රජයේ සේවකයන්ට ලබන වසරේ ජනවාරියේ සිට වැටුප් වැඩිකිරීමට අදාළව කැබිනට් අනුමැතිය ලබාගත්බව රජය වරින් වර ප්රකාශයට පත්කළත් එවැනි කැබිනට් පත්රිකාවක් සම්මත කරගෙන නැති බව මැතිවරණ කොමිසම හෙළිකරයි. (Sri Lanka Latest News)
මේ සම්බන්ධයෙන් මැතිවරණ නිරීක්ෂණ සංවිධාන ඇතුළු විවිධ පාර්ශ්ව මැතිවරණ කොමිසමට පැමිණිලි ගණනාවක් කර තිබේ.
ඒ සම්බන්ධයෙන් මැතිවරණ කොමිසමෙන් විමසූ විට කොමිසම කියා සිටියේ එවැනි කැබිනට් පත්රිකාවක් නොමැති බව කොමිසමටද තහවුරු වී ඇති බවයි.
මේ අතර මැතිවරණ කොමිසමේ සභාපති ආනන්ද රත්නායක මහතා කියා සිටින්නේ කොමිසමට ලැබෙන පැමිණිලි සියල්ල පිළිබඳ නීතිය ක්රියාත්මක කරන බවයි. නිදහස් හා සාධාරණ මැතිවරණයක් සඳහා මැතිවරණ කොමිසම දැඩි කැපවීමෙන් කටයුතු කරන බවද හෙතෙම සඳහන් කරයි. ඒ අනුව කිසිදු පාර්ශ්වයකට මැතිවරණ නීති උල්ලංඝනය කිරීමට ඉඩ නොතබන බවද පවසයි.
මේ සම්බන්ධයෙන් පැෆ්රල් සංවිධානයේ විධායක අධ්යක්ෂ රෝහණ හෙට්ටිආරච්චි මහතාද කියා සිටියේ රාජ්ය සේවක වැටුප් වැඩිකිරීමට අදාළ කැබිනට් පත්රිකාවක් නොමැති බවයි. රාජ්ය සේවක වැටුප් වැඩිකිරීමට අදාළව කළ ප්රකාශ සම්බන්ධයෙන් පැෆ්රල් සංවිධානයද කොමිසමට පැමිණිලි කළ බවද හෙතෙම කියයි.
ජනාධිපතිවරණයක් ප්රකාශයට පත්කර තිබියදී කැබිනට් මණ්ඩලයට ගත් තීරණ බව කියමින් රජයේ සේවක වැටුප් වැඩිකිරීම, ගොවි ණය කපාහැරීම ආදිය සම්බන්ධව කැබිනට් තීරණ බව කියමින් ප්රකාශයට පත්කිරීම මැතිවරණ නීතිය අමු අමුවේ උල්ලංඝනය කිරීමකැයිද හෙට්ටිආරච්චි මහතා පවසයි.
මේ ආකාරයට පාලකයන් විසින් ඡන්දදායකයන් නොමග යැවීමට කරුනු ලබන මෙම හුදු ප්රකාශවලට නොරැවටෙන ලෙසද ඒ මහතා ජනතාවගෙන් ඉල්ලා සිටියි. ජනාධිපතිවරණයක් වැනි රටක ඉතා තීරණාත්මක මැතිවරණයකදී මේ ආකාරයට ආණ්ඩුව කටයුතු කිරීම සදාචාරය සම්බන්ධ ප්රශ්නයකැයිද හෙට්ටිආරච්චි මහතා කියයි.
රාජ්ය සේවක වැටුප් මේ මොහොතේ ප්රායෝගිකව වැඩිකිරීමට නොහැකි බවත් යම් හෙයකින් එලෙස ක්රියා කරන්නේ නම් මැතිවරණ කොමිසමට එය නතර කළ හැකි බවද ඒ මහතා පෙන්වා දෙයි.
රාජ්ය සේවක වැටුප් ඉහළ දැමීම, ගොවි ණය කපාහැරීම ආදිය මුල්කරගෙන කැබිනට් මන්ඩලය ගත් තීරණ බව කියමින් කරන ප්රචාරය හුදු ප්රකාශ පමණකැයිද හෙට්ටිආචරච්චි මහතා අද (09) මොනරා පුවත්පතට ප්රකාශ කළේය.
