මෝටර් රථයකින් පැමිණි නාඳුනන තුවක්කුකරුවන් පිරිසක් විසින් මාතර, ගාල්ල ප්රධාන මාර්ගයේ මිදිගම ප්රදේශයේ හෝටලයක හිමිකරුට පෙරේදා (29) පස්වරුවේ වෙඩි තබා ඇති අතර, තුවාලකරු මාතර මහ රෝහලට ඇතුළත් කර ප්රතිකාර ලබමින් සිටියදී ඊයේ (30) අලුයම මියගොස් ඇතැයි මිදිගම පොලිසිය පවසයි.
මෙලෙස වෙඩි වැදීමෙන් මියගොස් ඇත්තේ ‘චිකී මංකි’ නමැති අවන්හලේ හිමිකරු වන පසිඳු සඳරුවන් දොඩම්ගොඩගේ නමැති 32 හැවිරිදි අයෙකි. 2021 දෙසැම්බර් 20දා ද මොහු වෙඩි ප්රහාරයකට ලක් වූ අතර, ඒ ප්රහාරය එල්ල කර ඇත්තේ හරක් කටාගේ ගෝලයන් විසින් බව විමර්ශනවලදී අනාවරණය විය. හරක් කටා විසින් ඩුබායි සිට දුන් කොන්ත්රාත්තුවකට අනුව ඒ ප්රහාරය එල්ල කර තිබේ.
මියගිය තැනැත්තා තම හෝටලය ඉදිරිපිට යතුරුපැදියක සිටියදී මේ වෙඩි තැබීමට ලක්ව ඇත. වෙඩි තැබූ පුද්ගලයන් CAQ 1484 අංකය දරන සුදු පැහැති වැගන් ආර් රථයකින් පැමිණ ඇති බවත්, ටී-56 ගිනිඅවියක් භාවිත කොට ඔවුන් මේ වෙඩි තැබීම සිදු කර ඇති බවත් පොලිසිය සිදු කළ මූලික පරීක්ෂණවලින් අනාවරණය වී තිබේ. වෙඩික්කරු පැමිණි රථය ඉමදූව ප්රදේශයේ අත්හැර ගොස් තිබියදී සොයාගෙන ඇති අතර එය දින 4කට පෙර වාහන කුලියට දෙන මාතර පිහිටි ස්ථානයකින් ගත් එකක් බව විමර්ශනවලින් හෙළි වී ඇත. එය කුලියට ගෙන ඇත්තේ මිදිගම පදිංචි අයකු විසිනි. ඔහු මේ වන විට සිය අඹුදරුවන් සමඟ අතුරුදන්ව ඇති බව පොලිසිය කියයි.
වැගන් ආර් රිය කුලියට ගත් මොහොතේ සිට වෙඩි ප්රහාරය එල්ල කර අත්හැර ගිය මොහොත දක්වා එය ගමන් කළ ස්ථාන ගැන පවා තොරතුරු මේ වන විට පොලිසියට ලැබී ඇත. ඒ ඔස්සේ වෙඩික්කරු සහ ඝාතනයට සම්බන්ධ පුද්ගලයන් හඳුනා ගනිමින් සැකකරුවන් කොටු කර ගැනීමට විමර්ශන කණ්ඩායම් කිහිපයක්ම පරීක්ෂණ පවත්වන බව පොලිස් තොරතුරු අනාවරණය කළේය.
