චීනය නොමැතිව ශ්රී ලංකාවට ජාත්යන්තර මූල්ය අරමුදලෙන් ණය ලබා දීමට එම සංවිධානය සාකච්ඡා ආරම්භ කොට ඇති බවටත්, ලබන මාර්තුවේ එම ණය මුදල නිදහස් වීමට ඉඩ ඇති බවටත් ලොව ප්රධාන මාධ්යයක් වන ‘බ්ලූම්බර්ග්’ වෙබ් අඩවිය පසුගියදා කළ අනාවරණය සම්පූර්ණ අසත්යයක් බව මේ වනවිට අනාවරණය වී තිබේ.
ඒ ලංකාවට ණය දීම සම්බන්ධයෙන් මූල්ය අරමුදලේ නියෝජිතයන්ගේ ප්රධානත්වයෙන් ඉන්දියාවේ පැවැති විශේෂ සාකච්ඡාවකදීය.
ජාත්යන්තර මූල්ය අරමුදලේ (IMF) ආසියානු – පැසිෆික් දෙපාර්තමේන්තුවේ අධ්යක්ෂ ක්රිෂ්ණා ශ්රීනිවාසන් එහිදී පෙන්වා දී ඇත්තේ IMF ණය සම්බන්ධව ශ්රී ලංකාවට ඇති හොඳම ක්රමය වන්නේ චීනයේ සහතිකය ලැබෙන තුරු බලා සිටීම බවයි.
නමුත් බ්ලූම්බර්ග් වෙබ් අඩවිය උපුටා දක්වමින් මීට පෙර මෙරට මාධ්ය වාර්තා කළේ ජාත්යන්තර මූල්ය අරමුදල (IMF) චීනයෙන් මූල්ය සහතිකයක් ලබා ගැනීමට පෙර ශ්රී ලංකාවේ විදේශ අරමුදල් පහසුකම (EFF) සඳහා විධායක මණ්ඩලයේ අනුමැතිය ලබා දීමට තීරණයක් ගෙන ඇති බවයි. එහෙත් අධ්යක්ෂ ක්රිෂ්ණා ශ්රීනිවාසන් කියන්නේ එවැන්නක් සලකා බලමින් හෝ නැති බවයි.
ජාත්යන්තර මූල්ය අරමුදලේ ආසියා සහ පැසිෆික් දෙපාර්තමේන්තුවේ අධ්යක්ෂ ක්රිෂ්ණා ශ්රීනිවාසන් ඉන්දියාවේ නවදිල්ලි නුවර දකුණු ආසියානු මාධ්යවේදීන් සඳහා පවත්වන ලද පුහුණු වැඩසටහනක දී යි එම අදහස පළකර තිබෙන්නේ.
පෙර කී මාධ්ය වාර්තා තමන්ද දුටු බව පවසා ඇති අධ්යක්ෂ ක්රිෂ්ණා ශ්රීනිවාසන් එය නිල ප්රකාශයක් නොවන බවයි කියා ඇත්තේ.
චීනයෙන් අවශ්ය සහතිකය ලැබීමට පෙර විධායක මණ්ඩලයේ අනුමැතිය ලබා දීමේ මීළඟ පියවර වෙත යාමට අරමුදල සලකා බලයිද යන්න “අනුමාන කිරීමට ඉක්මන් වැඩිය” යැයි ඔහු කියා තිබෙනවා.
සති කිහිපයකට පෙර, චීනයේ අපනයන හා ආනයන බැංකුව (EXIM) ශ්රී ලංකාව සඳහා වසර දෙකක කාලයක් ලබා දුන් බව පවසා තිබුනත් එය IMF සඳහා ප්රමාණවත් නොවන බවයි කියන්නේ.
කෙසේවෙතත් බ්ලූම්බර්ග් වෙබ් අඩවිය පළ කළ අසත්ය පුවතට මෙරට මාධ්ය විශාල ප්රචාරයක් ලබා දුන්නද මෙම පුවතට එවැනි ප්රචාරයක් ලබා නොදීම විශේෂ සිදුවීමකි.
