ජනාධිපති ගෝඨාභය රාජපක්ෂ මහතා විසින් මහබැංකු නිලධාරීන් ජනාධිපති ලේකම් කාර්යාලයට කැදවා පැය 24ක් ඇතුළත ආර්ථිකය නංවන යෝජනා ඉදිරිපත් කරන ලෙසට සිදු කළ නියෝගයත් සමග වහාම රැස්ව ඇති මහබැංකු නිලධාරීන් තීන්දු තීරණ රැසක් ගැනීමට කටයුතු කොට ඇත.
ඒ අනුව ශ්රී ලංකා මහ බැංකුවේ මුදල් මණ්ඩලය ඊයේ (16) පැවති රැස්වීමේ දී බලපත්රලාභී වාණිජ බැංකුවල සියලු රුපියල් තැන්පතු වගකීම් සඳහා අදාළ ව්යවස්ථාපිත සංචිත අනුපාතය 2020 ජුනි 16 වන දිනෙන් ආරම්භ වන සංචිත පවත්වා ගෙන යෑමේ කාල පරිච්ඡේදයේ සිට ක්රියාත්මක වන පරිදි සියයට 2.00 දක්වා පදනම් අංක 200කින් අඩු කිරීමට තීරණය කළේ ය.
ව්යවස්ථාපිත සංචිත අනුපාතයෙහි මෙම අඩු කිරීම තුළින් දේශීය මුදල් වෙළෙඳපොළ වෙත රුපියල් බිලියන 115ක අතිරේක ද්රවශීලතාවක් සැපයෙන අතර, එමගින් බලපත්රලාභී වාණිජ බැංකුවල අරමුදල් පිරිවැය අඩු කිරීමටත් ආර්ථිකයේ ණය ප්රවාහ ගලා යෑම වේගවත් කිරීමටත් මූල්ය පද්ධතියට හැකියාව ලබා දෙයි.
ප්රතිපත්ති පොලී අනුපාතික පදනම් අංක 150කින් අඩු කිරීම සහ බැංකු අනුපාතිකය පදනම් අංක 550කින් අඩු කිරීම ඇතුළු ව, දැනටමත් ක්රියාවට නංවා ඇති අනෙකුත් බොහෝ ලිහිල්කරණ ප්රතිපත්ති ක්රියාමාර්ගවලට අමතර ව ඊයේ දින ගත් මෙම තීරණයත් සමඟ 2020 වසරේ මේ දක්වා කාලය තුළ දී ව්යවස්ථාපිත සංචිත අනුපාතය පදනම් අංක 300කින් පහළ දමා ඇත.
අඩු පිරිවැයක් යටතේ ව්යාපාර සහ කුටුම්භ වෙත ණය ලබාදීම ඉහළ නංවමින් මූල්ය අංශය විසින් ඉහළ මට්ටමේ ද්රවශීලතාව සහ අරමුදල් පිරිවැය පහළ යෑමෙහි ප්රතිලාභය ආර්ථිකය වෙත ප්රමාදයකින් තොර ව ලබා දීම සඳහා කටයුතු කරනු ඇතැයි අපේක්ෂා කෙරේ.
මීට අමතරව ආර්ථිකය නගා සිටුවීම සඳහා රජයේ ප්රයත්නයන්ට සහාය දීමක් වශයෙන්, 1949 අංක 58 දරන මුදල් නීති පනතෙහි 83 වගන්තිය යටතේ නව ණය වැඩසටහන් හඳුන්වා දීමට මුදල් මණ්ඩලය විසින් ඊයේ පැවැති රැස්වීමේ දී තීරණය කරන ලදී.
ඒ අනුව, 2020 මාර්තු මස 27 වැනි දින හඳුන්වා දුන් ප්රතිමූල්යකරණ යෝජනා ක්රමය යටතේ දැනටමත් ලබා දී ඇති රුපියල් බිලියන 27.5ට අමතර ව ශ්රී ලංකා මහ බැංකුව විසින් බලපත්රලාභී වාණිජ බැංකුවලට සියයට 1.00ක සහන පොලී අනුපාතිකයක් යටතේ පුළුල් පරාසයක ඇපකර පොරොන්දු මත අරමුදල් ලබා දෙනු ඇති අතර, එම පහසුකම දේශීය ව්යාපාර බොහොමයක් සඳහා බෙදී යෑම සහතික කරමින් බලපත්රලාභී වාණිජ බැංකු විසින් එම අරමුදල් 4.00ක පොලී අනුපාතිකයක් යටතේ ව්යාපාරවලට ලබා දෙනු ඇත.
මීට අමතර ව, ඉදිකිරීම් අංශයේ ව්යාපාර විසින් අතීතයේ සිදු කරන ලද කොන්ත්රාත් ව්යාපෘති සඳහා ලැබිය යුතු මුදලට සමාන ව රජය විසින් නිකුත් කෙරෙන ඇපකරයක් මත ඉහත සඳහන් සහනදායී පොලී අනුපාතික යටතේ ණය ලබා ගැනීම සඳහා ශ්රී ලංකා මහ බැංකුව විසින් අරමුදල් සම්පාදනය කෙරෙමින් එම ව්යාපාර සඳහාම වෙන් වූ ණය යෝජනා ක්රමයක් හඳුන්වා දෙනු ඇත.
මෙම නව ණය යෝජනා ක්රම පිළිබඳ මෙහෙයුම් උපදෙස් හැකි ඉක්මනින් ඉදිරි කාලයේ දී නිකුත් කරනු ඇත.
