රසායනික පොහොර තහනම් කිරීමට ආණ්ඩුව ගනු ලැබූ ක්ෂණික තීන්දුව හේතුකොට ගෙන අපේ රටේ සමස්ත ගොවි ජනතාවත් පොදුවේ මුළු මහත් ජනතාවත් බරපතළ පීඩාවකට ලක්වන බවත්, මෙය ආණ්ඩුව විසින් ගනු ලැබූ අත්තනෝමතික අඥාන තීන්දුවක් බවත් විපක්ෂ නායක සජිත් ප්රේමදාස මහතා පැවසීය.
විපක්ෂ නායක කාර්යාලයේ දී මාධ්ය අමතා විශේෂ ප්රකාශයක් කළ විපක්ෂ නායක සජිත් ප්රේමදාස මහතා ප්රකාශ කළේ ආණ්ඩුවේ මෙම තීන්දුව හේතුවෙන් රටතුළ තුන් බියක් ඇතිවීමේ අවදානමට ලක්වන බවයි.
කාබනික පොහොර භාවිතය ක්ෂණිකව කළ හැක්කක් නොවන බව පැවසූ විපක්ෂ නායකතුමා වැඩිදුරටත් පවසා සිටියේ ක්රමානුකූලව කාබනික පොහොර කෙරෙහි ගොවිජනතාව යොමුකර, එය සාර්ථක වූ පසු රසායනික පොහොර නවතා දැමීම ප්රායෝගික බවයි.
එතෙක් ගුණාත්මක රසායනික පොහොර සහනාධාරය ලබා දිය යුතු බවද හෙතෙම පැවසීය.
කොරොනා ව්යසනය හේතුකොටගෙන බරපතළ පීඩාකාරී තත්ත්වයකට පත්ව ඇති ජනතාව ආණ්ඩුවේ මේ අත්තනෝමතික තීන්දුව හේතුවෙන් කබලෙන් ලිපට වැටෙන තත්වයකට පත් වන බව ද එතුමා පැවසීය.
ආණ්ඩුව විසින් ගනු ලබන මෙම තීන්දු හේතුකොටගෙන ඉතාම බරපතළ ආර්ථික හා ආහාරමය අහේනියක් රට පුරා ඇතිවිය හැකි බවත්, ඒ තත්ත්වය ඇතිවන්නට පෙර මෙම අදූරදර්ශී තීන්දුව ආපසු හරවා පොහොර තහනම ඉවත් කළ යුතු බවත් විපක්ෂ නායකතුමා පැවසීය.
