ආයුධ සන්නද්ධව පැමිණි පිරිසක් මරදාන ප්රදේශයේදී ත්රිරෝද රථ රියදුරෙකුට සිදුකළ අමානුෂික පහරදීමක් පිළිබඳව පොලිසිය විමර්ශනයක් ආරම්භ කර තිබේ.
මෙම ත්රිරෝද රථයේ පසුගිය 10 වැනිදා පස්වරුවේ වයස අවුරුදු 16ක පමණ තරුණයෙකු ගැටී ඇති අතර පසුව ත්රීරෝද රථයේ රියදුරු හා එම තරුණයා අතර බහින්බස්වීමක් සිදුව තිබේ.
එම සිද්ධියෙන් අනතුරුව අදාළ ත්රිරෝද රථය මරදාන – මොහිදින් මස්ජීඩ් මාවතට පැමිණ තිබේ.
ත්රිරෝද රථයේ පැමිණි පුද්ගලයා පිළිබඳව ඔත්තු බැලීම සඳහා එම ස්ථානයට ඒවන විටත් පුද්ගලයෙකු පැමිණ සිටි අයුරු දක්නට ලැබුණු අතර ඔත්තු බැලීමට පැමිණි පුද්ගලයා ලබාදුන් දුරකථන ඇමතුමකට අනුව 20 දෙනෙකුගෙන් පමණ සමන්විත සංවිධානාත්මක පිරිසක් මෙම ස්ථානයට කඩා වැදී තිබිණ.
ඒ, අසළ පිහිටි නිවාස්වල පුද්ගලයන්ටද තර්ජනය කරමිිනි.
සංවිධානාත්මක පිරිස යකඩ පොලු හා කඩුවලින් ත්රිරෝද රථයේ රියදුරුට පහරදීමෙන් පසු ත්රීරෝද රථ රියදුරු තම ජීවිතය බේරාගැනීම සදහා මෙලෙස පළා යන අයුරු දක්නට ලැබේ.
රියදුරු පලායාමෙන් අනතුරුව සංවිධානාත්මක පිරිස නැවත පැමිණ ත්රිරෝද රථයට පහර දීමක් සිදු කරයි.
පොලිසියෙන් අප කළ විමසීමකදී උසස් නිලධාරියෙකු සඳහන් කළේ මෙම ප්රහාරයෙන් 22 හැවිරිදි ත්රිරෝද රථ රියදුරු කැපුම් තුවාල සහිතව කොළඹ ජාතික රෝහලේ මේවන විට ප්රතිකාර ලබන බවයි.
පහරදීමේ සිද්ධිය සම්බන්ධයෙන් පුද්ගලයන් දෙදෙනෙකු සැකපිට අත්අඩංගුවට ගෙන ඇති අතර, සිද්ධිය සම්බන්ධයෙන් තවදුරටත් විමර්ශන ක්රියාත්මක බව පොලිසිය සඳහන් කළේය.
