ආර්.එෆ්.එම්.සුහෙල් – නුවරඑළිය
කොටගල වතු සමාගමට අයත් එතනසයිඩ් (Etonside) වතුයායේ වතු කළමනාකරු සහ කම්කරුවන් අතර ඇති වූ වැටුප් ආරවුලක් දුරදිග යාමෙන්, එක් කම්කරුවෙකුගේ වැඩ තහනම් කිරීමට විරෝධය පා ඔහු ඊයේ (26) සිට එම වතුයායේම උපවාසයක් ආරම්භ කර තිබේ.Sri Lanka Latest News
පසුගිය 25 වැනිදා වතු කම්කරුවන්ගේ දෛනික වැටුප සහ නෙළන ලද තේ දළු ප්රමාණය ගණනය කිරීමේදී ඇති වූ ගැටලුවක් සම්බන්ධයෙන් සාකච්ඡා කිරීමට ගිය අවස්ථාවේදී වතු කළමනාකරු සහ කම්කරුවන් අතර උණුසුම් වචන හුවමාරුවක් සිදුව ඇත.
එම සිද්ධියෙන් අනතුරුව වතු පාලනාධිකාරිය විසින් එතනසයිඩ් වතුයායේ පදිංචි 43 හැවිරිදි ජේදේව ප්රකාශන් නමැති කම්කරුවාගේ වැඩ තහනම් කිරීමට පියවර ගෙන තිබේ.
තමන්ට සිදු වූ අසාධාරණයට විසඳුම් ඉල්ලා ජේදේව ප්රකාශන් නමැති මෙම කම්කරුවා ඊයේ සිට නිරාහාරව උපවාසයේ නිරත වන අතර, ඔහුට සහයෝගය පළ කරමින් වතුයායේ සෙසු කම්කරුවෝ ද අද වැඩ වර්ජනයක නිරත වෙමින් විරෝධය පළ කරති.
තමන් නෙළන දළු ප්රමාණය නිසි ලෙස ගණනය නොකිරීම සහ සේවකයින්ට සිදු කරන හිරිහැර වහා නතර කළ යුතු බව කම්කරුවෝ පවසති.
මෙම ගැටලුව සම්බන්ධයෙන් විමසීමට අප වතු කළමනාකාරීත්වය සම්බන්ධ කර ගැනීමට උත්සාහ කළ ද, ඔහු එම අවස්ථාවේ වතුයායේ නොමැති බවත්, ඒ පිළිබඳ ප්රකාශයක් ලබා දිය නොහැකි බවත් වතු කාර්යාලයේ සේවිකාවන් පවසා සිටියේය.
