රුවන්පුර අධිවේගී මාර්ගය ඉදි කිරිම වෙනුවෙන් ඉඩම් සහ දේපල පවරා ගැනීම නිසා අගතියට පත් ජනතාව සිය ගැටලු ඉදිරිපත් කිරීම සඳහා රුවන්පුර අධිවේගී මාර්ගයේ අගතියට පත් වූවන්ගේ ඒකාබද්ධ සංගමයේ සාමාජිකයන් රැසක් විපක්ෂ නායක සජිත් ප්රේමදාස මහතා හමුවීමට විපක්ෂ නායක කාර්යාලයට පැමිණියේය.Sri Lanka Latest News
විපක්ෂ නායක සජිත් ප්රේමදාස මහතා විසින් ක්රියාත්මක කරන Citizens’ Voice නම් පුරවැසියන් මුහුණ දෙන ගැටලු ඉදිරිපත් කිරිමට ආරම්භ කර ඇති වැඩසටහන සඳහා මෙම ගැටලු ඉදිරිපත් කර තිබේ.
එහි දී රුවන්පුර අධිවේගී මාර්ගයේ පළමු අදියර යටතේ ඉංගිරියේ සිට කහතුඩුව දක්වා කොටස ඉදිකිරීමට 2014 වර්ෂයේ දී පවුල් 2900කට වැඩි සංඛ්යාවකගේ ඉඩම්, දේපල පවරාගෙන ඇති මුත් 2023 වසර වන විට වන්දි ගෙවීම අක්රමවත් වීමත්, අධිවේගී මාර්ගයේ කටයුතු අතරමග නතර වීමත් නිසා මේ ජනතාව අගතියට පත්ව තිබේ. වසර 12කට වැඩි කාලයක් තම උපන් භුමියේ සරණාගතයන් බවට පත්ව ඇති මෙම ජනතාව තම ගැටලුවලට එතෙක් පැවැති කිසිදු රජයකින් විසඳුම් නොලැබුණු නිසා විපක්ෂ නායක සජිත් ප්රේමදාස මහතා හමුවී ඉදිරිපත් කරන ලදී.
ඒ අනුව මෙම ගැටලු නුදුරේදී පාර්ලිමේන්තුව හමුවේ ඉදිරිපත් කර ඒවාට රජයේ අවධානය ලබා දී විසඳුම් ලබා දීමට විපක්ෂ නායක සජිත් ප්රේමදාස මහතා පැමිණ සිටි පිරිස හමුවේ පවසන ලදී.
