ඔක්තෝබර් හත්වනදා, හමාස් සංවිධානය විසින් එල්ල කරන ලද අනපේක්ෂිත ප්රහාරයත් සමග පැන නැගුණු ඊශ්රායල හමාස් යුද්ධය හේතුවෙන් මේ වන විට පලස්තීන දරුවන් දහතුන් දහසකට ආසන්න ප්රමාණයක් මියගොස් ඇතැයි යුනිසෙෆ් සංවිධානය පවසයි.
යුද්ධය ආරම්භ වූ දා සිට මේ දක්වා මියගිය සමස්ත පලස්තීන වැසියන් සංඛ්යාව තිස් එක් දහසකි.
ඉන් දහතුන් දහසක්ම දරුවන් ය. ඒ අනුව, ලෝකයේ වෙනත් කිසිදු යුද්ධයක දී ඇති නොවූ ආකාරයේ ළමා මරණ අනුපාතිකයක් මෙම යුද්ධයේ දී වාර්තාවන බව යුනිසෙෆ් සංවිධානය පවසයි.
ඊට අමතරව, ඊශ්රායල හමුදා එල්ල කරන ලද ප්රහාර හේතුවෙන් තවත් දරුවන් දහස් ගණනක් තුවාල ලබා ඇති බව පවසන යුනිසෙෆ් සංවිධානය, ගාසා තීරයේ දී කුසගින්නද දරුවන්ට එරෙහිව භාවිතා වන බිහිසුණු අවියක් බවට පත්ව ඇතැයි චෝදනා කරයි.
ගාසා තීරයේ කුසගින්න මොන තරම් බිහිසුණු ද යත්, අඩන්නටවත් ශක්තියක් නැති දරුවන් පිළිබදව යුනිසෙෆ් සංවිධානය වාර්තා කර තිබේ.
ගාසා තීරයේ වයස අවුරුදු දෙකට අඩු දරුවන් අතර මන්දපෝෂණ අනුපාතය කොතරම් බිහිසුණු ද යත්, සෑම දරුවන් තිදෙනෙකුගෙන්ම එක් අයෙකු මන්දපෝෂණයෙන් පෙළෙන බවද යුනිසෙෆ් සංවිධානය පවසයි.
