රාජ්ය පරිපාලන, ස්වදේශ කටයුතු, පළාත් පාලන හා පළාත් සභා අමාත්යාංශයේ ලේකම්වරයා විසින් පළාත් පාලන ඡන්ද විමසීමට අදාලව ඇප තැන්පත් බාර නොගන්නා ලෙසට සියලුම දිස්ත්රික් ලේකම්වරුන් වෙත ලිපියක් හරහා දැන්වීම මගින් ඔහු දැන දැනම ව්යවස්ථාවේ 104 වගන්තිය උල්ලංඝනය කර ඇති බවත්,කැබිනට් මණ්ඩලය මෙවැනි තීන්දුවක් ගත්තාද යන්න පිළිබඳව වහා හෙළිදරව් කළ යුතු බවත්, මේ අන්තනෝමතික ලිපිය යැවූ ලේකම්වරයා සම්බන්ධයෙන් ගනු ලබන ක්රියා මාර්ගය කුමක්ද යන්න ගැන පැහැදිලි කළ යුතු බවත් විපක්ෂ නායකතුමා පාර්ලිමේන්තුවේදී පැවසීය.
මැතිවරණය නොපැවැත්වීමට අනුබල දෙමින් මෙවැනි ලිපියක් යැවීම සහ ඊට පෙළඹවීම බරපතළ වරදක් බව පැවසූ විපක්ෂ නායකතුමා මෙහි සත්ය තත්ත්වය රටට හෙළිදරව් විය යුතු බවද පැවසීය.
මෙහිදී අග්රාමාත්ය දිනේෂ් ගුණවර්ධන මහතා සහ විපක්ෂ නායක සජිත් ප්රේමදාස මහතා අතර උණුසුම් සංවාදයක් සිදු වූ අතර අගමැතිවරයා අද වන විට පියන් කෙනෙකුගේ තත්ත්වයට පත්ව ඇතැයි විපක්ෂ නායකතුමා පැවසීය.
ඊට ප්රතිචාර දැක්වූ අගමැතිවරයා පවසා සිටියේ අගමැතිවරයා පියෙන් කෙනකු බව පැවසුවේ විපක්ෂ නායක සජිත් ප්රේමදාස මහතාගේ පියා විසින් බවය.
ඊට ප්රතිචාර දැක්වූ විපක්ෂ නායක සජිත් ප්රේමදාස මහතා පවසා සිටියේ එදා ප්රේමදාස මහතා පියන් තනතුරක් වැනි අගමැති තනතුරේ හිදිමින් ජනාධිපතිවරයෙකුගේ වැඩ කළ බවය.බොරළුගොඩ සිංහයා අද පත්ව ඇති තත්වය පිළිබඳව තමන් කණගාටුවන බවද විපක්ෂ නායකතුමා පැවසීය.
