කිරුළපන සිරි ඇලන් මැතිනියාරාමයේ අභිනවයෙන් ඉදිකළ දාන ශාලාව, ගිනි හල් ගෙය, ආවාස මන්දිරය සහ සක්මන් භාවනා උද්යානය විවෘත කිරීම නිමිත්තෙන් අද (11) දහවල් විහාරස්ථානයේ පැවති දානමය පින්කමට ජනාධිපති ගෝඨාභය රාජපක්ෂ මැතිතුමා සහභාගී විය.
මෙහිදී දැකගන්නට ලැබුණු විශේෂම සිදුවීම වූයේ මෙම අවස්ථාවට ජනාධිපති ආර්යා අයෝමා රාජපක්ෂ මැතිනියත්, බැසිල් රාජපක්ෂ මහතා සහ එම මැතිනිය වූ පුෂ්පා රාජපක්ෂ මහත්මියත් සහභාගී වී සිටීමය.
විහාරස්ථානයට පැමිණි ජනාධිපතිතුමා පළමුව ආගමික වතාවත්වල නිරත විය.
අනතුරුව දානමය පින්කමට එක් වූ ජනාධිපතිතුමා මහා සංඝරත්නයට දානය පිළිගැන්වීය.
අදට යෙදී ඇති පූජ්ය උඩුවේ ධම්මාලෝක හිමියන්ගේ ජන්ම දිනයට හා හෙටට යෙදී ඇති උන්වහන්සේගේ මෑණියන්ගේ ජන්ම දිනයට ආශිර්වාද කිරීම පිංකමේ තවත් අරමුණකි.
මල්වතු පාර්ශ්වයේ අනුනායක හිමිවරුන් වන අතිපූජ්ය දිඹුල්කුඹුරේ විමලධම්ම, ආචාර්ය අතිපූජ්ය නියංගොඩ විජිතසිරි, අස්ගිරි පාර්ශ්වයේ අනුනායක අතිපූජ්ය වෙඬරුවේ උපාලි සහ අමරපුර චූලවංශික මහා නිකායේ අනුනායක, කිරුළපන ඇලන් මැතිණියාරාම විහාරාධිපති පූජ්ය යෝගියානේ සෝභිත හිමිවරුන්ගේ ප්රධානත්වයෙන් දානමය පුණ්ය කර්මය පැවැත්විණ.
මල්වතු පාර්ශ්වයේ අනුනායක අතිපූජ්ය දිඹුල්කුඹුරේ විමලධම්ම හිමියෝ ජනාධිපතිතුමා වෙත සිහිවටන තිළිණයක් පිළිගැන්වූහ.
ආණ්ඩුවේ විවිධ පාර්ශ්ව බැසිල් රාජපක්ෂ මහතාට එරෙහිව ආණ්ඩුව ඇතුළේ කදවුරු බදිද්දී ජනාධිපතිවරයා බැසිල් රාජපක්ෂ මහතා හා එම මැතිනිය සමග මේ අයුරින් එක්ව ආගමික උත්සවයකට සහභාගී වී සිටීම විශේෂ සිදුවීමකි.
අමාත්ය සරත් වීරසේකර, ආර්ථික පුනර්ජීවනය හා දරිද්රතාව තුරන් කිරීමේ කාර්ය සාධක බලකායේ ප්රධානී බැසිල් රාජපක්ෂ, පාර්ලිමේන්තු මන්ත්රී නලින් ප්රනාන්දු, ආරක්ෂක ලේකම් විශ්රාමික ජනරාල් කමල් ගුණරත්න යන මහත්වරු ඇතුලු පිරිසක් මේ අවස්ථාවට එක්ව සිටියහ.
