පළමු ණය ප්‍රතිව්‍යුහගත යෝජනාව ලංකාවට එයි! ඒත් කිසිම තොරතුරක් එළියට ඇවිත් නෑ!

ශ්‍රී ලංකාවට ණය ලබාදී ඇති පෞද්ගලික ණයහිමියන් විසින් ණය ප්‍රතිව්‍යුහගතකරණය පිළිබඳ පළමු යෝජනාව මෙරට බලධාරීන්ට යොමුකර ඇති බවට වාර්තා වෙයි. 

ඔවුන් සතු බැඳුම්කරවල වටිනාකම ඩොලර් බිලියන 12 කි.

අමෙරිකාවේ වොෂිංටන් හී පැවැත්වෙන ස්ප්‍රින් සමුළුවට සමගාමීව ජපානය, ප්‍රංශය සහ ඉන්දියාව ඊයේ ප්‍රවෘත්ති සාකච්ඡාවක් පවත්වමින් ශ්‍රී ලංකාවේ ණය ප්‍රතිව්‍යුහගත කිරීමේ වැඩසටහන සම්බන්ධයෙන් සිය සැලැස්ම ප්‍රකාශයට පත් කර තිබුණි. 

ඒ අනුව ශ්‍රී ලංකාවට ණය ලබාදී ඇති පෞද්ගලික ණයහිමියන්ගේ කමිටුව විසින් ණය ප්‍රතිව්‍යුහගතකරණය පිළිබඳ පළමු යෝජනාව මෙරට බලධාරීන්ට එවා ඇති බවට වාර්තා වුණි.

කෙසේ වෙතත් මෙම යෝජනාව සම්බන්ධයෙන් තොරතුරු අනාවරණයවීමක් සිදුනොවන අතර මේ සඳහා ණයහිමියන් 30 දෙනෙකුගෙන් යුත් කණ්ඩායමක් ඇතුළත්ව ඇති බව වාර්තා වෙයි.

එම කණ්ඩායම සඳහා ගෝලීය ආයෝජන සමාගම් වන Amundi Asset Management, BlackRock, HBK Capital Management සහ T. Rowe Price Associates ඇතුළත් බවද සඳහන්ය.

මෙම ණය ප්‍රතිව්‍යුහගත කිරීමේ යෝජනාව සම්බන්ධයෙන් සාකච්ඡා කිරීම සඳහා බැඳුම්කරහිමියන් සහ රජයේ නිලධාරීන් වොෂින්ටනයේදී හමුවී ඇති අතර දෙපාර්ශවයේම නීති සහ මූල්‍ය උපදේශකයන් පැමිණ සිටි බවද වාර්තා වෙයි.