකියාවේ නියුතු මව්වරුන්ට සහනයක් ලෙස සහ ආබාධ සහිත දරුවන් වෙනුවෙන් දැනට සැලසුම් කර ඇති දිවා සුරකුම් මධ්යස්ථාන 10ක මේ වසර තුළ අවසන් කිරීමටත් ඉදිරි වසර කිහිපය තුළ දිවයින පුරා මෙවැනි මධ්යස්ථාන 50 ක් ඉදිකිරීමේ ඉලක්කයක් කරා ගමන් කරන ලෙසත්, ඒ සඳහා අවශ්ය සැලසුම් සකස් කරන ලෙසත් ජනාධිපතිවරයා මෙහිදී නිලධාරීන්ට උපදෙස් දුන්නේය.
එසේම ආබාධිත පුද්ගලයන් සඳහා පොලිස් ස්ථාන, රෝහල් සහ ප්රාදේශීය ලේකම් කාර්යාල වැනි පොදු ස්ථානවල ප්රවේශ පහසුකම් සැලසීම සඳහා රුපියල් මිලියන 283ක ව්යාපෘති ක්රියාත්මක බවද ජාතික සමාජ සංවර්ධන ආයතනය මගින් පවත්වාගෙන යනු ලබන දායකත්ව විශ්රාම වැටුප් ක්රමය නවීන තාක්ෂණය ඔස්සේ වඩාත් ආකර්ෂණීය සහ විනිවිදභාවයකින් යුතුව පවත්වාගෙන යාමට අවශ්ය පියවර ගෙන ඇති බවද මෙහිදී අනාවරණය කෙරිණි.
ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්ය ආචාර්ය උපාලි පන්නිලගේ, නියෝජ්ය අමාත්ය වසන්ත පියතිස්ස, ජනාධිපති ලේකම් ආචාර්ය නන්දික සනත් කුමානායක, ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති, ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, මුදල්, ක්රමසම්පාදන සහ ආර්ථික සංවර්ධන අමාත්යාංශයේ ලේකම් හර්ෂණ සූරියප්පෙරුම, ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්යාංශයේ ලේකම් එම්.ඒ. එල්. එස්.එන්. කේ මන්ත්රීනායක යන මහත්වරු, මුදල්, ක්රමසම්පාදන සහ ආර්ථික සංවර්ධන අමාත්යාංශයේ සහ ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්යාංශයේ නිලධාරීහු පිරිසක් මෙම අවස්ථාවට සහභාගි වූහ.
ජනාධිපති මාධ්ය අංශය
2026-07-08
