ඡන්දෙ ඉල්ලන විපක්ෂයේ විරෝධය දැඩි වෙයි! කතානායකට බේරගන්න බැරි වෙයි! හෙට දක්වා පාර්ලිමේන්තුව කල් තියයි!

පාර්ලිමේන්තුව හෙට පෙරවරු 9:30 දක්වා කල් තබන බව කතානායක මහින්ද යාපා අබේවර්ධන මහතා පැවසීය.

ඡන්දය ඉල්ලා උද්ඝෝෂණය කළ සමගි ජනබලවේගයේ මන්ත්‍රීවරුන් කථානායක අසුන අසලට ද පැමිණ උද්ඝෝෂණය කළ අතර අනතුරුව කතානායකවරයා නිවේදනය කළේ පාර්ලිමේන්තුව හෙට දක්වා කල් තබන බවයි.

අද උදෑසන 9.30ට පාර්ලිමේන්තුව රැස් වූ අවස්ථාවේ සිට විපක්ෂයේ මන්ත්‍රීවරුන් මැතිවරණ ඉල්ලා විවිධ ප්‍රකාශ සිදුකළේය.

පාර්ලිමේන්තුව හමුවේ නැගී සිටිමින් විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා සඳහන් කළේ, මැතිවරණය කල් දැමීම සම්බන්ධයෙන් සාකච්ඡා කිරීම සඳහා පක්ෂ නායක රැස්වීමක් කැඳවීමට පියවර ගන්නා ලෙසය.

ඊට ප්‍රතිචාර දක්වමින් කථානායකවරයා, අද පස්වරු 2ට පක්ෂ නායක රැස්වීමක් කැඳවීමට පියවර ගන්නා බව සඳහන් කළේය.

කෙසේවෙතත් ඉන් අනතුරුව විපක්ෂයේ සියලු දේශපාලන පක්ෂ සිය අසුන්වලින් නැගී සිටිමින් විරෝධතා පුවරු ඉහළට ඔසවමින් සභා ගර්භය මැදට පැමිණ විරෝධතාවයේ නිරත වූහ.

අනතුරුව තත්ත්වය පාලනය කිරීම සඳහා කථානායකවරයා විසින් හෙට උදෑසන 9.30 දක්වා පාර්ලිමේන්තුව කල් තබන බව දැනුම් දුන්නේය.