ශ්රී ලංකාවේ දේශපාලනය කොයි අතට යාද නොදන්නා කාලයක් ගතකරමින් අපි ඉන්නේ. ලංකාවේ දේශපාලනයේ හැරවුම් ලක්ෂ්යයක් නිර්මාණය වෙලා බව අපිට පෙනෙනවා සහ දැනෙනවා. ඒකට හේතුව තමයි මෙතෙක් ශ්රී ලංකා පාර්ලිමේන්තුවට පත්වුණේ කාලයක් තිස්සේ අපි දන්න කියන නම් තියෙන උදවිය. නමුත් දැන් නොදන්නා නම් පාර්ලිමේන්තුවට ඇවිල්ලා ඉවරයි. මේක වුණේ ලංකාවේ මහජනතාවගේ ඡන්දයෙන්. ඒ නිසා කිසිවෙක්ට මේ කාරණාව සම්බන්ධයෙන් චෝදනා කරන්න හෝ එහෙම දේවල් වෙන එක වැරැදියි කියන්න බෑ. Sri Lanka Latest News
පාර්ලිමේන්තුවට අලුත් මුහුණු පැමිණීම දේශපාලන සංක්රාන්තියක් බව අපි කාලයක් තිස්සේ විශ්වාස කළා. එයට හේතුව විදියට තිබුණේ ලංකාවේ පාර්ලිමේන්තුවට එක දිගටම පත්ව ආපු පරම්පරා දේශපාලකයෝ පට්ට හොරු කියලා මිනිස්සු තුළ අදහසක් ආපු නිසා. කාලයක් දේශපාලනයට ආපු චරිතවල වැරැදි අඩුපාඩු මිනිස්සු දැක්ක නිසා. කාලයක් දේශපාලනයට ආපු මිනිස්සු ඇත්තටම හොරකම් කරපු නිසා. දූෂණ කරපු නිසා. රට නොහදපු නිසා. ඒ නිසා අලුතෙන් ආපු පාර්ලිමේන්තුව ඉතාම සුබවාදී සහ සුන්දර තැනක් වේවි කියලා අපි විශ්වාස කළා. දැන් එහෙම වෙලාද? සමහර විට එහෙම වෙලා කියලා පේන අවස්ථා ගොඩක් තියෙනවා. ලංකාවේ අලුතෙන් දේශපාලනයට ආපු අලුත් මුහුණු ඉතා හොඳින් තමන්ගේ දේශපාලන රාජකාරිය කරමින් ඉන්නා ආකාරය අපිට හඳුනාගන්න පුළුවන්. ඒ අතරතුරේ සමහර අය කියන සමහර කතා ඉතා ප්රශ්නගතයි සහ ඉතා ආන්දෝලනාත්මකයි. ඒ විදියේ සිද්ධියක් තමයි පාර්ලිමේන්තුවේ වැඩියෙන්ම කෑගහන අයගේ නම් ලැයිස්තුවක් හදාගන්න, ඒගොල්ලෝ තමයි ඉස්සෙල්ලාම හිරේ යන්නේ කියලා මාලිමා මන්ත්රී දිනිඳු සමන් හෙන්නායක කියපු කතාව. මේ කතාව මේ වචනවලින්ම නොකිව්වට මේ ආකාරයේ වචනාර්ථ සහිතව ප්රකාශයක් කළ බව අපට දැනගන්න ලැබුණා.
පාර්ලිමේන්තුවේදී ඕනෑම අයෙකුට ඕනෑම ප්රකාශයක් කරන්න පුළුවන්. ඒ පිළිබඳ ප්රශ්න කරන එක හෝ ඒ පිළිබඳ සාකච්ඡා කරන්න අපිට කිසිම අයිතියක් නෑ. ඇත්තටම එවැනි ප්රකාශයක් කළා නම් ඒ අර්ථය දෙන ප්රකාශයක් කළා නම් එය රටේ කොයි තරම් ආන්දෝලනාත්මක ප්රකාශයක්ද? මොකද ඒකට හේතුව අපි දන්නවා ලංකාවේ දේශපාලකයෝ වැරැදි කළා නම් හොරකම් කළා නම් නරක විදියට හැසිරුණා නම් දූෂණ වංචා සහිත අය නම්, මනුෂ්ය ඝාතනවලට ඍජුව හෝ වක්රව සම්බන්ධයි නම් වෙනත් කුමන හෝ ආකාරයක වරදක් කරලා තියෙනවා නම් ඒ පුද්ගලයෝ අත්අඩංගුවට ගැනීම සම්බන්ධව අපිට කිසිම ප්රශ්නයක් නෑ. ඒ මිනිස්සුන්ට දඬුවම් කිරීම සම්බන්ධයෙන් අපිට ප්රශ්නයක් නෑ. ජීවිතාන්තය දක්වා සිර දඬුවම් දෙන්න, එහෙම නැත්නම් එල්ලලා මරන්න. අපි ඒවා ගැන වාද කරන්නේ නෑ. මේක පාර්ලිමේන්තුවේ අභිමතය පරිදි සිද්ධ වෙන්න පුළුවන් දෙයක් නෙවෙයි. අධිකරණමය ක්රියාමාර්ගයකට ගිහිල්ලා අධිකරණය ස්වාධීනව පරීක්ෂණය කරලා ඒ සම්බන්ධයෙන් අධිකරණ තීන්දුවක් ලබාදුන්නට පස්සේ ඒ පුද්ගලයෝ හිරේ දාන්න හෝ කුමන හෝ දඬුවමක් දීම ගැන අපිට කිසි ප්රශ්නයක් නෑ.
