සිංහ කොඩියේ යම් යම් වෙනස්කම් සිදු කිරීමට තීරණය කර ඇතැයි ආරක්ෂක ලේකම් විශ්රාමික මේජර් ජනරාල් කමල් ගුණරත්න මහතා ප්රකාශ කර ඇති බව පසුගිය සඳුදා ප්රධාන පෙළේ ඉංග්රීසි පුවත්පතක් වාර්තා කර තිබිණි.
එහි වැඩිදුරටත් සඳහන්ව තිබුණේ ආරක්ෂක ලේකම්වරයාගේ ප්රධානත්වයෙන් කොළඹ පැවැති උත්සවයකදී එම තොරතුරු හෙළිදරව් කළ බවය. කෙසේ නමුත් ඒ පිළිබඳව කිසිදු සිංහල පුවත්පතක් කරුණු වාර්තා කර නොතිබීමද විශේෂත්වයක් විය.
මේ ගැන විමසීමට ආරක්ෂක ලේකම්වරයා දුරකතනයෙන් සම්බන්ධ කර ගැනීමට අප උත්සාහ ගත් නමුත් ඒ වෙනුවෙන් අප හා සම්බන්ධ වූයේ අලුතින් පත්වූ ඒ මහතාගේ මාධ්ය ලේකම් කර්නල් චන්දිම කුමාරසිංහ මහතාය.
නිදහස් දිනයට සූදානම් වන නිසා ආරක්ෂක ලේකම්වරයා කාර්ය බහුල බව ප්රකාශ කළ මාධ්ය ලේකම්වරයා අප ඉදිරිපත් කළ ප්රශ්නයට පිළිතුරු දෙමින් කියා සිටියේ එවැන්නක් ගැන තමන්ට අදහසක් නොමැති බවයි.
අනතුරුව අපි මේ පිළිබඳව විමසීමට සම්බන්ධ කර ගත්තේ ස්වදේශ කටයුතු අමාත්ය චමල් රාජපක්ෂ මහතාවය. එහිදී රාජපක්ෂ මහතා සඳහන් කර සිටියේ තමන්ද ඒ බව දැන ගත්තේ ආරක්ෂක ලේකම්වරයාගේ ප්රධානත්වයෙන් පැවැති රැස්වීමේදී වන බවය.
“අනේ මම නම් ඒ ගැන දන්නේ නැහැ. මටත් ඔය ගැන අහන්න ලැබුණේ පසුගියදා ආරක්ෂක ලේකම් සම්බන්ධ වූ සාකච්ඡාවකදී. නැතිව වෙනත් විස්තර මම දන්නේ නැහැ.”
අප මේ සම්බන්ධයෙන් ජනමාධ්ය අමාත්ය කෙහෙලිය රඹුක්වැල්ල මහතාගෙන්ද විමසීමක් කළ අතර ඒ මහතාද සඳහන් කළේ තමන් ඒ පිළිබඳව දැන ගත්තේද අදාළ සාකච්ඡාවේදී වන බවය.
“ඔය එක් එක් විද්වත් අය සිංහ කොඩිය ගැන විවිධ මතවාද අදහස් ඉදිරිපත් කරලා තියෙනවා කියලා මටත් අහන්න ලැබුණේ ආරක්ෂක ලේකම් සහභාගි වූ රැස්වීමේදියි. ඒකට හේතුව ඉතිං මම දන්නේ නැහැ. අපිට නොපෙනෙන දේවල් විද්වත් අයට පේනවා ඇති. එහෙම කරන්න යන්නේ මොන වෙනසද කියන එක ගැන මම දන්නෙත් නැහැ.”
ඒ ඇමැතිවරයාගේ පිළිතුරුය.
මේ පිළිබඳව සොයා බැලීම සඳහා විශේෂ කොමිටියක්ද පත් කර ඇති බවට ආරංචි පැතිර ඇති බැවින් අප ඒ පැනයද ජනමාධ්ය අමාත්යවරයා වෙත යොමු කළෙමු.
“මම ඒක දන්නේ නැහැ. රජයෙන් නම් එහෙම කොමිටියක් පත් කරලා නැහැ. ඒක පත් කරලා තියෙන්නේ ආරක්ෂක අමාත්යාංශයෙන් කියලයි දැන ගන්න තියෙන්නේ. ඒත් ඉතිං සිංහයාගේ හරි කොඩියේ හරි වෙනසක් කරනවා නම් ඒක ලොකු කාර්යභාරයක්. ඔය යෝජනා පාර්ලිමේන්තුවට එන්න ඕනෑ. ව්යවස්ථාවට ඇතුළත් වෙන්නේ ඕනෑ. ඒක හින්දා ඔය යෝජනා කාගෙද කියලා මම දන්නේ නැහැ.” ඒ කෙහෙළිය රඹුක්වැල්ල මහතාගේ පිළිතුරය.
ඉන් පසු අප නැවතත් ආරක්ෂක අමාත්යාංශයේ මාධ්ය ලේකම් කර්නල් චන්දිම කුමාරගේ මහතා ඇමතුවේ ඇමැතිවරුන්ගේ ප්රකාශ සම්බන්ධයෙන් පැහැදිලි කර ගැනීමක් අවශ්ය වූ නිසාය.
“ඔය වගේ සිද්ධියකට හමුදාවෙන් නම් මම දැනුවත්ව කොමිටියක් පත් කර නැහැ. සමහර විට රාජ්ය පරිපාලන හෝ ස්වදේශ කටයුතු අමත්යාංශවලින් එහෙම කමිටුවක් පත් කරලද දන්නේ නැහැ. ඒක ඒ අමාත්යංශවලින් අහලා බලන්න.” යනුවෙන් ඒ මහතා එයට පිළිතුරු දුන්නේය.
ප්රේමලාල් විජේරත්න
