දේවාලයකින් බැලූ ශාස්ත්රයකට අනුව කැණීමක් සිදුකර ගොඩට ගත් රුපියල් කෝටි 200ක් වටිනා බව කියන මැණික් තොගයක වස් ඇරීම සඳහා සූදානම් වෙමින් සිටි අවස්ථාවේ කළ වැටලීමකින් මිල කළ නොහැකි බව කියන නිල් මැණික් කැබලි හතක් සමග යුද හමුදා විශ්රාමික කෝප්රල්වරයකු ඇතුළු පස්දෙනෙක් අනුරාධපුර කොට්ඨාස පුරාවිද්යා ආරක්ෂණ විශේෂ පොලිස් ඒකකයේ නිලධාරීන් ඊයේ (18දා) අලුයම සැකපිට අත්අඩංගුවට ගනු ලැබූහ.
අනුරාධපුර කොට්ඨාස භාර ජ්යෙෂ්ඨ පොලිස් අධිකාරී කීර්ති ලංකා ගීගනගේට ලැබුණු තොරතුරකට අනුව කැකිරාව, තලාව පාර සඳගල්පාය ප්රදේශයේ කළ වැටලීමෙන් ඉඩම පිහිටි නිවසේ හිමිකරු බව කියන විශ්රාමික විදුලිබල මණ්ඩල සේවකයකු වන ව්යාපාරිකයකු ඇතුළු පස්දෙනා අත්අඩංගුවට ගෙන තිබිණි.
සැකකරුවන් සන්තකයේ තිබී තද නිල් පැහැයෙන් යුතු වූ විවිධ බර ප්රමාණයන්වලින් යුතු මැණික් කැබලි බවට සැකකරන ගල් කැබලි හයක් හා සුදු පැහැති මැණික් බව කියන ගල් කැබැල්ලක් අත්අඩංගුවට ගෙන තිබිණි. එම මැණික් ගල් බව කියන ගල් තොගයේ මුළු බර ග්රෑම් 50කට වඩා අධික බව පොලිසිය පවසයි.
වසරක පමණ කාලයක සිට අක්රමවත් ලෙස ළිඳක් කපන මුවාවෙන් කැණීම කර තිබෙන බව වැටලීම කළ පොලිසිය කියයි.
නිවසේ හිමිකරු වන 62 හැවිරිදි පුද්ගලයා 36 හැවිරිදි කට්ටඬියා ඔහු කැඳවාගත් 25 හැවිරිදි කාන්තාවක 45 හැවිරිදි යුද හමුදා විශ්රාමික කෝප්රල්වරයකු සහ 36 හැවිරිදි පුද්ගලයකු පොලිසිය අත්අඩංගුවට පත්වී තිබුණු අතර ඔවුන් කැකිරාව, රත්නපුර, ගල්ගමුව, රාජාංගණය හා මහනුවර පදිංචිකරුවන්ය.
