පාර්ලිමේන්තුවේ ඇති වූ උණුසුම් තත්ත්වය හේතුවෙන් සභාවේ කටයුතු විනාඩි 10කට කල්තැබීමට කථානායකවරයා පියවර ගත්තේය.Sri Lanka Latest News
ඒ් , විපක්ෂයේ මන්ත්රීවරුන් 20 දෙනෙකු නැගිට කථානායකවරයාගෙන් හදිසි පාර්ලිමේන්තු විවාදයක් ඉල්ලා සිටීමත් සමගය.
කථානායකවරයා විසින් විවාදය සම්බන්ධයෙන් ආණ්ඩු පක්ෂයෙන් කරුණු විමසීමේදී, සභා නායක බිමල් රත්නායක අමාත්යවරයා පැවසුවේ ඒ සඳහා එකඟ නොවන බවත් අවශ්ය නම් අදාල කරුණ සම්බන්ධයෙන් ඡන්දයක් විමසීමට එකඟ වන බවත්ය.
ඒ සඳහා විපක්ෂයේ මන්ත්රීවරුන් සිය විරෝධය දක්වමින් අදහස් ප්රකාශ කිරීමට පටන් ගැනීමටත් සමඟ පාර්ලිමේන්තුව තුළ මතගැටුමක් ආරම්භ විය.
මේ හේතුවෙන් මෙලෙස පාර්ලිමේන්තුව විනාඩි 10කට කල් තබන ලදී.
2026.06.23
ගරු කථානායකතුමා
ශ්රී ලංකා පාර්ලිමේන්තුව
ස්ථාවර නියෝග 19(1) යටතේ හදිසි පොදු වැදගත්කමකින් යුක්ත කාරණයක් සාකච්ඡා කිරීම සඳහා කල්තැබීමේ යෝජනාවක් ඉල්ලීම
වර්තමානයේ යුක්තිය පසිඳලන ආයතනවල පවතින පුරප්පාඩු හේතුවෙන් එම ආයතනවල කාර්යයන් කාර්යක්ෂමව, ස්වාධීනව හා විධිමත්ව ඉටු කිරීම සම්බන්ධයෙන් බරපතළ ප්රායෝගික ගැටලු මතු වී ඇත. එහි ප්රතිඵලයක් ලෙස නඩු ගොඩගැසීම හා නඩු විභාග ප්රමාද වීම වැඩි වී ඇති අතර, ජනතාවට සාධාරණය හා යුක්තිය නියමිත කාලය තුළ ඉටු නොවීම සැලකිය යුතු අර්බුදයක් බවට පත්ව ඇත. මෙම තත්ත්වය යුක්තිය පසිඳලීමේ පද්ධතිය කෙරෙහි මහජන විශ්වාසයට ද අහිතකර ලෙස බලපාන අතර, එය ක්රමයෙන් බරපතළ සමාජීය ගැටලුවක් දක්වා වර්ධනය වෙමින් පවතී.
එබැවින්, මෙය ඉතා හදිසි සහ ප්රමුඛ කාර්යයක් ලෙස සලකා යුක්තිය පසිඳලන ආයතනවල පවතින පුරප්පාඩු, නඩු ප්රමාදය සහ ඒවාට හේතු වී ඇති ව්යුහාත්මක හා පරිපාලනමය ගැටලු පිළිබඳ පාර්ලිමේන්තුවේ කථිකාවතක් පවත්වා, එම ගැටලු සඳහා කඩිනම් හා ඵලදායී විසඳුම් ක්රියාත්මක කිරීමට අවශ්ය පියවර ගැනීම යෝජනා කරමු.
