උසස් පෙළ විභාගයට පෙනීසිටීමට නියමිත සිසුන් විශාල පිරිසකට මෙවර තමන් උගත් පාසලෙන් බැහැරව පෞද්ගලිකව අයැදුම්පත් යොමුකර විභාගයට පෙනී සිටින්නැයි දිවයිනේ පාසල් බොහොමයක විදුහල්පතිවරු පවසා ඇතැයි මවුපියෝ චෝදනා කරති. Sri Lanka Latest News
මෙම තත්ත්වයට මුහුණ පා ඇත්තේ අධ්යයන කටයුතු සඳහා පාසල් පැවැත්වෙන දිනයන්ගෙන් 80%ක් ආවරණය කර නොමැති සිසුන්ට වන අතර ගෙවීගිය කාලයෙහි පාසල් සිසුන් විශාල පිරිසක් මෙම 80% පැමිණීමේ ප්රතිශතය ඉටු නොකළ සිසුන්ගේ සංඛ්යාවද ඉහළ නැග ඇතැයි පැවසේ.
2006 වසරේ අධ්යාපන අමාත්යාංශය නිකුත් කර ඇති, 2006/45 දරන චක්රලේඛය පාදක කොට ගෙන විදුහල්පතිවරු, මෙම තීරණයට එළඹ සිටින බව කීවද, ඉහත චක්රලේඛයට අනුව 80%ක ශිෂ්ය පැමිණීමක් අවශ්ය වුවද, පිළිගත හැකි හේතූන් මෙන්ම වෛද්ය සහතික ඉදිරිපත් වන අවස්ථාවලදී සිසුන්ට පාසල් මට්ටමෙන් විභාගයට පෙනීසිටීමේ අවස්ථාව ලබාදිය යුතු බවද මවුපියෝ පෙන්වා දෙති.
රට කොවිඩ් අර්බුදයට මෙන්ම ආර්ථික අර්බුදයට මුහුණ පෑ අවස්ථාවල පවා ළමුන්ගේ පාසල් පැමිණීම උදෙසා නිකුත්කර තිබූ චක්රලේඛය නොසලකා හැර කටයුතු කර ඇතැයි පෙන්වා දෙන මවුපියෝ, විභාගයට ආසන්නව තිබියදී එබඳු පාසල් දරු දැරියන්ට පාසලෙන් අස්වීමේ සහතික ලබාදී, පෞද්ගලිකව විභාගයට පෙනීසිටින ලෙස විදුහල්පතිවරු ප්රකාශ කර තිබීම බලවත් අසාධාරණයකැයිද වැඩිදුරටත් පෙන්වා දෙති.
දරුවකුගේ විභාගයට පෙනී සිටීමේ අයිතියට හරස් කැපීම කිසිවකු අනුමත නොකරන බවද, පාසලක ඉගෙනුම ලබන දරුවකුගේ අවසන් ඉලක්කය විභාගයට වාඩිවීම බවද, මෙම අයිතියට බාධා පැමිණවීමට කිසිවකුට අයිතියක් නැතැයිද පෙන්වා දෙන ලංකා ගුරු සංගමයේ ලේකම් ජෝශප් ස්ටාලින් මහතා පැවසුවේ, මෙවැනි චෝදනා දිවයිනෙන්ම වාර්තා වී ඇති බැවින් අධ්යාපන අමාත්යාංශයේ බලධාරීන් මැදිහත් වී පවතින ගැටලුවට ඉක්මන් සාධාරණ විසඳුමක් ලබාදිය යුතු බවය.
නන්දන ශ්රී දොරකුඹුර