නමුත් පාර්ලිමේන්තුවේදී කතා කරන අයව තර්ක කරන අයව වාද කරන අයව ලැයිස්තුවක් හදලා ඒගොල්ලන්ව හිරේ දාන්න කවුරු හරි සැලසුම් කරගෙන ඉන්නවා නම් ඒක බරපතළ තත්ත්වයක්. මේක බරපතළ ප්රශ්නයක්. ලංකාවේ දේශපාලකයෝ කීප දෙනෙක් මේක ප්රශ්න කරලා තිබුණා. උදය ගම්මන්පිලලා, විමල් වීරවංශලා මේ ගැන ප්රශ්න කරද්දී විපක්ෂ නායකතුමාත් ඒ සම්බන්ධයෙන් පාර්ලිමේන්තුවේදී යම් කාරණා මතුකරමින් ප්රශ්න කරන්න සූදානම් වෙලා තිබුණ බව අපි දැක්කා. අපි ඇත්තටම දේශපාලන වෙනසක් බලාපොරොත්තු වුණා මිසක් දේශපාලනයේ මෙවැනි පලිගැනීම්, උපක්රමශීලීව මිනිස්සු හිරේ දැමීම්, වැඩිපුරම කෑගහන කෙනාව හිරේ දාන එක බලාපොරොත්තු වුණේ නෑ. ඒ වගේම අපි දන්නවා ලංකාවේ එක්තරා අවස්ථාවකදී කියැවුණු බව කියනවා පාර්ලිමේන්තුවක් දාන්න වෙයි කියලා හිර ගේ ඇතුළේ. පාර්ලිමේන්තුවක් හිර ගේ ඇතුළේ දාන්න වෙන්නේ වැරැදිකාරයෝ අත්අඩංගුවට අරගත්තට පස්සේ. අපි දන්නවා බටලන්ද කොමිසමේ ඉඳලම ලංකාවේ ප්රශ්න දැන් සාකච්ඡා වෙමින් තියෙනවා. ඒවායේ මනුෂ්ය ඝාතන සම්බන්ධව, 89, 71 විවිධ චෝදනා සහිත පුද්ගලයන්ව අත්අඩංගුවට ගන්න පුළුවන්කමක් තියෙනවා. ඒවා කරන්නේ කොහොමද, ඒවාට අවශ්ය කරන පියවර ගන්නේ කොහොමද කියලා අපි අලුතෙන් කියලා දෙන්න අවශ්ය නෑනේ.
යම්කිසි පුද්ගලයෙක් වැරැදිකාරයෙක් නම්, අධිකරණමය ක්රියාමාර්ගයක් ඔස්සේ ඔහුගේ වරද ඔප්පු වෙලා තියෙනවා නම්, ඒ සම්බන්ධයෙන් පරීක්ෂණ කරලා තියෙනවා නම්, සාධාරණ ක්රමවේද ඔස්සේ ඔහුට දඬුවම් කරන්න පුළුවන් නම් ඒවා කළාට අපිට කමක් නෑ. නමුත් විපක්ෂයේ වීම නිසා, තමන්ට විරුද්ධ වීම නිසා, පාර්ලිමේන්තුව ඇතුළේ කෑකෝ ගහන නිසා හිරේ දානවා නම් එවැනි සිදුවීම් තරයේ හෙළාදකින්න අපිට මාධ්යවේදීන් විදියට සිද්ධ වෙනවා. එවැනි තත්ත්වයන් යටතේ ලංකාවේ පාර්ලිමේන්තුව ඇතුළේ මේ වෙලාවේ වැඩියෙන්ම කෑගහන අයගේ ලැයිස්තුවක් ඔබට හදාගන්න පුළුවන්. ඒ ලැයිස්තුවේ ඉන්න අයව කොයි කොයි අවස්ථාවලදීද සිරගත වෙන්නේ කියලත් ඔබට බලාගෙන ඉන්න පුළුවන්.
මෙවැනි කතන්දර හරහා අනියමින් කියැවෙන අනිත් වැදගත්ම දේ ඔබ පාර්ලිමේන්තුවේ කට පියාගෙන ඉන්නවා නම් ඔබ කොච්චර වැරැදි වුණත් ප්රශ්නයක් නෑ, ඔබව හිරේ දාන්නේ නෑ කියන එක. ඔබ පාර්ලිමේන්තුවෙදී කෑගහනවා නම්, ඔබ කොච්චර නිවැරැදි වුණත් වැඩක් නෑ ඔබව හිරේ දානවා. එතකොට හිරගත වීමට, දඬුවම් විඳීමට වරද වෙන්නේ පාර්ලිමේන්තුවේදී මේ ආණ්ඩුවට විරුද්ධ වීම පමණයි. එහෙම නම් අපේ රටේ ප්රධාන වරද වෙන්නේ ආණ්ඩුවට විරුද්ධ වීමද? පාර්ලිමේන්තු මන්ත්රීවරයෙක් විසින් කරන ප්රධානම වරද, ලොකුම වරද ආණ්ඩුවට විරුද්ධ වීම කියලා හිතනවා නම් යම් කිසි දේශපාලකයෙක්, එවැනි දේශපාලකයන් අතින් පාලනය වීම තමයි මේ මොහොතේ තියෙන භයානකම දේ. කවුරු හරි හිතනවා නම් නෑ, මේ තමයි හොඳම පාලනය, මේ තමයි හොඳම අය, මේ තමයි හොඳම ක්රමය කියලා, නෑ මිත්රවරුනි, මීට වඩා හොඳයි කලින් තිබුණු තත්ත්වය කියලා ඔබට හිතේවි ඉතාම ඉක්මනට.
ජීවන පහන් තිළිණ
