සොරකමක් සම්බන්ධයෙන් අත්අඩංගුවට ගනු ලැබූ 15 හැවිරිදි පිරිමි දරුවෙකුට අමානුෂික ලෙස පහර දී කෲර වධහිසා පැමිණ වීමේ චෝදනාවලට වරදකරු වූ පොලිස් නිලධාරීන් සිව්දෙනෙකුට බලපිටිය මහාධිකරණ විනිසුරු ප්රියන්ත ලියනගේ අද (සැප්තැම්බර් 11) බරපතළ වැඩ සහිත සිර දඬුවම් සහ දඩ නියම කළේ ය.Sri Lanka Latest News
මීටියාගොඩ පොලිස් වසමේ ඩොමි ජයවර්ධන මාවතේ පදිංචි 15 හැවිරිදි පිරිමි දරුවෙකු සොරකම් කිරීමේ චෝදනාව යටතේ 2008 මාර්තු 07 වන දින අත්අඩංගුවට ගෙන මීටියාගොඩ පොලිස් ස්ථානයේ රඳවාගෙන අමානුෂික ලෙස පහර දී කෲර වධහිංසා පැමිණවීම සම්බන්ධයෙන් එවකට මීටියාගොඩ පොලිසියේ රාජකාරි කළ ප්රධාන පොලිස් පරීක්ෂක නිස්සංක, පොලිස් පරීක්ෂක අතුකෝරළ, පොලිස් සැරයන් තුසිත (58438) සහ පොලිස් සහායක ලලින්ද සොයිසා තිරිමාදුර යන සිව් දෙනාට එරෙහිව මානව හිමිකම් කොමිසම විසින් බලපිටිය මහාධිකරණයේ අධිචෝදනා ගොනු කරනු ලැබ තිබිණි.
පැමිණිල්ල විසින් නඩුව සාධාරණ සැකයෙන් තොරව ඔප්පු කර ඇති බවට තීරණය කළ මහාධිකරණ විනිසුරුවරයා විත්තිකරුවන්ට දඩ සහ සිර දඬුවම් නියම කළේ ය.
පොලිස් නිලධාරීන්ට පැමිණවූ දඬුවම්
ඒ අනුව මේ වනවිට විශ්රාම ලබා සිටින පළමුවන විත්තිකාර ප්රධාන පොලිස් පරීක්ෂකවරයාට වසර අටක ලිහිල් වැඩ සහිත සිර දඬුවමක් ද, රුපියල් ලක්ෂයක දඩයක් ද, දඩය නොගෙවන්නේ නම් තවත් මාස හයක ලිහිල් සිර දඬුවමක් ද, පැමිණිලිකරුට රුපියල් ලක්ෂයක වන්දි මුදලක් ද, වන්දිය නොගෙවන්නේ නම් තවත් වසරක දඬුවමක් ද නියමවිය.
මේ වන විට ඇල්පිටිය කොට්ඨාසයේ රාජකාරි කරනු ලබන දෙවන විත්තිකාර පොලිස් පරීක්ෂකවරයාට බරපතළ වැඩ සහිත වසර නවයක සිර දඬුවමක් සහ රුපියල් ලක්ෂයක දඩයක් ද, දඩය නොගෙවන්නේ නම් තවත් වසරක සිර දඬුවමක් ද, රුපියල් ලක්ෂයක වන්දි මුදලක් ද එය නොගෙවන්නේ තවත් වසරක සිර දඬුවමක් ද නියම විය.
